Saturday 18 October 2008

لۆبی كردن بۆ نه‌ته‌وه‌يه‌كی بێ ده‌وڵه‌ت
Lobbying for a stateless nation

لۆبی كردن بۆ نه‌ته‌وه‌يه‌كی بێ ده‌وڵه‌ت

بيره‌وه‌ری لۆبی و تێڕوانينی ستراتيژی

ناوه‌رۆكی ئه‌و كتێبه‌ بريتيه‌ بيره‌وه‌ری لۆبی كردن له‌ سه‌رده‌می هه‌شتاكان و نه‌وه‌ده‌كان، وه‌ كۆكراوه‌ی وتاره‌ كۆن و نوێكانم له‌سه‌ر بابه‌ته‌ ستراتيژی و چاره‌نوس سازه‌كانی كورد. ٤٧٠ لاپه‌ڕه‌ی به‌ زمانی كورديه‌ و ١۳٠ لاپه‌ڕه‌شی به‌ زمانی ئينگليزيه‌

له‌ مانگی نۆڤه‌مبه‌ری ٢٠٠٧ له‌ چاپ دراوه‌ و كه‌وتۆته‌ كتێبخانه‌كانی كوردستانی باشووره‌وه. بۆ كڕينی ئه‌و كتێبه‌ تكايه‌ كليكی دوگمه‌ی كڕين بكه‌. نرخی كتێبه‌كه‌ به‌ مه‌سره‌فی پۆسته‌وه/له‌ كوردستان ١٢ دۆلار/‌ ‌ بۆ ئه‌وروپا ٢۳ پاوه‌ندی به‌ريتانیا/ بۆ‌ ولاتانی تر ۳٠ پاوه‌ند‌

Lobbying for a stateless nation

This book consists of a collection of my published and unpublished memoirs relating to our lobbying compaign for Kurdish human rights. Written from a personal perspective, it aims to highlight the impact of international politics on events occuring in Kurdistan. The first 470 pages are written in Kurdish and the remaining 130 pages are in English. The book is now available in Hawler and Suleimani bookshops.

This book is available for direct order (£23 for Europe, or £30 for all other countries). Prices include package and postage.

Payment instructions

  • Click on "Buy now" button
  • You will be tranfered to paypal payment page. Choose your payement and fill in your details.
  • Accept the amount and click on "Agree and continue"




European countries (£23)








All other countires (£30)







Wednesday 17 September 2008

زنجيره‌ قه‌يرانه‌كانی كورد و به‌رنامه‌ی ڕزگاربوون- به‌شی دووه‌م

تێڕوانينێكی ستراتيژی له‌ قه‌يرانه‌ يه‌ك له‌دوای يه‌كه‌كان

به‌شی دووه‌م: ڕێڕه‌وی هه‌رێم و و به‌رنامه‌ی ڕزگاربوون
هاوڵاتی، ژماره‌ ٤٥٨، ڕۆژی ١٧/۹/٢٠٠٨ لاپه‌ڕه‌ ٥

پڕۆفيسۆر دلاوه‌ر عه‌بدولعه‌زيز عه‌لائه‌ددين

له‌ به‌شی يه‌كه‌می ئه‌و وتاره‌دا (هاوڵاتی چوارشه‌ممه‌ی ڕابوردوو)، گرفته‌ سه‌ره‌كيه‌كانی سياسه‌ت و ستراتيژيه‌تی كورد تاوتوێ كران و جه‌خت له‌سه‌ر دۆزينه‌وه‌ی ڕێڕه‌وی ڕزگاركردنی بزوتنه‌وه‌كه‌ كرا. ئه‌و به‌شه‌ی دووه‌م بۆ پێشنياز كردنی ڕێگاچاره‌كان و داڕێژتنی به‌رنامه‌يه‌كی تۆكمه‌ ته‌رخان كراوه‌، به‌و ئومێده‌ی كه‌ سه‌ركرده‌ بڕيارده‌ره‌كان بۆ مه‌به‌ستی فرياكه‌وتنی بزوتنه‌وه‌كه‌ و كۆتايی هێنان به‌ زنجيره‌ قه‌يرانه‌كان سوودی لێ ببينن‌.

پێناسه‌ی به‌رژه‌وه‌ندی به‌رزی هه‌رێم

سه‌ركرده‌كانی كورد هيچ ڕێگايه‌كی تريان له‌به‌رده‌م نه‌ماوه‌ له‌ غه‌يری داهێنانی پڕۆسه‌يه‌كی نوێی سه‌رده‌ميانه‌ بۆ بيركردنه‌وه‌ی ستراتيژی و دياريكردنی به‌رژه‌وه‌ندی گشتی و به‌رژه‌وه‌ندی به‌رزی هه‌رێم. داهێنانی موئه‌سسه‌سه‌ی بيركردنه‌وه‌ (ثينك تانك) پێويسته‌ بۆ ئه‌وه‌ی شاره‌زايان و سياسه‌تمه‌داران سوود له‌ زانياريه‌ ناوه‌كی و ده‌ره‌كيه‌ نهێنی و ئاشكراكان وه‌ربگرن و به‌يه‌كه‌وه‌ به‌ڕژه‌وه‌ندی سه‌ره‌كی هه‌رێم ده‌ستنيشان بكه‌ن، و ئه‌جيندای ئه‌وله‌وياته‌كان دابڕێژن و به‌رنامه‌‌يه‌كی تۆكمه‌ بۆ پياده‌كردنی ئه‌و ئه‌جيندايانه‌ و بۆ به‌ره‌نگاربوونه‌وه‌ی مه‌ترسيه‌كان دابڕێژن.

پێويسته‌ سه‌ركرده‌ بڕيارده‌ره‌كان هه‌موو حيزب و ڕێكخراو و لايه‌نه‌كانی ناو ده‌سه‌لات و ده‌ره‌وه‌ی ده‌سه‌ڵات مولزه‌م بكه‌ن به‌وه‌ی كه‌س بۆی نه‌بێ له‌ ڕێڕه‌و و به‌رنامه‌ی هه‌رێم‌ لابدات وه‌يان له‌ دژی به‌رژه‌وه‌ندی به‌رزی هه‌رێم كاری سياسی ئه‌نجام بدات. دياره‌ كه‌ تا ئێستا مه‌كته‌ب سياسیه‌كان، وه‌يان سه‌رۆك حيزب و ئالقه‌ ته‌سكه‌كانی ده‌وره‌یان، هه‌رخۆيان به‌ كاری ئه‌و جۆره‌ موئه‌سسه‌سه‌يه‌ی بيركردنه‌وه‌ هه‌ڵساون. به‌ڵام ئه‌زموونه‌كان نيشانيان داوه‌ كه‌ ئه‌و سه‌ركردانه‌‌ ته‌نيا له‌ ڕوانگه‌ی به‌رژه‌وه‌ندی ته‌سكی خۆيان و حيزبه‌كانيان به‌رنامه‌يان داڕژتوه‌ و به‌رنامه‌كانيشيان زۆر به‌گران له‌سه‌ر دۆزی ميلله‌ت و چاره‌نوسی بزوتنه‌وه‌كه‌ كه‌وتووه‌. به‌ كه‌ڵتوور، سه‌ركرده‌ ڕۆژهه‌ڵاتيه‌كان هێڵی جياكه‌ره‌وه‌ له‌ نێوان به‌رژه‌وه‌ندی گشتی و تايبه‌ت دروست ناكه‌ن، و به‌ڵكو به‌رژه‌وه‌ندی به‌رزی وڵات به‌ پاشكۆی به‌رژه‌وه‌نديه‌ تايبه‌ته‌كانه‌وه‌ ده‌به‌ستن، له‌جياتی‌ پێچه‌وانه‌‌. خۆ له‌ كه‌ڵتووری سياسه‌تكردن و و شێوازی حوكمڕانی كورديدا، لادان له‌ خه‌تی گشتی و كاركردن له‌ دژی به‌ڕژه‌وه‌ندی به‌رزی هه‌رێم قه‌ت ڕێگه‌ی لێ نه‌گيراوه‌ و خودی سه‌ركرده‌كانيش نه‌يانتوانيوه‌ خۆيان له‌ دژه‌به‌ڕژه‌وه‌نديه‌كان بترازێنن.

ئايا كورد له‌ عيراقدا شه‌ريكه؟‌

سه‌رۆكی هه‌رێم پرسياری عيراقێتی كوردی ئاراسته‌ی نه‌يار و دۆسته‌ عيراقيه‌كان كردوه‌ و ده‌پرسێ ئايا ئه‌وان له‌ عيراقدا كورد به‌ شه‌ريك داده‌نێن؟ هه‌روه‌ها داوای وه‌ڵام دانه‌وه‌ش له‌وان‌ ده‌كات تاوه‌كو كورديش خۆی به‌لايه‌كدا بشكێنێت. به‌ڵام ده‌بێ كورد ئه‌و پرسياره‌ پڕله‌هه‌ڕه‌شه‌يه‌ له‌خۆی بكات و هه‌رخۆيشی وه‌ڵامی خۆی ئاماده‌ بكات. پێويسته‌ كورد له‌ لای خۆيه‌وه‌ ساغی بكاته‌وه‌ ئايا عيراقيه‌ و بۆ عيراق كارده‌كات و له‌ ڕێگه‌ی ده‌ستووری به‌غداوه‌ مافه‌كانی ده‌پارێزێت، وه‌يان كوردستانيه‌ و كار بۆ ده‌وڵه‌تی كوردی ده‌كات و چاوه‌ڕێی فرسه‌تی له‌باره‌ بۆ جيابوونه‌وه‌؟

سه‌ركرده‌كانی كورد تۆمه‌تباركراون كه‌وا له‌ كاتی ته‌نگانه‌ی ناوه‌كی (وه‌ك كێشه‌ی دياله‌ و خانه‌قين)و له‌ قه‌يرانی ده‌ره‌كيدا (وه‌ك له‌شكركێشيه‌كه‌ی توركيا) ئيديعای عيراقپارێزی ده‌كه‌ن و چاوه‌ڕێی هانای به‌غدان، كه‌چی له‌ كاتی باڵاده‌ستيدا كوردستانين و به‌غدا به‌ دراوسێ داده‌نێن. له‌ ڕاستيدا، ئيمڕۆ كورد هيچ چاره‌يه‌كی تری له‌به‌رده‌مدا نيه‌ له‌ غه‌يری عيراقێتی، وه‌ ئه‌گه‌ر به‌ كاروكردار نه‌يسه‌لمێنن كه‌ خۆيان به‌ خاوه‌ن ماڵ و شه‌ريكی عيراق ده‌زانن ئه‌وا ته‌واوی به‌رژه‌وه‌نديه‌ چاره‌نوس سازه‌كانی هه‌رێم ده‌كه‌ونه‌ مه‌ترسيه‌وه‌‌. پێويسته‌ كورد به‌رنامه‌ی عيراقی هه‌بێت و له‌ چوارچێوه‌ی ئه‌و به‌رنامه‌يه‌دا هاوپه‌يمانێتی له‌گه‌ڵ كوتله‌كانی تر ببه‌ستێ. واته‌، چيتر ته‌نيا وه‌ك كوتله‌يه‌كی كوردی ناوچه‌گه‌ر و نوێنه‌ری هه‌رێمێكی بچوك كراوه‌ ڕ‌ه‌فتار نه‌كات.

مافی چاره‌يخۆنوسين له‌ ناو عيراقدا
جێگه‌ی داخه‌ كه‌وا سه‌ركرده‌كانی هه‌رێم له‌ نێوان دوو ئاگری ده‌ستكردی خۆيان سوتاون. نه‌ له‌ عيراقدا عيراقين و نه‌ له‌ هه‌رێمدا خه‌ريكی وڵاتسازين بۆ ئاماده‌باشی تا فرسه‌تی ئاينده‌. له‌ به‌رژه‌وه‌ندی كوردی هه‌رێمدايه‌ كه‌ ئيمڕۆ ته‌ركيز بكاته‌ مسۆگه‌ر كردنی مافی مرۆڤی كورد له‌ چوارچێوه‌ی عيراقێكی ده‌وڵه‌مه‌ندی ديموكراسیدا. ئه‌و ده‌ستووره‌ی ئيستای عيراق، با جارێ كامليش نه‌بووبێ، به‌ڵام هه‌تا دێ وا له‌ سه‌رده‌ستی كورد و پێكهاته‌ جياجياكانی تری عيراقدا ڕووی له‌ كامل بوونه‌. هاوكات كورد ده‌توانێ بناغه‌ی موئه‌سه‌سه‌ی ده‌وڵه‌تی كورد دابنێ به‌بێ ئه‌وه‌ی عيراقيه‌كانی تر بتوانن ڕێگه‌ی لێ بگرن. به‌وه‌ش له‌ لايه‌كه‌وه‌ عيراقيه‌ و عيراق ده‌دۆشێ و مافی بنه‌ڕه‌تی كورد له‌ چوارچێوه‌ی ده‌ستووره‌كه‌يدا مسۆگه‌ر ده‌كات، له‌لايه‌كی تريشه‌و‌ه‌ خه‌ريكی ئاماده‌باشی بێ تاوه‌كو له‌گه‌ل يه‌كه‌مين فرسه‌تدا ده‌وڵه‌تی كوردی دابمه‌زرێنێ.

مه‌سه‌له‌ی مافی چاره‌يخۆنوسينی كورد زۆر گوتراوه‌ و ئيمڕۆ له‌ بيری هه‌موو عیراقيه‌كدا چه‌قيوه‌. بۆيه‌، پێويست به‌ دووپاتكردنه‌وه‌ی به‌رده‌وام ناكات‌. با كاری به‌بيرهێنانه‌وه‌كه‌ بۆ نووسه‌رانی ده‌ره‌وه‌ی ده‌سه‌ڵات لێبگه‌رێن. سه‌ركرده‌كان ده‌توانن له‌ ژێره‌وه‌ هانی ئه‌و جۆره‌ نوسينه‌ بده‌ن، به‌ڵام پێويسته‌ ده‌سه‌لاتداره‌كان به‌ هه‌ستياريه‌وه‌ خۆيان له‌و مه‌سه‌لانه‌ بده‌ن و له‌ قالبی پاراستنی به‌رژه‌وه‌ندی به‌رزه‌وه‌ ته‌سريحه‌كانيان دابڕێژن ‌. خۆ كورد ده‌توانێ له‌ ناو هه‌رێمدا كار بۆ ده‌وڵه‌ت بكات به‌بێ ئه‌وه‌ی ناوی بنێ ده‌وڵه‌تسازيی. هاوكات وا له‌ عيراقيه‌كانی تر بكات كه‌ هه‌ست بكه‌ن به‌وه‌ی هه‌تا عيراق ديموكراتی بێ و مافی كورد بدات ئه‌وا كورد به‌شێكی دانه‌بڕاوه‌ له‌ناو ‌عيراقێكی گرنگ. هه‌ركاتێكيش هه‌ڵوێستی شۆڤێنی زۆرينه‌ی عه‌ره‌ب زيادی كرد و له‌ ديموكرسيه‌ت پاشگه‌ز بووه‌وه‌، ئه‌وا كورد‌ ئاماده‌يه‌ ببێته‌ فاكته‌ری هه‌ژاندن و هه‌ڵوه‌شاندنه‌وه‌ی سيسته‌می عيراق و جيابوونه‌وه‌ی ئه‌به‌دی به‌بێ ئه‌وه‌ی كه‌س بتوانێ گله‌يی لێ بكات.

كشانه‌وه‌ی كورد له‌ به‌غدا
ده‌مێكه‌ كورد وه‌ك كارتێكی فشار باس له‌ كشانه‌وه‌ له‌ حكومه‌تی به‌غدا ده‌كات، به‌ڵام له‌به‌ر فشاری ئه‌مه‌ريكی و ڕه‌چاو كردنی هه‌ندێ لايه‌نی ستراتيژی و هه‌ندێ له‌ به‌رژه‌وه‌نديه‌ تايبه‌ته‌كانی پارتی و يه‌كێتی، ئه‌و كارته‌ی به‌كار نه‌هێناوه‌. دياره‌ كه‌ هه‌تا دێ به‌های ئه‌و كارته‌ و كاريگه‌ريه‌كه‌ی وا كه‌متر ده‌بێته‌وه‌. ئه‌گه‌ر كورد له‌ هاوپه‌يمانێتی شيعه‌ بكشێته‌وه‌، زه‌ره‌ری گه‌وره‌ ده‌كات و ڕه‌نگه‌ ته‌واوی ده‌ستكه‌وته‌كانی پێشتری بكه‌ونه‌ مه‌ترسيه‌وه‌. ڕه‌نگه‌ پۆسته‌ سياديه‌كانی ئێستا و ڕێكه‌وتننامه‌كانی له‌كيس بچێ. خۆ له‌وانه‌يه‌ شيعه‌كان و ئه‌مه‌ريكيه‌كان و ته‌نانه‌ت ئێرانيشی لێ زوير ببێ. بۆيه‌، نابێ كورد وا به‌ ئاسانی په‌نا بباته‌ به‌ر مه‌سه‌له‌ی كشانه‌وه‌ له‌و حكومه‌ته‌ لاوازه‌ی ماليكی. به‌ڵام ئه‌گه‌ر كار گه‌يشته‌ سه‌ر مه‌سه‌له‌ی مان و نه‌مان، واته‌ ئه‌گه‌ر به‌رژه‌وه‌نديه‌ به‌رز و چاره‌نوس سازه‌كانی كورد كه‌وتنه‌ مه‌ترسيه‌وه‌، ئه‌وا پێويسته‌ كورد چاو له‌ شيعه‌ و له‌ ئه‌مه‌ريكيه‌كانيش سوور بكاته‌وه‌ و ئاماده‌ش بێ كه‌ هه‌ڕه‌شه‌كانی بگه‌يه‌نێته‌جێ، و به‌ بێ دوودڵيی له‌ حكومه‌تی ماليكی بكشێته‌وه‌.

ڕاسته‌ له‌و حاله‌ته‌دا كورد زه‌ره‌ر ده‌كات، به‌ڵام شيعه‌كان‌ زه‌ره‌ری گه‌وره‌تريش ده‌كه‌ن. خۆ ئيئتيلافی شيعه‌ی ده‌سه‌ڵاتدار زۆر لاوازتر بووه‌ له‌ جاران. له‌ لايه‌كه‌وه‌ ته‌ياری سه‌دڕ و فه‌زيڵه‌ی لێ تكاوه‌ته‌وه‌ و خه‌ريكه‌ ناڕه‌زايی زياتريش له‌ نێو پێكهاته‌كانی تر په‌يدا ده‌بن، وه‌ك له‌ نێوان باڵه‌كانی حيزبی ده‌عوه‌ په‌يدا بوونه‌. له‌ لايه‌كی تريشه‌وه‌ باڵی سوننه‌ وا به‌هێز ده‌بێت و مه‌ترسی بۆ بنه‌مای حوكمڕانی شيعه‌ په‌يدا ده‌كات. سوننه‌كانی تريش كه‌ ئيمڕۆ له‌ ده‌سه‌ڵاتن، وه‌ك حيزبی ئيسلامی، مه‌ترسی مه‌زنيان له‌ سه‌حوه‌ و كۆنه‌ به‌عسيه‌كان لێ نيشتووه‌. ئيمڕۆ باشترين فرسه‌ته‌ كه‌ كورد ئيعلانی كشانه‌وه‌ له‌ حكومه‌تی ماليكی بكات، به‌ بێ ئه‌وه‌ی جارێ حكومه‌ته‌كه‌ بڕوخێنێ. به‌وه‌، كورد ده‌توانێ كۆنتراكتێكی حوكمڕانی سه‌رله‌نوێ و به‌ مه‌رجی تازه‌وه‌ له‌سه‌ر ماليكی و ئيتيلافی شيعی فه‌رز بكات. ئه‌و جۆره‌ فشاره‌ وا له‌ ئه‌مه‌ريكيه‌كانيش ده‌كات كه‌ سنوورێك بۆ فشاره‌كانی خۆيان له‌سه‌ر كورد دابنێن.

هاوكات، كورد ده‌توانێ مه‌رجی هاوكاری له‌سه‌ر حيزبی ئيسلامی دابنێ و كارێكی وا بكات كه‌ له‌ ئاستی سه‌رۆكايه‌تی كۆمار و ئه‌نجومه‌نی وه‌زيراندا پشتی كورد بگرێ. خۆ سه‌رۆك كۆمار ده‌توانی كه‌ هه‌ردوو جێگره‌كه‌ی ڕازی بكات بۆ ئه‌وه‌ی بڕگه‌ی (ب)ی ماده‌ی ١٤٠ مۆر بكه‌ن و به‌ زووترين كات ته‌وسيات پێشكه‌شی په‌رله‌مان بكه‌ن بۆ ئه‌وه‌ی پانايی ئيداری ناوچه‌ پڕله‌كێشه‌كان دياری بكرێت و زۆری ئه‌و ناوچانه‌ بێنه‌وه‌ سه‌ر كه‌ركوك و سه‌ر هه‌رێم. تا ئێستا له‌ مه‌حزه‌ری هيچ كۆبوونه‌وه‌يه‌كی سه‌رۆك كۆمار و دووجێگره‌كه‌یدا به‌ڵگه‌ی تاوتوێ كردن و ڕێكه‌وتنیان له‌ سه‌ر ئه‌و بڕگه‌ سه‌ره‌كيه‌ ديار نيه‌. پێويسته‌ به‌ لانی كه‌مه‌وه‌ هه‌ڵوێستی هه‌رسێكيان له‌مه‌ڕ مادده‌ی ١٤٠ و بڕگه‌ی (ب)دا بۆ مێژوو دياری بكرێ، تاوه‌كو كورد به‌ڵگه‌ی بێ متمانه‌يی نه‌يار و هاوپه‌يمانه‌كانی ده‌ست كه‌وێ. به‌ڵام دياره‌ كه‌ سه‌رۆك كۆمار و ده‌سه‌ڵاتداره‌كانی كورد له‌ به‌غدا گرنگيان زياتر به‌ دڵڕاگرتنی ئه‌وانه‌ و ڕاكێشانيان داوه‌ له‌وه‌ی كه‌ بيانخه‌نه‌ ژێر فشاره‌وه‌.

لۆبی ده‌ره‌كی

پێويسته‌ حكومه‌تی هه‌رێم كاری ته‌نسيقی لۆبيكردن له‌ به‌غدا و له‌ ناوچه‌ی ڕۆژهه‌ڵاتی ناوه‌ڕاست و له‌ ته‌واوی جيهان بگرێته‌ ئه‌ستۆ و به‌ هه‌ڵمه‌تێكی تازه‌وه‌ جۆش بداته‌ ئه‌و هه‌وڵانه‌ی بۆ ڕاكێشانی دۆستان ده‌درێ. ڕاسته‌ ته‌ركيز و ته‌نسيقی لۆبی كردن له‌ وڵاتانی وه‌ك ئه‌مه‌ريكا و به‌ريتانيا ڕوويان له‌ زياده‌يه‌ و كاری شايان ئه‌نجام دراون، به‌لام هێشتا له‌ ئاستی خوازراودا نين. جارێ هه‌وڵه‌كان كاری هه‌ره‌وه‌زی هه‌مه‌لايه‌نه‌يان پێوه‌ ديار نيه‌. چاوه‌ڕوان ده‌كرێت كه‌وا نه‌ك ته‌نيا پارتی و يه‌كێتی هاوكاری يه‌كتری بكه‌ن، به‌ڵكو پێويسته‌ ته‌واوی كۆمه‌ڵگای كورده‌واری به‌شدار بێ و ڕووی لۆبيكردنيان به‌هه‌مان ئاراسته‌ بێت. لۆبيكردن بۆ نه‌ته‌وه‌يه‌كی بێ ده‌وڵه‌ت پێويستی‌ به‌ به‌شداری سه‌دان هه‌زار، و بگره‌ مليۆنان كوردی هه‌نده‌رانه‌‌ بۆ ئه‌وه‌ی دۆست و نه‌ياره‌كان نه‌توانن بزوتنه‌وه‌كه‌ بخه‌نه پشت گوێ و مافی مرۆڤی كورد بكه‌نه‌ قوربانی به‌رژه‌وه‌نديه‌ ده‌وڵه‌تيه‌كان. ئه‌ركی ڕێكخستن و ته‌نسيق كردنيش بۆ ئه‌و ده‌ره‌نجامه‌ له‌ ئه‌ستۆی نوێنه‌رانی حكومه‌تی هه‌رێمدايه‌.

ڕه‌فتاری كورد له‌ ناوچه‌ پڕكێشه‌كان
سه‌ركرده‌كانی كورد ناڕه‌زايی له‌ بڕياره‌ ديكتاتۆريه‌كانی ماليكی ده‌رده‌بڕن و تاوانی ئه‌و كرژيه‌ی دوايی ده‌خه‌نه‌ ئه‌ستۆ. به‌ڵام له‌ ڕاستيدا، پێويسته‌ كورد به‌خۆی دابچێته‌وه‌ و گله‌يی زياتر له‌خۆی بكات. جارێ مانه‌وه‌ی پێشمه‌رگه‌ (پاسه‌وانی هه‌رێم) له‌ ناوچه‌كانی ده‌ره‌وه‌ی هه‌رێم ناياساييه‌. ڕاسته‌ ماليكی داوای يارمه‌تی له‌ كورد كرد بۆ ئه‌وه‌ی شه‌ڕی تيرۆری بۆ بكات و ناوچه‌ی (دياله)ی بۆ كۆنتڕۆڵ بكات. به‌ڵام كه‌ حكومه‌ت داوای كشانه‌وه‌ی ليوای پێشمه‌رگه‌ی كرد، كورد داواكه‌ی پشتگوێ خست. خۆ هێزی پێشمه‌رگه‌ و ده‌زگا موخابه‌راتی و ئاسايشيه‌كانی كورد له‌ ناوچه‌ پڕكێشه‌كاندا سومعه‌يه‌كی باشيان بۆ خۆيان و بۆ كورد دروست نه‌كردوه‌. كاريان بێ ته‌نسيقه‌ و به‌ فه‌رمانی حيزبی (نه‌ك حكومه‌تی هه‌رێم) كار ده‌كه‌ن و له‌ ڕ‌‌ه‌فتاری گه‌نده‌ڵيی و ناياساييدا به‌ڕه‌ڵڵاييان پێوه‌ دياره و له‌ كاتی كرژيشدا هه‌ڵوێستی نه‌ژادپه‌رستانه‌يان له‌ هی نه‌ياره‌كان خراپتره‌‌. له‌جياتی ئه‌وانه‌ پێويسته‌‌ كورد پڕۆژه‌ی به‌ديموكراسيكردنی عيراقی (بۆ كورد و غه‌يره‌ كورد) هه‌بێ، و به‌رنامه‌ی گه‌شه‌پێدانی كه‌لتوری و خزمه‌تگوزاری شاره‌كانی هه‌بێ بۆ ئه‌وه‌ی دڵی كورد و غه‌يره‌ كورده‌كانی پێ ڕاكێشی.
ته‌ركيزی كورد زياتر له‌ سه‌ر ناوچه‌‌كانی ده‌سه‌ڵات (هه‌ولێر و به‌غدا) و ناوچه‌ ئابووریه‌ پڕكێشه‌كانه (وه‌ك كه‌ركوك و خانه‌قين)‌. كه‌چی ژماره‌يه‌كی زۆری كوردی ده‌ره‌وه‌ی هه‌رێم له‌ شارو دێهاته‌كانی ده‌ره‌وه‌ی چه‌قه‌كانی ده‌سه‌ڵات و ئابووری ده‌ژين، هه‌ر له‌ موسڵ و دياله‌وه‌ بگره‌ هه‌تا ده‌گاته‌ به‌غدا و به‌سڕه. پێويسته‌ حيزبه‌ كورديه‌كان به‌رنامه‌ و ستراتيژيه‌تی نه‌ته‌وه‌ييان بۆ ئه‌و كوردانه‌ش هه‌بێ، نه‌ك ته‌نيا بۆ كوردی هه‌رێم و ناوچه‌ پڕكێشه‌كان.

پێشمه‌رگه‌كان كێن؟

ئيمڕۆ پێناسه‌ی پێشمه‌رگه‌ بووه‌ته‌ مايه‌ی سه‌رلێشێوان و بگره‌ ئيحراج بوون. جارێ له‌ نێوان "پاسه‌وانی هه‌رێم" و "هێزی فه‌رمانده‌" و "چه‌كداری حيزب" و "پاسه‌وانی مه‌سئوله‌كان"، حيسابه‌كان وون بوون. ديار نيه‌ ئايا كێ سه‌ر به‌ وه‌زاره‌تی پێشمه‌رگه‌يه‌، كاميان سوپايه‌، و كاميان ميليشيايه‌. خۆ له‌ ڕووی داراييه‌وه‌، سه‌رچاوه‌ی مووچه‌كان تێكه‌ڵن و له‌ ڕووی وه‌لائيشه‌وه‌ هه‌ريه‌كه‌يان ڕووی له‌ قيبله‌يه‌كی جيايه‌. ئه‌و ئاڵۆزی و به‌ڕه‌ڵاييه‌ نه‌ك ته‌نيا كێشه‌كانی ده‌سه‌ڵات و ئيداره‌ و بودجه‌ی له‌ هه‌رێم ئاڵۆز كردوه‌، به‌ڵكو بيانووی داوه‌ته‌ به‌غدا كه‌ حيسابی ميليشيايه‌كی ئه‌ناركيستی وه‌ك (له‌شكری مه‌هدی) و (مه‌جاليسی ئه‌لسه‌حوه‌) بۆ پێشمه‌رگه‌ بكرێ. ئايا پێويسته‌ ناوی پێشمه‌رگه‌ له‌‌ پاسه‌وانی هه‌‌موو مه‌سئولێك و هه‌موو سه‌رباز و چه‌كدارێكی كورد بنرێت. كوردستان له‌ حاله‌تی شۆڕشدا نيه‌ و ئيمڕۆ له‌ سه‌رده‌می حوكمڕانيدا پێويستی به‌ له‌شكرێكی نيزامی و هێزی پۆليسه‌، نه‌ك هێزی پێشمه‌رگه‌.

باشترين شێوه بۆ ئه‌وه‌ی ناوی پێشمه‌رگه‌ به‌ پيرۆزی بپارێزرێت ئه‌وه‌يه‌ كه‌ ته‌نيا بۆ سه‌ربازه‌ نيزاميه‌كانی سه‌ر به‌ وه‌زاره‌تی به‌رگری به‌كار بێت. باشترين خزمه‌تيش بۆ بزوتنه‌وه‌ی كورد ئه‌وه‌يه‌ كه‌ له‌شكره‌ نيزاميه‌كه‌ی (پێشمه‌رگه‌كه‌ی) له‌ ئاستێكی به‌رزی ڕاهێناندا بێ و به‌ نوێترين چه‌ك و تۆكمه‌ترين هه‌يكه‌لی ڕێكخراویه‌وه‌ پته‌و بكرێ. هيچ به‌ڵگه‌يه‌ك نيه‌ كه‌ بيسه‌لمێنێ كه‌وا ئاستی ئاماده‌باشی هێزی پێشمه‌رگه‌ی كوردستان ئيمڕۆ به‌ ڕاده‌يه‌كه‌ كه‌ به‌ری هێرشی سوپای عيراقی بگرێت، چی جای هێرشی ده‌وڵه‌ته‌ دراوسێكان. بۆيه‌ ساغ كردنه‌وه‌ی مه‌سه‌له‌ی پێشمه‌رگه‌ و بودجه‌ی پێشمه‌رگه‌ و ڕێكخستنی ئيداری و عه‌سكه‌ری هێزی چه‌كداری هه‌رێم مه‌سه‌له‌يه‌كی چاره‌نوس سازه‌ و پێويسته‌ ئه‌وله‌ويه‌تی پێ بدرێت.

چاكسازی و ده‌وڵه‌تسازيی

له‌ ئێستا و ئاينده‌دا، مه‌حاڵه‌ كورد بتوانێ له‌ گه‌مه‌ ئاڵۆزه‌كه‌ی سياسی عيراقی و ڕۆژهه‌ڵاتی ناوه‌ڕاست و ئاستی جيهانيدا حيسابی ياريكه‌رێكی جيددی بۆ بكرێ وه‌يان تێدا به‌ براوه‌ لێی ده‌ربچێ. به‌بێ ئه‌وه‌ی هه‌رێم پته‌و بێ و موئه‌سسه‌ساتی بێ و خه‌لكی هه‌رێم له‌ حوكمی سه‌ركرده‌كان ڕازی بێ، كارتی هه‌ڕ‌‌ه‌شه‌ی كوردی قه‌ت به‌ هێز نابێ. دوژمنانی كورد قوماريان له‌سه‌ر شلۆقی ئيداره‌ی هه‌رێم و بێ ته‌ركيزيی سه‌ركرده‌كان و به‌رژه‌وه‌ندیپه‌رستێتی بڕيارده‌ره‌كانه. نه‌ياره‌كان ئه‌و فاكته‌رانه‌يان به‌ سه‌ركه‌وتويی ئيستيغلال كردوه‌. هه‌ركاتێك لايه‌نی عيراقی بيه‌وێ فشار بخاته‌ سه‌ر سه‌ركرده‌كانی كورد بۆ ئه‌وه‌ی سازشيان پێ بكات، ئه‌وا مه‌سه‌له‌ی داهاتی گومرگ و كۆنتراكتی ناياسايی نه‌وت و به‌فيڕۆبردنی بودجه‌ و بوونی " ميليشيای" پێشمه‌رگه‌ دێنێته‌ سه‌رمێز، و به‌ هۆيانه‌وه‌ پاشه‌كشه‌ به‌ سه‌كرده‌كانی كورد ده‌كات. پێويسته‌ سه‌ركرده‌كان دووربين بن و قوربانی به‌ به‌رژه‌وه‌نديه‌ هه‌نووكه‌يی و تايبه‌ته‌كان بده‌ن و به‌ سه‌بره‌وه‌ سه‌يری ئه‌و ئاينده‌يه‌ بكه‌ن كه‌ هه‌رخۆيان پێش ميلله‌تيان تێيدا سوودمه‌ند ده‌بن. پێويسته‌ به‌ شه‌فافيه‌تی داراييه‌وه‌ و به‌ متمانه‌ی به‌ڵگه‌ی زه‌قه‌وه‌ بكه‌ونه‌ شه‌ڕه‌ گفتوگۆ له‌گه‌ڵ به‌غدا و بكه‌ونه‌ شه‌ڕه‌لۆبی له‌ لای زلهێز. ئيمڕۆ له‌لای زلهێز و وڵاته‌ ئه‌وروپاييه‌كان و بگره‌ دۆسته‌ دێڕينه‌كانی كورد، حوكمڕانيی كوردی مايه‌ی سوخريه‌يه‌ و مه‌شخه‌ڵی لۆبی كردنی لێ كوژاوه‌ته‌وه‌.

ڕێڕه‌وی پاپۆڕی هه‌رێم

زنجيره‌ ده‌ستكه‌وت و سه‌ركه‌وتنه‌كانی يه‌كه‌م سێ ساڵی دوای ڕوخانی ڕژێم جۆره‌ سه‌رخۆشيه‌كی سياسی هێنايه‌ كايه‌وه‌ و باری ده‌روونی سه‌ركرده‌كانی كوردی گه‌يانده‌ ئاستی زيده‌ دڵنيايی، وه‌ك بڵێی له‌مه‌ودوا به‌ هۆی هاوكاری ئه‌مه‌ريكی و ڕۆڵی نێوده‌وڵه‌تیه‌وه‌، هه‌رێمی كوردستانی باشوور حيسابی ده‌وڵه‌تی بۆ ده‌كرێت. كه‌چی له‌ گه‌رمه‌ی سه‌ركه‌وتنه‌كاندا، پێشبينی كردن له‌ قه‌يرانه‌ يه‌ك له‌دوای يه‌كه‌كانی ئێستای هه‌رێمی كوردستان و داهاتنی قۆناخی پاشه‌كشه‌ی كورد له‌ عيراقدا، كارێكی ئاسان بوو. بۆيه‌ خه‌ڵكی كوردستان چاوه‌ڕوان بوو كه‌ سه‌ركرده‌كان هه‌موو توانا و هيممه‌تی هه‌ره‌وه‌زیان بخه‌نه‌ گه‌ڕ، وه‌ به‌ هونه‌ر و زانستێكی سه‌رده‌ميانه‌ پاپۆڕی هه‌رێم له‌ زونگاوی عيراقدا به‌ ئاڕاسته‌ی ڕزگاربوون لێخوڕن. دياره‌ كه‌ ئه‌وه‌يان نه‌هاته‌ دی. له‌ جياتيان سه‌ركرده‌كان به‌ شێوازی كلاسيكی كوردانه‌ خه‌ريكی سياسه‌تی كاردانه‌وه‌ و پاراستنی به‌رژه‌وه‌ندی تايبه‌ت بوون، بۆيه‌ش ڕێڕه‌وی پاپۆڕی هه‌رێم وا له‌ گێژاوكی حه‌له‌زۆنیدا سه‌ربه‌ره‌وخوار ڕووی له‌ نقومبوونه‌‌.

خه‌ريكه‌ قه‌يرانه‌ ناوه‌كيه‌كان و پاشه‌كشه‌ ده‌ره‌كيه‌كان ته‌می كه‌ئابه‌يه‌كی سه‌رتاسه‌ريی به‌سه‌ر كوردستاندا دێنن. زۆرينه‌ی خه‌لكی هه‌رێم بێ چاره‌ و داخله‌دڵ چاوه‌ڕێی ده‌ستی قه‌ده‌ره‌‌، و بايی ئه‌وه‌نده‌ ڕقی هه‌ڵساوه‌ كه‌ ئاماده‌يه‌ له‌ هه‌ڵبژاردنی داهاتوودا سزای پارتی و يه‌كێتی و سه‌ركرده‌كانيان بدات. ئه‌گه‌ر له‌وماوه‌ كورته‌ی له‌به‌رده‌مدايه‌، سه‌ركرده‌كانی بڕيارده‌ره‌كانی كورد به‌خۆ نه‌كه‌ون و به‌ دووده‌نگی ميلله‌ت نه‌يه‌ن و وڵاتپه‌رستانه‌ به‌ره‌نگاری ڕووداوه‌ ترسێنه‌ره‌كان نه‌بنه‌وه‌، ئه‌وا به‌بێ گومان گورزێكی مه‌چه‌كشكێنتر به‌ بزوتنه‌وه‌ی كورد ده‌كه‌وێ. ئه‌گه‌ر گله‌يی گورزه‌كانی پێشتر له‌ دوژمن كرابن، ئه‌وجاره‌يان ده‌بێ گله‌يی دۆڕان له‌ سه‌ركرده‌ بڕيارده‌ره‌كان بكرێ.

گه‌وره‌ ئاو ده‌ڕژێنێ و گچكه‌ پێی لێ ده‌خشێنێ

له‌وه‌ ده‌چێ كه‌ قه‌يرانه‌كانی ئيمڕۆی كوردستان له‌ ئاينده‌دا گه‌وره‌تر و تێكهه‌ڵكێشراوتر ببن. له‌جياتی حكومه‌ت و سه‌ركرده‌كان‌، وا خه‌ڵكی نووسه‌ر و ڕۆشنبير بابه‌ته‌ مه‌ترسيداره‌كان تاوتوێ ده‌كه‌ن و بير له‌ ڕێگاچاره‌كان ده‌كه‌نه‌وه‌ و به‌ نوسراوی پێشنيازه‌كان ده‌خه‌نه‌ به‌رده‌م بڕيارده‌ره‌كان. ڕه‌خنه‌ زۆر گيراوه‌ و زۆريش بڵاو كراوه‌ته‌وه‌. فشاری خه‌ڵكی كوردستان، شان به‌ شانی ئافه‌ته‌ ناوه‌كی و ده‌ره‌كيه‌كان، ڕووی له‌ زياد بوونه‌. به‌لام له‌گه‌ڵ ئه‌و هه‌موو فشار و ده‌نگ ده‌ربڕينه‌ی ميلله‌ت، كه‌چی هێشتا به‌ڵگه‌ی زيندوو نيه‌ كه‌ بيسه‌لمێنێ كه‌وا سه‌ركرده‌كانی كورد ده‌ردی خه‌ڵك و ڕه‌خنه‌ و فشاره‌كان به‌ جيددی وه‌رده‌گرن. به‌ڵكو له‌جياتيان، ده‌سه‌ڵاتی كوردی به‌بێ منه‌ت و به‌بێ ترس ڕووبه‌ڕووی ڕه‌خنه‌كان بووته‌وه، و كه‌وتۆته‌ تۆقاندنی نووسه‌ر و ڕۆشنبيران، و به‌و جۆره‌ ده‌ستی گه‌نده‌ڵيی و وڵات تێكدانی به‌ڕه‌ڵا كردوه‌‌.

كه‌ڵتووری ميلله‌ت، به‌چاك يان به‌ خراپ، له‌ ڕێگه‌ی سه‌ركرده‌وه‌ دروست ده‌بێ وه‌يان ده‌گۆڕێت. هه‌تا دوو سه‌ركرده‌ بڕيارده‌ره‌كه‌ی پارتی و يه‌كێتی بڕياری چاره‌نوس ساز نه‌ده‌ن و ده‌ست به‌ پڕۆسه‌ی وڵاتسازی نه‌كه‌ن، كه‌ڵتوور‌ی گه‌نده‌ڵی و وڵاتكاول كردن له‌ هه‌رێمدا‌ هه‌ر به‌رده‌وام ده‌بێ.

ئيمڕۆ سه‌ركرده‌ بڕيارده‌ره‌كانی كورد ده‌توانن ياسا سه‌روه‌ركه‌ن و ميلله‌ت له‌ ژێر سايه‌ی دادوه‌ری كۆمه‌ڵايه‌تی په‌روه‌رده‌ بكه‌ن. نيه‌تچاكی سه‌ركرده‌كان بۆ وڵاتسازی و به‌ره‌وپێشه‌وه‌بردنی هه‌رێم له‌و بڕياره‌وه‌ ده‌ست پێ ده‌كات كه‌ دوو سه‌ركرده‌‌ لوتكه‌ييه‌ بڕيارده‌ره‌كه‌ی پارتی و يه‌كێتی ده‌يده‌ن. ده‌بێ له‌ خۆيانه‌وه‌ ده‌ست پێ بكه‌ن و كه‌لتووری ياسا سه‌روه‌ركردن دابهێنن و به‌ ئيسڕاڕه‌وه‌ به‌دوای پياده‌كردنی به‌رنامه‌ی ڕزگاركردنی بزوتنه‌وه‌ و دامه‌زراندنی بناغه‌ی ده‌وڵه‌ت بكه‌ون. ئه‌وكاته‌ی سه‌ركرده‌كان ڕێز له‌و ياسايه‌ ده‌گرن كه‌ خۆيان دايده‌نێن و ده‌بنه‌ نموونه‌ی جێبه‌جێكردنی ئه‌و جۆره‌ فه‌رمانانه‌ی كه‌ هه‌ر خۆيان ده‌ری ده‌كه‌ن، ئه‌وكاته‌ ڕه‌عيه‌ی بێ ده‌سه‌ڵات و چاولێكه‌ر چاری نيه‌ له‌ غه‌يری ڕيزگرتن له‌ ياسا و به‌جێگه‌ياندنی فه‌رمان. واته‌ پڕۆسه‌ی گۆڕينی كه‌ڵتووری پڕ له‌ كه‌مته‌رخه‌می و گه‌نده‌ڵيی و به‌ڕه‌ڵلايی و ياساشكێنی له‌ كوردستاندا، به‌ شێوازی سه‌ربه‌ره‌وخوار ده‌ست پێ ده‌كات و كه‌ ده‌ستی پێ كرد زۆر به‌ خێرايی ئه‌نجام ده‌درێ.

دواووشه‌

له‌و دواييه‌، باس له‌ هه‌ڵه‌ی ستراتيژی سياسی سه‌ركرده‌كان زۆر كراوه‌ و پێشنيازی هه‌مه‌جۆر بۆ چاكردنه‌وه‌ی بارودۆخ خراوه‌ته‌ به‌رده‌م، به‌ڵام زۆربه‌ی ئه‌و نوسين و پێشنيازانه‌ به‌ر بای شه‌ماڵ كه‌وتوون و كاريان پێ نه‌كراوه‌. ئه‌و وتاره‌شيان هه‌وڵێكه‌، سه‌ره‌ڕای بێ ئومێدی، به‌ مه‌به‌ستی دياريكردنی ڕێڕه‌وی سياسه‌تی هه‌رێم له‌ عيراقی نوێدا و به‌ ئامانجی پساندنی زنجيره‌ی پاشه‌كشه‌ و قه‌يرانه‌كان. له‌وانه‌يه‌ ڕه‌خنه‌ و پێشنيازه‌كانی ناو ئه‌و وتاره‌ وه‌ك ئه‌وانه‌ی نوسه‌رانی پێشتر و دواتر، له‌ لايه‌ن سه‌ركرده‌كانه‌وه‌ پشتگوێ بخرێن. به‌ڵام تروسكه‌ هيوايه‌ك هه‌رماوه‌ كه‌وا ڕه‌نگه‌ سه‌ركرده‌كانی ئيمڕۆ يان ئه‌وانی ئاينده‌ بۆ ڕزگاركردنی هه‌رێم سوديان لێ وه‌ربگرن. كاره‌ساتی ميلله‌ت له‌و ڕۆژه‌وه ده‌ست پێده‌كات كه‌ سه‌ركرده‌كان تا ڕاده‌ی بايی بوون بێباك ده‌بن و تا ڕاده‌ی توندڕه‌وی بێ منه‌ت ده‌بن، به بێ به‌زه‌يی ده‌كه‌ونه‌ گيانی نووسه‌ر و ڕۆشنبير و ڕه‌خنه‌گران. ئه‌و ڕه‌فتارانه‌يش ته‌نيا بێ ئومێدی و ڕق هه‌لسانی خه‌لكی لێ په‌يدا ده‌بێت. ترسی گه‌وره‌ له‌وه‌دايه‌ كه‌ پڕۆسه‌ی ده‌نگدانی ئاينده‌ به‌ردبارانی به‌دوادابێت.

Wednesday 10 September 2008

زنجيره‌ قه‌يرانه‌كانی كورد و به‌رنامه‌ی ڕزگاربوون

تێڕوانينی ستراتيژی و به‌رنامه‌ی ڕزگاربوون له‌ قه‌يرانه‌ يه‌ك له‌دوای يه‌كه‌كان

به‌شی يه‌كه‌م: مه‌ترسيه‌كانی ئاينده‌ و ستراتيژيه‌تی كورد له‌ عيراقدا
هاوڵاتی ژماره‌ ٤٥٦ ، ڕۆژی ١٠/۹/٢٠٠٨ لاپه‌ڕه‌ ٥
پڕۆفيسۆر دلاوه‌ر عه‌بدولعه‌زيز عه‌لائه‌ددين

له‌و دواييه‌، بزوتنه‌وه‌ی كوردی باشوور له‌ عيراقدا دووچاری زنجيره‌ قه‌يران و پاشه‌كشه‌یه‌كی چاره‌نوس سازی وا بووه‌‌ كه‌ به‌ هۆيه‌وه‌ ڕێڕه‌وه ستراتيژه‌كه‌ی هه‌ڕێم كه‌وتۆته‌ به‌ر پرسياره‌وه‌. ده‌سه‌لاتداران له‌ هه‌موو ڕۆژانێكی تر زياتر پێويستيان به‌ لێكۆڵينه‌وه‌ و بيركردنه‌وه‌يه‌‌ بۆ ئه‌وه‌ی ڕێڕ‌‌ه‌وی هه‌رێم له‌ عيراقی تازه‌دا دياری بكه‌ن و زانايانه‌ به‌رنامه‌ی ڕزگاربوون دابڕێژن و هه‌تا ڕۆژی چه‌سپانی مافه‌ بنه‌ڕه‌تيه‌كانی مرۆڤی كورديش پابه‌ندی ببن.

ئه‌و وتاره‌ دووبه‌شيه‌ هه‌وڵێكه‌ بۆ تاوتوێ كردنی هۆ و فاكته‌ره‌ بنه‌ڕه‌تيه‌كانی قه‌يرانه‌ ناوه‌كی و ده‌ره‌كيه‌كان. له‌و به‌شه‌ی يه‌كه‌مدا، كاريگه‌ری ڕووداوه‌كانی ئه‌و دواييه‌ی عيراق و مه‌ترسی گۆڕانی پارسه‌نگی هێزه‌ كاريگه‌ره‌كان شی كراونه‌ته‌وه‌، و كه‌موكوڕيه‌كانی ستراتيژيه‌ت و به‌رنامه‌ی كوردی ده‌ست نيشان كراون. له‌ به‌شی دووه‌می وتاره‌كه‌دا (له‌ هه‌فته‌ی داهاتوودا)، چۆنێتی وه‌رچه‌رخانی ڕێڕه‌و و دۆزينه‌وه‌ی ڕێگاچاره‌كان به‌پێی لۆژيك و هونه‌ری سياسه‌تكاری سه‌رده‌م پێشنياز كراون.‌

عيراقی نوێ و فرسه‌تی سه‌رفرازيی

له‌ دوای شه‌ڕی ڕزگاركرنی عيراق، كورد و شيعه‌ی عه‌ره‌ب به‌ ته‌وژمه‌وه‌ به‌ره‌و به‌غدا كشان و ڕۆڵی پێشڕه‌ويان له‌ دروستكردنی عيراقی نوێ بينی. هه‌رچی عه‌ره‌بی سوننه بوون، به‌تايبه‌تی به‌عسيه‌ توندڕه‌و‌ و قه‌وميه‌ نه‌ژادپه‌رسته‌كان، ڕێڕه‌وی پڕهه‌ڵه‌یان گرته‌به‌ر و له‌ گێژاوكی خوێناوی تيرۆريزمدا كه‌وتنه‌ مه‌له‌ كردن. كه‌وتنه‌ دژايه‌تی كردنی زلهێزی ئه‌مه‌ريكی و پڕۆسه‌ی به‌ديموكراسی كردنی عيراق. ئه‌و چه‌ند گروپه‌ سوننه‌مه‌زهه‌به‌ بچووكانه‌یش كه‌ له‌ پڕۆسه‌ی ديموكراسی و هه‌ڵبژاردنه‌كانی ٢٠٠٥دا به‌شداريان كرد، كه‌مينه بوون و نه‌يانتوانی بۆشايی مه‌رجه‌عيه‌ت پڕ بكه‌نه‌وه‌.

شيعه‌ی عيراق بۆ پێكهێنانی حكومه‌ت و داڕێژتنی ده‌ستوور و ده‌ستبه‌سه‌رداگرتنی چاره‌نوسی وڵاته‌كه‌ پێويستیان به‌ هاوپه‌يمانێتی كوردی بوو. به‌ هه‌مان شێوه‌، ئيداره‌ی ئه‌مه‌ريكی بۆ ئه‌نجامدانی ئه‌جيندا عيراقيه‌كه‌ی، له‌ چه‌ندين لاوه‌ پێويستی به‌ هاوكاری كورد بوو. ئه‌وانه‌ فرسه‌تی زێڕين بوون بۆ گواستنه‌وه‌ی خه‌باتی كورد بۆ ئاستێكی به‌رزتر و وه‌ده‌ستهێنانی به‌شێك له‌ مافه‌خوراوه‌كانی كورد. خۆشبه‌ختانه‌، كورد له‌و ماوه‌يه‌دا له‌ ڕووی سياسی و عه‌سكه‌ری و جه‌ماوه‌ريه‌وه‌ باڵاده‌ست و يه‌كخيتاب بوو، و به‌هۆيانه‌وه‌ سه‌ركرده‌كانی كورد توانیان له‌ چه‌ندين سه‌نگه‌ره‌وه‌ ده‌ست له‌ نه‌ياره‌كان بوه‌شێنن و مافه‌ بنه‌ڕه‌تيه‌كانی كورد له‌ ده‌ستووردا جێگير بكه‌ن، و پۆستی سه‌رۆك كۆمار و پۆستی گرنگی وه‌زاری وه‌ربگرن، وه ڕێژه‌ بودجه‌يه‌كی گه‌وره‌تر له‌ ڕێژه‌ی دانيشتوانی هه‌رێم مسۆگه‌ر بكه‌ن. ئه‌وانه‌ و ده‌يان ده‌ستكه‌وتی تر مايه‌ی ده‌ستخۆشی بوون. دياره‌ كه‌ ئه‌ركی مسۆگه‌ر كردنی ده‌ستكه‌وته‌كان قورس بوو، به‌ڵام به‌ڵگه‌نه‌ويسته‌ كه‌ ئه‌ركی پاراستن و گه‌شه‌پێدانيان قورستريشه‌، به‌تايبه‌تی له‌ ڕوانگه‌ی لاسه‌نگ بوونی پارسه‌نگی هێزه‌كان به‌ هۆی هه‌ڵسانه‌وه‌ی عه‌ره‌بی سوننه‌ و لاواز بوونی پێكهاته‌كانی ناو هاوپه‌يمانێتی كورد و شيعه‌.

هه‌ڵسانه‌وه‌ی سوننه‌

له‌و يه‌كدوو ساڵه‌ی دواييدا، سوننه‌ی عه‌ڕه‌ب به‌ يارمه‌تی ئه‌مه‌ريكا و حكومه‌تی به‌غدا توانیان چاره‌نوسی خۆیان وه‌ربچه‌رخێنن و ئيمڕۆ به‌ ئومێدن كه‌ له ئاينده‌يه‌كی نزيكدا به‌ ئاماده‌باشيه‌كی سياسی و عه‌سكه‌ری مه‌زنه‌وه‌ بێنه‌ ناو گۆڕه‌پان. تيرۆريسته به‌عسيه‌‌كان خۆيان له‌ ئه‌لقاعيده‌ جيا كردۆته‌وه‌ و له‌ دوای شه‌ڕێكی خوێناوی دژبه‌ ئه‌ڵقاعيده‌دا‌، ئارامی له‌ ناوچه‌كانيان خه‌ريكه‌ سه‌قامگير ده‌بێ. ئه‌وانه‌ به‌ نيازن له‌ هه‌ڵبژاردنه‌كاندا به‌ گوڕ و ته‌وژمه‌وه‌ به‌شداری له‌ ده‌نگدان بكه‌ن و ژماره‌ موسته‌هه‌قه‌كه‌ی خۆيان له‌ په‌رله‌مانتاران مسۆگه‌ر بكه‌ن.

عه‌ره‌به‌ سوننه‌كان، ده‌وڵه‌تی‌ عيراق به هی خۆيان ده‌زانن وه‌ به‌ ڕه‌وت و سروشتيش له‌ دژی ئێرانن، بۆيه‌ له‌مه‌ودوا ئه‌مه‌ريكيه‌كان و ده‌وڵه‌ته‌ عه‌ره‌بيه‌كان گرنگيه‌كی تايبه‌تيان پێ ده‌ده‌ن و پشتيان بۆ لاوازكردنی نفوزی ئێرانی پێ ده‌به‌ستن. به‌شێكی ئه‌و گرنگی پێدانه‌ش بێ گومان له‌سه‌ر حيسابی كورد ده‌بێت. جا هه‌ر له‌ سه‌ندنه‌وه‌ی پۆسته‌ سه‌ره‌كيه‌كانی به‌غدا و ڕێژه‌ به‌رزه‌كه‌ی بودجه‌وه‌ بگره‌ هه‌تا ده‌گاته‌ سه‌ر مه‌سه‌له‌ی‌ كه‌ركوك و ناوچه‌ سنووريه پڕله‌كێشه‌‌كان.

سوننه‌كان دراوسێی مێژوويی كوردن و له‌ ناوچه‌ سنووريه‌كاندا له‌گه‌ڵ كورد تێكه‌ڵن. ئه‌وانه‌ تێياندايه‌ دۆسته‌ و هه‌يانه‌ دوژمنه‌، به‌ڵام له‌ كۆنه‌وه‌ شه‌ڕه‌به‌رژه‌وه‌ندی و سياسه‌تی داگيركه‌رانه‌ی حكومه‌ته‌ عيراقيه‌كان و كاردانه‌وه‌ی كورد، گرژی له‌نێوانياندا به‌رده‌وام كردوه‌. عه‌ره‌به‌ سوننه‌كان خۆيان به‌ لاواز نازانن و له‌ ناوچه‌ هاوبه‌شه‌كاندا كاريان له‌ كورد ئاڵۆز كردوه‌. ئه‌و (١٤٥) هه‌زار چه‌كداره‌ی سه‌ر به‌ (مه‌جاليسی ئه‌لسه‌حوه‌)ش كه‌ ئاماده‌ن بێنه‌ ناو سوپا و پۆليسی عيراقيه‌وه، له‌ ناوچه‌ سنوريه‌كانيان و له‌ پايته‌ختیشدا‌ ده‌بنه‌ پاڵپشتی مه‌رجه‌عه‌ نه‌ته‌وه‌په‌رسته‌كانيان. له‌مه‌ودوا سه‌ركرده‌كانی سوننه‌ كارتی ئه‌لقاعيده‌ و په‌يوه‌نديه‌ تازه‌ ئه‌مه‌ريكیه‌كانيان به‌كار ده‌هێنن بۆ ئه‌وه‌ی نفوزی كوردی كه‌م بكه‌نه‌وه‌ و ده‌سه‌ڵاتی حوكمڕانی ناوچه‌ی موسڵ و شه‌نگار و ده‌وروبه‌ری كه‌ركوك و دياله‌ به‌لای خۆياندا بشكێنن. له‌ ڕێگه‌ی ده‌نگدانيشه‌وه‌ نه‌ك ته‌نيا ڕۆڵی سوننه‌ موفليسه‌كانی وه‌ك (موتله‌گ و عله‌ييان) ناهێلن، به‌ڵكو ته‌نگ به‌ حيزبی ئيسلاميش هه‌ڵده‌چنن و پۆستی سياديان لێ ده‌ستێننه‌وه‌. وا له‌ئێساوه‌ پێشبينی له‌وه‌ ده‌كرێ كه‌وا له‌ خولی داهاتووی په‌رله‌ماندا، سوننه‌ی عه‌ره‌ب به‌ جه‌خته‌وه‌ داوای پۆستی سه‌رۆك كۆماريه‌تی ده‌كات. ئه‌و پۆسته‌ گرنگه‌ به‌ هيچ عورفێك مافێكی پارێزراوی كورد نه‌بووه‌ و له‌سه‌ر كورديش تاپۆ نه‌كراوه‌. خۆ يه‌كه‌م سه‌رۆك كۆماری عيراق (غازی ئه‌لياوه‌ر) بوو، كه‌ عه‌ره‌بێكی‌ سوننه‌ بوو. وه‌ به‌خشينی پۆسته‌كه‌ به‌ مام جه‌لال تاله‌بانی له‌دوای هه‌ڵبژاردنه‌كاندا له‌ ئه‌نجامی ڕێكه‌وتنێكی سياسی كاتی بوو، وه‌ په‌يوه‌نديدار بوو به‌ هه‌يبه‌ت و قورسايی سياسی و ڕۆڵی عيراقپارێزيی خودی تاله‌بانی به‌ پله‌ی يه‌كه‌م، وه‌ به‌ ويستی ئه‌مه‌ريكی و ته‌بايی خيتابی كوردی به‌ پله‌ی دووه‌م. بۆيه‌، له‌ دوای تاله‌بانی و له‌ دوای هه‌ڵبژاردنی داهاتوو، زۆر زه‌حمه‌ته‌ پۆستی سه‌رۆك كۆمار وه‌يان هه‌رپۆستێكی سيادی تری (وه‌ك وه‌زيری ده‌ر‌ه‌وه‌) بدرێته‌ كورد. له‌و حاڵه‌ته‌شدا بۆشاييه‌كی مه‌زن له‌ نفوزی كورد له‌ به‌غدا په‌يدا ده‌بێت و باڵی عيراقپه‌رسته‌كان زاڵ ده‌بێت.

كورد و شيعه:‌ كاميان عيراقيتره‌؟

كورد له‌ سه‌رده‌می ئۆپۆزيسيۆنه‌وه‌ تا ئێره‌ پشتی به‌ هاوده‌ردێتی و هاوپه‌يمانێتی شيعه‌ی عيراقی به‌ستبوو. به‌ڵگه‌نه‌ويسته‌ كه‌ هه‌روه‌ك چۆن كورد به‌ پله‌ی يه‌كه‌م كورده‌ و هه‌رێميه‌ ئه‌وجا عيراقيه‌، شيعه‌كانيش وه‌لائيان بۆ هاومه‌زهه‌به‌كانيان و هه‌رێمه‌كانيان‌ پێشی وه‌لائيانه‌‌ بۆ عيراقێك‌ كه‌ تێيدا له‌ ڕۆژی كوشتنی ئيمامی حوسه‌ينه‌وه‌ تا ڕووخانی سه‌ددام بنده‌سته‌‌ی سوننه‌ بوونه‌. ئه‌و هاوپه‌يمانێتیه‌ی كورد و شيعه‌ تا ڕاده‌يه‌كی زۆر به‌رهه‌می بۆ هه‌ردوولا هه‌بووه و به‌هۆيه‌وه‌ گورزی مه‌زن له‌ هێزی عه‌ره‌بی سوننه‌‌ دراوه‌ و مه‌ودا عه‌ره‌بيه‌‌كه‌ی عيراقيش خاو كراوه‌ته‌وه‌. به‌ڵام له‌ سايه‌ی ديموكراسيه‌تی په‌رله‌مانيدا، عه‌ره‌بی شيعه‌، كه‌ زۆرينه‌ی دانيشتوانه‌، ته‌واوی عيراق به‌ هی خۆی ده‌زانێ‌.

سه‌ره‌ڕای ڕه‌وتی فيدراليزمی خێزانی ئه‌لحه‌كيم، بيركردنه‌وه‌ی مه‌جليسی ئه‌علای ئيسلامی و زۆربه‌ی شيعه‌كان له‌ هی حيزبه‌ كورديه‌كان مه‌ركه‌زيتر و عيراقيتره‌. خۆ ڕێڕه‌وی سياسی بزوتنه‌وه‌ی شيعه‌ی (سه‌دڕی) و حيزبی (ده‌عوه‌) و حيزبی (فه‌زيله‌) به‌ فه‌لسه‌فه‌يه‌كی شيعی عيراقی و تا ڕاده‌يه‌ك عه‌ره‌بپه‌رستيه‌وه‌ دياريكردوه‌. ئه‌وانه‌ له‌ يه‌كه‌م ڕۆژه‌وه‌ نه‌يانشاردۆته‌وه‌ كه‌وا ڕێگه‌ به‌ نوری ئه‌لماليكی ناده‌ن كه‌ركوك ته‌سليمی كوردان بكاته‌وه‌. هه‌ڵبه‌ت له‌ به‌رژه‌وه‌ندی عيراقی عه‌ره‌بيدا نيه‌ كه‌ كه‌ركوك و هه‌رێمی كوردستان له‌ وڵاته‌كه‌ جيابێته‌وه‌، وه‌ له‌ هيچ سياسه‌تمه‌دارێكی ده‌سه‌ڵاتداری به‌غدا قه‌بوول ناكرێ كه‌ به‌ سازش كردن ڕێگه‌ی سه‌ربه‌خۆيی بۆ هه‌رێم خۆش بكات. وه‌ ئاشكرايه‌ كه‌ له‌ به‌رژه‌وه‌ندی هه‌ر ده‌سه‌ڵاتدارێكی به‌غدا دايه‌ ئه‌وه‌نده‌ی بۆی بچێته‌ سه‌ر هه‌وڵدات قه‌واره‌ی ده‌سه‌ڵات و به‌رژه‌وه‌نديه‌كانی فراوانتر بكات. بۆيه‌، ئاساييه‌ كه‌ شيعه‌ی عيراقی به‌ نيازی پاراستنی يه‌كێتی خاكی عيراقه‌وه‌ ده‌ستووری به‌غدا و ياساكانی حوكمڕانی و سياسه‌تی ناوه‌كی داده‌ڕێژن، كه‌ ئه‌وانه‌يش له‌ سروشته‌وه‌ به‌ پێچه‌وانه‌ی ڕه‌وتی سياسه‌تی كوردين‌ و له‌ ئاينده‌دا ده‌بنه‌‌ مايه‌ی كرژيی نێوان هاوپه‌يمانه‌كان.

ئه‌گه‌ر له‌ زۆربه‌ی مشتومڕه‌كاندا شيعه‌كان لايه‌نگيری كورديان گرتبێ، كه‌چی كه‌ كار ده‌گاته‌ سه‌ر ئه‌و بڕياره‌ چاره‌نوس سازانه‌ی كه‌ له‌وانه‌يه‌ كورد له‌ سه‌ربه‌خۆيی نزيك بكاته‌وه‌‌، ئه‌وانيش ده‌بنه‌ ڕێگر. ئه‌وان و سوننه‌كان ئه‌وه‌ی له‌ ده‌ستيان بێت، چ به‌ پلان و چ به‌ پيلان، بێ شه‌رم ده‌يكه‌ن بۆ ئه‌وه‌ی ڕێگه‌ له‌ گه‌ڕانه‌وه‌ی كه‌ركوك بۆ سه‌ر هه‌رێم بگرن ‌. خۆ‌ كۆی ده‌نگی ئه‌وانه‌ به‌سه‌رهی كورد و دۆسته‌كانیدا زاڵه. ئه‌و فاكته‌رانه‌ و پاڵپشتێی ئه‌مه‌ريكی، متمانه‌يان به‌ سه‌رۆك وه‌زيرانی عيراق داوه‌ بۆ ئه‌وه‌ی له‌مه‌ودوا به‌بێ ترس خۆی له‌و جۆره‌ بابه‌ته‌ به‌ره‌نگاريانه‌ نه‌دزێته‌وه‌. بۆيه‌ كورد ناتوانێ پشت به‌و به‌ڵێنانه‌ی مه‌ركه‌ز ببه‌ستێ كه‌ له‌ كاتی لاوازيدا به‌كوردی داوه‌. ئه‌و سه‌ركردانه‌ی كورديش كه‌ پشتيان به‌ به‌ڵێنه‌كانی ماليكی به‌ستووه‌ ده‌بێ به‌ خۆيان دابچنه‌وه‌.

ئايا كورد له‌ عيراق ميوانه‌؟

ئه‌وا چه‌رخێكه‌ باشووری كوردستان به‌ دۆڵی ڕافيده‌ينه‌وه‌ لكاوه‌ و دياره‌ كه‌ تا ماوه‌يه‌كی درێژی ديارينه‌كراويش هه‌ر وا ده‌مێنێت. خۆ ئه‌گه‌ر له‌ سه‌رده‌می دوای شه‌ڕی ڕزگاركردنی عيراق تروسكه‌ چانسێكی جيابوونه‌وه‌ هاتبێته‌ كايه‌وه‌، ئه‌وا ئێستا له‌ ڕێگای ده‌ستوور و دارايی و چه‌ندين ميكانيزمی تره‌وه‌، هه‌رێمی كوردستانی باشوور به‌ عيراقه‌وه‌ نوسێندرايه‌وه‌‌. جا بيه‌وێ يان نه‌يه‌وێ ئيمڕۆ كوردی باشوورعيراقيه‌ و خۆيشی تێدا خاوه‌نماڵه‌. خۆ ئه‌گه‌ر كورد دوودڵ بێ و خۆی له‌ به‌غدادا به‌ ميوان بزانێ، ئه‌وا بێ گومان عيراقيه‌كانی تريش به‌ چاوی ميوانه‌وه‌ سه‌يری ده‌كه‌ن و‌ حيسابی بێگانه‌ی بۆ ده‌كه‌ن.

وه‌ك بووه‌ته‌ كه‌ڵتور، سه‌ركرده‌كانی هه‌رێم له‌ كاتی سه‌ردانی به‌غدا و گفتۆگۆكردندا وه‌ك بێگانه‌ و نوێنه‌ری ده‌وڵه‌تێكی سه‌ربه‌خۆ هه‌ڵوێستيان نواندوه‌. وه‌ به‌ زمانی "ئێمه‌ و ئێوه‌" له‌گه‌ڵ شه‌ريكه‌ عيراقيه‌كان دواون. له‌ هه‌موو ئاستێك و له‌ هه‌موو بۆنه‌یه‌كدا، جه‌خت له‌سه‌ر مافی جيابوونه‌وه‌ی كورد له‌ عيراق ده‌كه‌ن و منه‌تی پێكه‌وه‌ژيانی "ئيختياری" له‌سه‌ر عه‌ره‌ب ده‌كه‌ن. واته‌، ئه‌گه‌ر داوايه‌ هه‌رێمپه‌رستيه‌كانی كورد جێبه‌جێ نه‌كرا وه‌يان زروفی شياو هاته‌ كايه‌وه‌، ئه‌وا به‌وزوانه‌ هه‌رێم له‌ عيراق جيا ده‌كه‌نه‌وه‌. ئه‌گه‌ر كورد عيراقی ناوێت و هه‌رده‌م ئاواتی جيابوونه‌وه‌ و سه‌ربه‌خۆيی به‌بيرعيراقيه‌كانی تر بهێنێته‌وه‌، ئايا چۆن چاوه‌ڕوان ده‌كرێ عيراقيه‌كانی تر ئه‌و ئاواتانه‌ی كورد له‌بير بكه‌ن، وه‌يان ناوچه‌ كورديه‌كانی ده‌ره‌وه‌ی هه‌رێميش به‌ بێ كێشه‌ بخه‌نه‌ سه‌رهه‌رێم؟ به‌ڵكو به‌ پێچه‌وانه‌وه‌، هه‌تا بۆيان بكرێ له‌ ڕووبه‌ری خاكه‌كه‌ی و قه‌واره‌ی سامانه‌كه‌ی كه‌م ده‌كه‌نه‌وه.

سه‌رۆكی هه‌رێم‌ له‌ كۆمه‌ڵگای سياسی ناو به‌غدا به‌ گفتوگۆچيه‌كی ڕه‌ق و‌ سه‌ركرده‌يه‌كی جياخواز ناسراوه‌. خۆی له‌ ميدياكاندا دانی به‌وه‌دا ناوه‌ كه‌ ڕقی له‌ ژيانی ناو به‌غدايه‌ و مه‌گه‌ر به‌ مه‌جبووری نه‌بێت هه‌تا بۆی بكرێت ناچێته‌ ئه‌و شاره‌‌‌وه‌. به‌رامبه‌ر كاميرای كه‌ناڵی (ئه‌لعه‌ره‌بيه) به‌ بێ دوودڵی ده‌ری بڕيوه‌ كه‌وا كاتی ئيعلان كردنی هێشتا نه‌هاتوه، ده‌نا مه‌سه‌له‌ی به‌ده‌وڵه‌تبوونی هه‌رێم مه‌سه‌له‌ی كاته و له‌ ماوه‌ی ته‌مه‌نی خۆيدا دێته‌دی. ئه‌و‌‌ هه‌ڵوێستانه‌ نه‌ك ته‌نيا شه‌ريكه‌ عيراقيه‌كانی ناو چه‌قی ده‌سه‌ڵاتی له‌ سه‌ركرده‌كانی هه‌رێم دڵسارد و دڵڕه‌ق ده‌كه‌ن، به‌ڵكو ته‌واوی دۆست و دوژمنه ده‌ره‌كی و ناوه‌كيه‌كان ده‌خه‌نه‌ خه‌نده‌قی نه‌ياره‌كان و به‌هۆيه‌وه‌ شه‌ڕ له‌ كورد ئاڵۆزتر ده‌كه‌ن.

به‌ڵێ سه‌رۆكی هه‌رێم ده‌مێكه‌ هه‌وڵی دڵنياكردنه‌وه‌ی عيراقيه‌كانی داوه‌ و ده‌يه‌وێ ئينتيباعی جياخوازی له‌سه‌ر لابچێ، وه‌ له‌ ديمانه‌ ڕۆژنامه‌وانيه‌كاندا هه‌رده‌م جه‌خت له‌سه‌ر عيراقێتی هه‌رێم و عيراقپارێزی خۆی ده‌كاته‌وه‌. به‌ڵام گۆته‌كانی دڵنياكه‌ره‌وه‌ نين و عه‌ره‌به‌كان چاوه‌ڕێن كورد به‌ كردار بيسه‌لمێنێ‌. له‌ مانگی ديسه‌مبه‌ری ڕابوردوودا سه‌رۆكی هه‌رێم كۆنفرانسی خوێندنی باڵای ئينته‌رناسيونالی كرده‌ بۆنه‌يه‌ك بۆ ئه‌وه‌ی په‌يامی عيراقپارێزی خۆی و عيراقپه‌روه‌رێتی حكومه‌تی هه‌رێم له‌ ڕێگای ئه‌كاديميه‌كانه‌وه‌ به‌ باقی عيراق بگه‌يه‌نێ. له‌ دوای سرودی (ئه‌ی ڕه‌قيب) كۆنفرانس ده‌ستی پێ كرد و سه‌رۆكی هه‌رێم وتارێكی دڵنياكه‌ره‌وه‌ی تێروته‌سه‌لی پێشكه‌ش كرد. كه‌چی هيچ كام له‌ سه‌رۆك زانكۆ و شانده‌ ئه‌كاديميه‌ عه‌ره‌به‌كان قه‌ناعه‌تیان به‌ قسه‌كان‌ نه‌هات و به‌ ڕاشكاوانه‌ وون بوونی ئاڵا و سرودی نيشتيمانی عيراقی (سلام جمهوری)يان كرده‌ به‌ڵگه بۆ جياوازی نێوان گۆته‌ و كردار (قه‌ول و فيعل). له‌ ڕاستيشدا، هۆی لێنه‌دانی سرودی نيشتيمانيش هه‌ڵه‌يه‌كی هونه‌ری و ته‌كنيكی بوو ده‌نا له‌ به‌رنامه‌دا بوو كه‌ له‌ دوای سرودی كوردی لێ بدرێت.

كوردستانێتی سه‌ركرده‌كان

له‌گه‌ڵ ئه‌وه‌ی سه‌ركرده‌كانی هه‌رێم عيراقيانه‌ هه‌ڵسوكه‌وتيان نه‌كردوه‌، كه‌چی به‌ڵگه‌‌كان نايسه‌لمێنن كه‌ كوردستانيانه و هه‌رمێپه‌رستانه‌ هه‌ڵسوكه‌وتيان كردووه‌. بۆيه‌ به‌لای هه‌رچاودێرێكی سياسيه‌وه‌، به‌راوردی له‌نێوان سياسه‌تی ڕۆژانه‌ی سه‌ركرده‌كانی كورد و خه‌ونی به‌ده‌وڵه‌تكردنی كوردستان جێگای ‌سه‌رسوڕمانه. هه‌تا ئێستا كاری ئه‌و سه‌ركردانه‌ له‌ قالبی موزايه‌ده‌ و شه‌ڕه‌ميديا تێنه‌په‌ڕيوه‌. له‌ كرداری هيچياندا ده‌ر‌نه‌كه‌وتووه‌ كه‌وا پڕۆژه‌ی ده‌وڵه‌تی كورديان هه‌يه‌ و به‌ ‌ته‌ركيزه‌وه‌ له‌ ناوه‌وه‌ی ئيداره‌ی هه‌رێم و له‌ ناوچه‌ سنووريه‌ پڕله‌كێشه‌كان و له‌ سه‌ر شانۆی نێوده‌وڵه‌تيدا كارێكی شايانیان بۆ ئه‌و جۆره‌ پڕۆژه‌يه‌ ئه‌نجامداوه‌. ده‌ستووری ديموكراسی هه‌رێم سه‌ری ديار نيه‌، باری هه‌رێم وا به‌ره‌و خراپيه‌، ياسا سه‌روه‌ر نيه‌، گه‌نده‌ڵيی به‌ره‌و زياديه‌، هه‌ڵمه‌تی چاكسازی و به‌ موئه‌سسه‌سه‌كردن و دامه‌زراندنی بنه‌مای حوكمڕانی ده‌ستی پێ نه‌كردوه‌. تا ئێستا به‌ڵگه‌ی ئه‌وه‌ نيه‌ كه‌ سه‌ركرده‌كانی كورد نيه‌تی چاكردنی بارودۆخيان هه‌يه‌، وه‌يان له‌ مه‌سه‌له‌ی په‌روه‌رده‌ی كاديری پيشه‌يی و پته‌وكردنی توانای پيشه‌يی و ڕۆشنبيری و ئيداری و سياسی كوردستان جيددين، وه‌يان ده‌يانه‌وێ جۆره‌ قه‌ڵايه‌ك بۆ دۆزه‌كه‌يان دروستكه‌ن كه‌ به‌ هه‌ڕه‌شه‌ی ده‌ره‌كی نه‌ڕوخێت.

ئيتر جێگه‌ی سه‌رسوڕمان نيه‌ كه‌ زۆرينه‌ی خه‌ڵكی كوردستان‌ له‌ پارتی و يه‌كێتی و سه‌ركرده‌ بڕيارده‌ره‌كانيان ناڕازينه‌ و ئاماده‌ نين له‌ هه‌ڵبژاردنی داهاتوودا ده‌نگ به‌ ليستی كوردی بده‌ن. سه‌ره‌ڕای هه‌ڕ‌ه‌شه‌ی مووچه‌بڕين و درێژكردنه‌وه‌ی ماوه‌ی تۆماركردنی ناوه‌كان‌، ته‌نيا (يه‌ك له‌ ده‌)ی خه‌ڵكی هه‌رێم له‌ مه‌ڵبه‌نده‌كانی هه‌ڵبژاردندا خۆیان ناونوس كردوه‌‌. ئه‌و خه‌ڵكه‌‌ دڵنيان له‌وه‌ی كه‌ ئه‌و جۆره‌ بايكۆته‌ زه‌ره‌رمه‌نده‌ له‌به‌رژه‌وه‌ندی دوژمندايه‌، به‌ڵام له‌ تووڕه‌يی و بێچاره‌يیدا ئاماده‌ن كه‌ باجی سزادانی سه‌ركرده‌كانيان بده‌ن. ڕه‌نگه‌ سه‌ركرده‌كانیش له‌وه‌دا بێ منه‌ت بن چونكه‌ هێشتا ديار نيه‌ ئايا هه‌ڵبژاردنی پارێزگاكان له‌ هه‌رێمدا ده‌كرێ (چونكه‌ ياساكه‌ بۆ ئه‌و پارێزگايانه‌يه‌ كه‌ له‌ ئيقليمدا ڕێكنه‌خراون)، وه‌ هه‌روه‌ها بايكۆته‌كه‌ كار ناكاته‌ سه‌ر ڕێژه‌ی ده‌نگدان و ژماره‌ی ئه‌ندامه‌ هه‌ڵبژێردراوه‌كان. دياره‌ كه‌ بايی ئه‌وه‌نده‌ش له‌خۆيان دڵنيان كه حيزبی تری ده‌ره‌وه‌ی ده‌سه‌لات ناتوانێ جێگه‌يان پێ له‌ق بكات چونكه‌ ده‌توانن بۆكسه‌كان به‌بێ به‌شداريی ‌ خه‌ڵك پڕده‌نگ بكه‌ن. به‌ڵام له‌وانه‌شه‌ ئه‌وجاره‌يان ئه‌وه‌ زه‌حمه‌ت بێ چونكه‌ هه‌وڵه‌كان بۆ ئه‌وه‌ن كه‌ ڕێگه‌ی پێشێلكاری بگيرێت.

باجی بێ به‌رنامه‌يی كورد

ڕووداوه‌ سياسی و عه‌سكه‌ری و ئاساييشيه‌كانی عیراق هه‌موويان به‌يه‌كه‌وه‌ به‌ستراونه‌ته‌وه‌. له‌ گه‌مه‌ی سياسيدا، ئه‌و لايه‌نه‌ی ستراتيژيه‌تی ڕوون بێ و به‌رنامه‌ی درێژخايه‌نی بۆ پياده‌كردنی ئه‌جينداكانی هه‌بێ، ئه‌وا له‌ چه‌ندين سه‌نگه‌ره‌وه‌ ده‌توانێ ياری له‌ دوژمن بباته‌وه‌. ئه‌مه‌ريكيه‌كان، سه‌ره‌ڕای شكستی پلانه‌ هه‌نووكه‌ييه‌كانيان، له‌ ئه‌نجامدا سه‌ركه‌وتنيان مسۆگه‌ره‌ چونكه‌ هه‌رده‌م خه‌ريكی بيركردنه‌وه‌ی زانستيانه‌ن بۆ ده‌ستكاريكردنی به‌رنامه‌ مه‌دروسه‌كانيان، و له‌ چه‌ندين لاوه‌ كار بۆ ئه‌نجامدانی ئه‌و به‌رنامه‌يه‌ ده‌كه‌ن. حكومه‌تی ماليكيش به‌هه‌مان شێوه‌، ئيمڕۆ داشه‌كانی شه‌تره‌نجه‌ قه‌ڕ‌‌باڵغه‌كه‌ی ده‌جولێنێ و تاكتيكی هه‌مه‌جۆر به‌كار ده‌هێنێ بۆ ئه‌وه‌ی له‌ گيژاوكی تيرۆر و هێرشی سياسی نه‌ياره‌ جۆراوجۆره‌كانی به‌ سه‌ركه‌وتوويی ده‌ربچێ. له‌ دياله‌ و خانه‌قين ته‌نگ به‌ كورد هه‌ڵده‌چنێ بۆ ئه‌وه‌ی له‌ جه‌بهه‌يه‌كی تره‌وه‌ لاوازی بكات و سازشی پێ بكات. ڕه‌نگه‌ ئه‌و قه‌يرانانه‌ی دوايی په‌يوه‌ندی ڕاسته‌وخۆيان به‌ گفتوگۆی نه‌وت و مه‌سه‌له‌ی كه‌ركوك و بودجه‌ی هه‌رێمه‌‌وه‌ هه‌بێ.

له‌به‌رامبه‌ر ئه‌و گه‌مه‌ سياسيه‌ به‌به‌رنامه‌یه‌ی ئه‌مه‌ريكا و حكومه‌تی به‌غدادا، لايه‌نی كوردی (پارتی و يه‌كێتی و حكو‌مه‌تی هه‌رێم) سياسه‌تی كاردانه‌وه‌ی بێ به‌رنامه‌ی له‌ ئامێز گرتووه‌. ده‌ستی ڕاستی له‌ هی چه‌پ ئاگادار نيه‌، و ته‌نسيقی سه‌ربه‌ره‌و خوار و ته‌نيشتاوته‌نيشت ئاسه‌واريان ديار نيه‌. ده‌مێكه‌ ئه‌مه‌ريكيه‌كان شاره‌زای باری ده‌روونی و جۆری بيركردنه‌وه‌ی سه‌ركرده‌كانی كوردی بوونه‌. لاوازی و به‌رژه‌وه‌ندیپه‌رستێتی كورديان بۆ ئه‌نجامدانی ئه‌جيندای خۆيان به‌كار هێناوه‌. پۆل برێمه‌ر توانی سه‌ركرده‌كانی كورد به‌ هه‌ڕه‌شه‌ی بێبه‌شكردن له‌ دارايی وه‌يان تامه‌زرۆكردنی خه‌لاتكردن بهێنێته‌ سه‌رخه‌ت. بۆيه‌ تا ئێستا نه‌ كورد توانيويه‌تی فشار بخاته‌ سه‌ر ئه‌مه‌ريكيه‌كان بۆ ئه‌وه‌ی كار له‌ ڕێڕه‌وی سياسه‌تيان بكات و نه‌ ئه‌مه‌ريكيه‌كان هه‌ڕه‌شه‌ی ناڕه‌زايی سه‌ركرده‌كانی كورد به‌ جيددی وه‌رده‌گرن. ئێستا سياسه‌تمه‌داره‌ عه‌ره‌به‌ عيراقيه‌كانيش فێری هه‌مان ياری بوونه‌. ئه‌وانيش له ‌نزيكه‌وه‌ ئاگاداری باری شلۆقی هه‌رێم و بێ سه‌روبه‌ری ناوماڵی كورد و لێكدابڕانی سه‌ركرده‌‌ و ڕه‌عيه‌كانی كوردن.

ئيمڕۆ له‌ په‌رله‌مانی عيراقدا، ڕێژه‌ی په‌رله‌مانتارانی كورد له‌وپه‌ری به‌رزيدايه‌، ‌هێشتا به‌شی به‌ره‌نگار بوونه‌وه‌ی هه‌ڕه‌شه‌ی هه‌مه‌لايه‌ی عه‌ره‌بی نه‌كردوه‌. خۆ ڕه‌نگه‌ له‌ ئه‌نجامی گه‌يشتنی لێشاوی ده‌نگی عه‌ره‌بی سوننه ‌و‌ قڕ بوونی ده‌نگی كوردی له‌ ناوچه‌ سنووريه‌كانی وه‌ك موسڵ و دياله‌ و كه‌ركوكدا، له‌ خولی داهاتوو ژماره‌ی په‌رله‌مانتارانی كورد له‌ به‌غدا له‌وه‌ی ئێستا كه‌متريش ببێته‌وه‌، و‌ قورسايی سياسی كورد تا ڕاده‌يه‌ك له‌ به‌غدا كه‌م بێته‌وه‌. له‌وانه‌يه‌ له‌ زۆرانبازی سياسیدا مه‌جالی موڕاوه‌غه‌ی كورد ته‌سك بێته‌وه و نه‌ك ته‌نيا ڕۆڵی مه‌ليك دروستكه‌رێتی له‌ده‌ست بدات، به‌ڵكو ڕه‌نگه‌ ده‌ستكه‌وته‌‌كانيشی بكه‌ونه‌ به‌ر مه‌ترسی پێداچوونه‌وه‌.

ماليكی به‌ لاوازی و ماليكی به‌توانايی؟

له‌و ڕۆژانه‌ی كه‌ سه‌دريه‌كان و فه‌زيله‌ييه‌كان و به‌شێكی سوننه‌كان وه‌زيره‌كانيان له‌ كابينه‌دا كێشاوه‌، ئه‌وكات ماليكی له‌وپه‌ڕی لاوازيدا بوو و له‌ هه‌موو كاتێكی تر زياتر پێويستی به‌ پاڵپشتی لايه‌نی كوردی بوو، كه‌چی هێشتاش به‌ دڵنياييه‌وه‌ وورده‌ وورده‌ به‌ڕی له‌ ژێر پێی سياسه‌تمه‌داره‌ كورده‌كان ده‌ر‌هێنا‌. به‌ودواييه‌ مه‌ودای ده‌سه‌ڵاتی جێگره‌ كورده‌كه‌ی و وه‌زيره‌ كورده‌كانی تری كه‌م كردۆته‌وه‌. به‌ بێ ڕاوێژكاری ئه‌وان كاری سياسی و عه‌سكه‌ری ئه‌نجام ده‌دات. له‌ كۆنتراكتی نه‌وتدا، ڕێگه‌ی به‌ وه‌زيری نه‌وت دا كه‌ به‌ يه‌كده‌سته‌كی حكومه‌تی هه‌رێم بته‌زێنێ و كۆمپانيا نه‌وتيه‌ هه‌رێمدۆسته‌كانيش سزا بدات. دۆسيه‌ی گفتوگۆ عيراقی و ئه‌مه‌ريكيه‌كانی له‌ ده‌ستی وه‌زيره‌ كورده‌كان ده‌رهێناوه‌ و به‌ ئاشكرا تانه‌ی پڕۆئه‌مه‌ريكيه‌تی پێوه‌ناون.

ماليكی، بزوتنه‌وه‌ی سه‌دريه‌كان و له‌شكری مه‌هدی بۆ هاتنه‌سه‌ر حوكم به‌كارهێنا. ڕێكخراوی (ئه‌لسه‌حوه‌)ی سوننی و پێشمه‌رگه‌ی كوردی بۆ لێدانی ئه‌لقاعيده‌ به‌كار هێنا. ئه‌وجا له‌ پڕۆسه‌يه‌كدا، كه‌وته‌ هه‌ڵمه‌تی كه‌م كردنه‌وه‌ی جموجۆڵی ميليشيا ناياساييه‌كه‌ی ئه‌لمه‌هدی و ئه‌لسه‌حوه‌، و كه‌م كردنه‌وه‌ی نفوزی بزوتنه‌وه‌ی تێكده‌رانه‌ی سه‌دريه‌كان و عه‌شايه‌ره‌كانی سوننه‌. ئێستاش وا حيسابی هه‌مان جۆره‌ ميليشيای ناياسايی و تێكده‌ر بۆ پێشمه‌رگه‌ و نفوزی پارتی و يه‌كێتی له‌ ناوچه‌كانی ده‌ره‌وه‌ی هه‌رێم ده‌كات. ڕاسته‌ مافی كۆنتڕۆلكردنی شاره‌كانی عيراق و چه‌ك كردنی ميليشياكان مافێكی ده‌ستووری حكومه‌تی عيراقيه‌، به‌ڵام لايه‌نی كوردی وايداده‌نا كه‌ جارێ نۆره‌ی لێدانی نفوزی كوردی له‌ ناوچه‌ پڕكێشه‌ سنووريه‌كان نه‌هاتووه‌ و حكومه‌تی ماليكی بۆی ناكرێت به‌وزوانه‌ و به‌بێ گفتوگۆی ڕاسته‌وخۆ له‌گه‌ڵ خودی سه‌ركرده‌كانی كورد ئه‌و جۆره‌ هێرشه‌ پڕ ئيهانانه‌‌ ده‌ست پێ بكات.

ڕۆژی كورد ڕووی له‌ ئاوابوونه‌

ئيتر هه‌روه‌ك پێشبينی لێ ده‌كرا، قۆناخی زنجيره‌ سه‌ركه‌وتنه‌كان تێپه‌ڕی و قۆناخی پاشه‌كشه‌ی دۆزی كوردی وا به‌بێ دواكه‌وتن سه‌ری ده‌رهێناوه‌. له‌جياتی ئه‌وه‌ی كورد به‌رده‌وام بێ له‌ سوو وه‌رگرتن له‌ فرسه‌تی گێژاوكی ناو به‌غدا و لاوازی حيزبه‌ عيراقيه‌كان و ته‌نگاوی ئه‌مه‌ريكيدا، كه‌چی ئێستا خه‌ريكه‌ به‌غدا سوود له‌ فرسه‌تی شلۆق بوونی باری هه‌رێم و بێ ڕێڕه‌وی سه‌ركرده‌كانی هه‌رێم وه‌رده‌گرێ. ئيمڕۆ زۆربه‌ی خه‌ڵكی كوردستان و هاوپه‌يمانه‌ عيراقيه‌‌كان و دۆسته‌ نێوده‌وڵه‌تيه‌كان له‌ سه‌ركرده‌كانی هه‌رێم ناڕازين و به‌ حه‌سره‌ته‌وه‌ ڕه‌خنه‌ی ڕاسته‌وخۆيان لێ ده‌گرن و هه‌تا دێ زياتريش تووشی بێ هيوايی و (خه‌يبه‌تی ئه‌مه‌ل) ده‌بن. له‌گه‌ڵ سه‌رهه‌ڵدانه‌وه‌ی عه‌ره‌بی سوننه و باڵاده‌ست بوونی سه‌رۆكوه‌زيرانی عيراق و توند بوونی نه‌هجی عيراقپه‌روه‌ری شعيه‌كان، سه‌ركرده‌كانی كورد ده‌ستيان له‌ هه‌موو ڕۆژێكی تر لاوازتر و مه‌كشوفتره‌. له‌ هه‌موو ڕۆژگارێك زياتر بێ به‌رنامه‌ن و جێ پێيان شلۆقه‌‌ و متمانه‌ی زۆرينه‌ی جه‌ماوه‌ره‌كه‌شيان له‌ده‌ست داوه‌. ئه‌گه‌ر له‌ ماوه‌ی ئه‌و چه‌ند مانگه‌ی داهاتوودا سه‌ركرده‌كانی كورد به‌خۆيان دانه‌چنه‌وه‌ و به‌خۆنه‌كه‌ون، ئه‌وا ڕۆژی كورد به‌ كه‌مته‌رخه‌می سه‌ركرده‌كانی ڕووی هه‌ر له‌ ئاوابوون ده‌بێ.

له‌ قه‌يرانی ئاڵۆزی سياسیدا، ڕێگاچاره‌ی خێرا و ئاسان و حازربه‌ده‌ست نايه‌ته‌ ئاراوه‌، به‌ڵام وه‌رچه‌رخانی ڕێڕه‌و و دۆزينه‌وه‌ی ڕێگاچاره‌كان به‌پێی لۆژيك و زانست و هونه‌ری سه‌رده‌م، كاری ئاسانن.‌ به‌شی دووه‌می ئه‌و وتاره‌ (له‌ هاوڵاتی چوارشه‌ممه‌ی داهاتوودا) بۆ دۆزينه‌وه‌ی هه‌ندێ له‌و ڕێگاچارانه‌ و داڕێژتنی به‌رنامه‌يه‌كی تۆكمه‌ ته‌رخان كراوه. چه‌ندين پێشنيازی ته‌واكه‌ری يه‌كتری تێدا هاتووه‌ به‌و ئومێده‌ی كه‌ سه‌ركرده‌كانی كورد بتوانن له‌ چه‌ندين سه‌نگه‌ره‌وه‌ بكه‌ونه‌ فريای بزوتنه‌وه‌كه و زنجيره‌ی قه‌يرانه ده‌ره‌كی و ناوه‌كيه‌‌كان بپسێنن.

Wednesday 7 May 2008

ڕيفۆرمی يه‌كێتی و ديموكراسيه‌تی هه‌رێم -به‌شی دووه‌م

ڕيفۆرمی يه‌كێتی و ديموكراسيه‌تی هه‌رێم
به‌شی دوه‌م: سه‌رچاوه‌ی گرفته‌كان و چاره‌سه‌ريان
پڕۆفيسۆر دلاوه‌ر عه‌بدولعه‌زيز عه‌لائه‌ددين
هاوڵاتی: ٧/٥/٢٠٠٨
له‌ به‌شی يه‌كه‌می ئه‌و وتاره‌دا (هاوڵاتی، ژماره‌ ٤١٨)، هاوكێشه‌ی ده‌سه‌لاتی سياسی له‌ نێوان پارتی و يه‌كێتی، و مه‌ترسی لاسه‌نگ بوونی پارسه‌نگی نێوانيان تاوتوێ كران. باس له‌ شێوازی حوكمڕانی تاكڕه‌وانه‌يان و گرنگی به‌رده‌وام بوونی پێشبڕكێی نێوانيان كرا. ڕووناكی خرايه‌ سه‌ر قه‌يرانی يه‌كێتی و جه‌خت له‌ سه‌ر ڕۆڵی مێژوويی و زه‌ڕوڕه‌تی ڕيفۆرم و ئه‌ركی سه‌ركرده‌كان له‌ پڕۆسه‌ی زيندوو كردنه‌وه‌ی ڕێكخراوه‌كه‌ كرا. ته‌ركيزی ئه‌و به‌شه‌ی دووه‌م له‌سه‌ر ده‌ستنيشان كردنی گرفته‌ سه‌ره‌كيه‌كان و چاره‌سه‌ركردنيانه‌. وه‌ك دياره‌، گرفته‌كانی يه‌كێتی زۆرن و هه‌مه‌جۆرن، بۆيه‌ش چاره‌سه‌ری هه‌موويان له‌ ڕ‌‌ه‌گ و ڕيشه‌وه‌ وا ئاسان و خێرا نابێت‌. به‌ڵام، سه‌رچاوه‌ی زۆربه‌ی گرفته‌كان ده‌گه‌ڕێته‌وه‌ بۆ چه‌ند دانه‌يه‌كی بنه‌ڕه‌تی، كه‌ چاره‌سه‌ریان كه‌فيله‌ به‌ چاكردنی گرفته‌كانی تر.

سه‌رچاوه‌ی كرفته‌كان

گرفتی هه‌ره‌ سه‌ره‌كی يه‌كێتی و هه‌موو حيزبێكی گۆڕه‌پانی سياسی له‌ كوردستان و له‌ ڕۆژهه‌ڵاتی ناوه‌ڕاستدا بريتيه‌ له سێ دانه‌ی لێك به‌ستراو:

١- ‌ گرفتی داڕێژتن و پياده‌ كردنی ده‌ستور ٢- گرفتی دابه‌ش كردنی ده‌سه‌ڵات و هه‌يمه‌نه‌ی سه‌رۆكی ميهره‌بان۳- گرفتی ميسداقيه‌تی كۆنگره‌ و شه‌رعيه‌تی هه‌ڵبژاردنی سه‌ركرده‌كان

دياره‌ كه‌ ئه‌و گرفتانه‌ لێك به‌ستراون وهه‌ريه‌كه‌يان دروستكرد و به‌رهه‌می ئه‌وه‌ی تره‌. بۆ نموونه‌، خودی سه‌ركرده‌كان (به‌ سه‌رۆكه‌وه‌) هه‌ر خۆيان سه‌رچاوه‌یه‌كی مه‌زنی گرفته‌ موزمينه‌كانن ، چونكه‌ له‌ به‌رژه‌وه‌ندیاندا نيه‌ ڕێگه‌ به‌ دانانی ميكانيزمی لابردن و لێپرسينه‌وه‌‌يان له‌ لايه‌ن ئه‌ندامه‌ ئاساييه‌كانی ڕێكخراوه‌كه‌وه بده‌ن. بۆيه‌‌ به‌ ده‌گمه‌ن هه‌ڵبژاردنه‌كانی ناو كۆنگره‌كان به‌ ئازادانه‌ ئه‌نجام ده‌درێن، به‌و پێيه‌ش به‌ ده‌گمه‌ن ڕێوڕه‌سمی كۆنگره‌ حيزبيه‌كان و سه‌ركرده هه‌ڵبژێردراوه‌كان‌ شه‌رعيه‌ت و ميسداقيه‌ت مسۆگه‌ر ده‌كه‌ن. خۆ ڕه‌فتاری مه‌سئول مه‌ڵبه‌ند و كادره‌ ناوه‌ڕاسته‌كان و ئه‌ندامانی كۆنگره‌كانيش به‌ هه‌مان شێوه‌ی سه‌ركرده‌كان به‌ چه‌ندين تۆڕی ته‌كه‌تول و به‌رژه‌وه‌ندی تايبه‌ت و بيركردنه‌وه‌ی ته‌سكه‌وه‌ به‌ستراونه‌ته‌وه‌. بۆيه‌، گله‌يی كارخراپيه‌كان هه‌ر له‌ سه‌ركرده‌كان نيه‌ به‌ڵكو له‌ هه‌موو به‌شدارانی كۆنگره‌كان و داروده‌سته‌ی بڕيارده‌ره‌كانه‌‌. جا ناكرێ به‌ ته‌نيا باس له‌ هيچ كام له‌و گرفته‌ سه‌ره‌كيانه‌ی سه‌ره‌وه‌ بكرێت و به‌ بێی ده‌ستێو‌ه‌ردانی ئه‌وانی تر، چاره‌ بۆ هه‌ريه‌كه‌يان به‌ جودا دابنرێ.

يه‌كه‌م: گرفتی ده‌ستوور

دياره‌ كه‌ هه‌يكه‌لی ڕێكخراوه‌يی حيزبه‌ كورديه‌كان له‌ سه‌رده‌می شاخه‌وه‌ تا ئێستا گۆڕانكاريه‌كی ئه‌وتۆی به‌سه‌ردا نه‌هاتووه‌، و هی هه‌موويان له‌ بنه‌ڕه‌ته‌وه‌ بۆ مه‌به‌ستی شه‌ڕی پارتيزانی و له‌سه‌ر بنه‌مای هه‌ڕه‌می كۆمۆنيستيی، وه‌يان "ديموكراتی شۆڕشگير"، دامه‌زراوه‌. هی هيچ كاميان بۆ پێشبڕكێی سياسی شارستانی ژێر سايه‌ی ديموكراسيه‌تی ده‌ستووری ده‌ست نادات و‌ له‌گه‌ڵ ڕژێمی ده‌ستووری عيراقی ئێستاشدا ناگونجێت. خۆ پارتی و يه‌كێتی، هه‌روه‌ك هه‌موو حيزبه‌ تاكڕه‌وه‌ ده‌سه‌لاتداره‌ ڕۆژهه‌ڵاتیه‌كانی تر، حكومه‌ت به‌ مولكی مۆنۆپۆڵی خۆيان ده‌زانن و ڕۆلی حيزب و حكومه‌ت به‌ ‌تێكهه‌ڵكێشراو ده‌بينن. ئه‌وانه‌ بڕيار له‌سه‌ر پۆسته‌ وه‌زاريه‌كان له‌ ڕوانگه‌ی گه‌مه‌ حيزبيه‌ ناوه‌كيه‌كانه‌وه‌ ده‌ده‌ن. ئه‌گه‌ری له‌ده‌ستدانی ده‌سه‌ڵات و گوێزانه‌وه‌ی خه‌باتيان بۆ ڕێزی ئۆپۆزيسيۆنی ديموكراسيانه‌ ڕه‌چاو ناكه‌ن. بۆيه‌ش له‌ كاتی ڕه‌چاوكردنی گۆڕانكاريه حيزبيه‌‌كاندا، له‌ ئاستی ده‌ستێوه‌ردانێكی ڕووكه‌شی و جێگۆڕكێی ئه‌كته‌ره‌كان له‌ پۆسته‌ حيزبی و حكوميه‌كان تێناپه‌ڕن. له‌و نێوانه‌يشدا، ڕه‌زامه‌ندی ده‌نگده‌ر و پاراستنی مافی مرۆڤ و دامه‌زراندنی سيسته‌می عه‌داله‌تی كۆمه‌ڵايه‌تی و دروستكردنی پردی متمانه‌ له‌گه‌ل ميلله‌ت جێگه‌ی باس نين و ئه‌وله‌ويه‌ت وه‌رناگرن‌.

ئاشكرايه‌ كه‌ ئيمڕۆ هه‌موو حيزبه‌كانی گۆڕه‌پان له‌ قه‌يرانی ده‌ستووريدا ده‌ژين، و له‌ ناوه‌رۆكدا چی جياوازيه‌كی ئه‌وتۆيان له‌ نێواندا نيه‌. خۆ يه‌كێتی ته‌واوی بنه‌ما فه‌لسه‌فيه‌كه‌ی له‌ده‌ست داوه‌ و پێويستی به‌ سه‌رله‌نوێ داڕێژتنه‌وه‌ هه‌يه‌. پێويستی به‌وه‌يه‌ كه‌وا له‌ پێناسه‌وه‌ ساغی بكاته‌وه‌ كه‌ ئايا "به‌يه‌کێتیبوون" مانای چيه. هه‌ڵبه‌ته‌ پێويست نيه‌ كه‌ ده‌ستووری يه‌كێتی (يان هه‌ر حيزبێكی تر) له‌ سه‌ر بنه‌مای فه‌لسه‌فيه‌وه‌ دابڕێژێت، به‌ڵام پێويسته‌ له‌ مانيفه‌ستۆيدا به‌رنامه‌‌‌ی هه‌بێ بۆ چۆنێتی پێشڕه‌ويكردنی پڕۆژه‌ی سياسی و ئابووری و كۆمه‌ڵايه‌تی وڵاته‌‌كه‌ و پلانی ئاشكرای هه‌بێ بۆ چۆنێتی ئيداره‌ی ده‌سه‌لات و پاراستنی به‌ڕژه‌وه‌ندی به‌رزی كورد. له‌ ڕێگه‌ی مانيفه‌ستۆوه‌‌ حيزب نيشانی بدات كه‌ ئايا بۆچی موسته‌هه‌قی ئه‌و ده‌نگه‌يه‌ كه‌ خه‌ڵك له‌ حيزبه‌كانی تری داببڕێ و بيداته‌‌ ئه‌وان. مانيفه‌ستۆی حيزب ده‌بێته‌ ئه‌و بنه‌مايه‌ی كه‌ به‌هۆيه‌وه‌ خه‌ڵك و جه‌ماوه‌ر و ئه‌ندامانی حيزبه‌كه‌ چاودێری ڕه‌فتار و هه‌ڵوێستی سه‌ركرده‌كانی پێ ده‌كه‌ن.

پڕۆسه‌ی ڕيفۆرمی ده‌ستوور

ده‌مێكه‌ كادرانی يه‌كێتی و به‌شێك له‌ سه‌ركرده‌كان به‌ پێويستيان زانيوه‌ كه‌ ده‌ست له‌ ده‌ستوور و په‌يڕه‌و و پڕۆگرام و هه‌يكه‌لی يه‌كێتی وه‌ربده‌ن. به‌ڵام له‌ پياده‌كردندا ته‌ركيزی هه‌وڵه‌كانيان‌ ته‌نيا بۆ ده‌ستێوه‌ردانی ئالقه‌كانی خوار سه‌ركرده‌كانه‌وه‌ بووه‌ به‌بێ ئه‌وه‌ی ده‌ست له‌ سه‌رچاوه‌ی گرفته‌كان بده‌ن. له‌ سێ (۳) ساڵی ڕابوردوودا، ده‌هۆڵی ڕيفۆرمی ده‌ستوور و چاكسازی ڕێكخراوه‌كه‌ ده‌نگی زۆر هات. پڕۆژه‌ی جياجيا تاوتوێ كران، گوايا به‌ ئامانجی دابه‌شكردنه‌وه‌ی ده‌سه‌ڵات و دارايی و داهێنانی لێپرسينه‌وه‌ و چاودێری كردنی ئه‌دائی حكومه‌ت و ڕێكخستنی په‌يوه‌ندی نێوان حيزب و حكومه‌ت و دامه‌زراندنه‌وه‌ی بناغه‌ی يه‌كێتی و هتد. بۆ ئه‌و مه‌به‌سته‌ش له‌ ساڵی ٢٠٠٦دا هه‌ڵبژاردنی مه‌ڵبه‌نده‌كان ئه‌نجام درا. به‌ڵام له‌جياتی ئه‌و ئامانجانه‌، يه‌كێتی له‌ چه‌ندين لاوه‌ زه‌ره‌ری گه‌وره‌ی له‌ خۆی دا. بۆ نموونه‌، هێز و توانا و كاتی ده‌يان هه‌زار ئه‌ندام و دارايی ده‌يان مليۆن دۆلاری ڕێكخراوه‌كه‌ی له‌ پڕۆسه‌كه‌دا سه‌رف كرد، و كه‌شی سياسی ناوه‌كی و شه‌ڕی باڵه‌ موته‌كه‌تيله‌كانی مه‌شحونتر كرد. له‌ كاتی كه‌مپه‌يندا، سه‌ركرده‌كان (به‌ سكرتێری گشتيه‌وه‌) بوونه‌ لايه‌نگير و ڕۆڵی براگه‌ورايه‌تی خۆيان له‌ده‌ست دا. مه‌ڵبه‌نده‌كان بوونه‌ شانۆی به‌ره‌نگاريی و به‌ربه‌ره‌كانی و زۆرانبازی و جه‌مسه‌رگيری و ته‌كه‌تولبازی و ناوچه‌گه‌رێتی. له‌ دوای هه‌ڵبژاردنه‌كانيش به‌ هه‌زاران كادر و ئه‌ندامان بوونه‌ قوربانی سه‌ركرده موته‌كه‌تيله‌كان، و زۆر له‌وانه‌ پۆستی‌ حيزبی و وه‌زيفيان له‌ده‌ست دا. توێژێكی زۆر گرنگی ناو يه‌كێتی ڕێكخراوه‌كه‌ی به‌جێ هێشت يان كشايه‌وه‌ وه‌يان زوير بوو. ئيتر ناحه‌زێتی و ڕق و كينه‌ی سياسی و كۆمه‌ڵايه‌تی له‌ نێو ئه‌ندامان و كادران و سه‌ركرده‌كان زياتر په‌ره‌ی سه‌ند. سه‌ربار و بنباريش، پڕۆسه‌ی چاكسازی و پاكسازی و نوێسازی و لێپرسينه‌وه‌ له‌ بنه‌ڕه‌ته‌وه‌ گوژايه‌وه‌ و گرفتی سه‌ره‌كی ده‌ستووری يه‌كێتی هه‌ر وه‌ك خۆی مايه‌وه. ئه‌و بڕه‌ گۆڕانكاريانه‌ی كه‌ ئه‌نجاميش دران هه‌ر له‌ مه‌ڵبه‌ند به‌ره‌و خوار بوون، به‌بێ ئه‌وه‌ی هيچ جۆره‌ گۆڕانكاریه‌ك له‌ پێكهاته‌ی سه‌ركردايه‌تی و مه‌كته‌بی سياسی و پۆستی سكرتێری گشتیدا ئه‌نجام بدرێ. ژماره‌ی مه‌ڵبه‌نده‌كان له‌ ڕاده‌ به‌ده‌ر زياد كران و ئێستا گرفتی ده‌وام كردن و مه‌سره‌ف كێشان و ته‌شه‌نه‌ی گه‌نده‌ڵيی تێياندا وای كردوه‌ كه‌ دووباره‌ بير له‌ كه‌م كردنه‌وه‌ی ژماره‌ و بودجه‌يان بكرێته‌وه‌.

ده‌ستووری ئاينده‌

پێويسته‌ سه‌ركرده‌كانی يه‌كێتی به‌ جورئه‌ته‌وه‌ به‌ره‌نگاری قه‌يرانه‌ ده‌ستووريه‌كان ببنه‌وه و ده‌ستوور و په‌يڕه‌و پڕۆگرامێكی تازه‌ و سه‌رده‌ميانه‌ له‌ ئامێز بگرن. پێويسته‌ چاو به‌ هه‌موو پێناسه‌ و په‌يوه‌ندی و ڕۆڵ و پۆسته‌كاندا بخشێننه‌وه‌، هه‌ر له‌ كرايتيريای ئه‌ندام و ئه‌ندام كۆميته‌ و مه‌ڵبه‌ند و كۆنگره‌وه‌ بگره‌ هه‌تا ده‌گاته‌ هی سه‌ركرده‌ و سه‌رۆكی حيزبه‌كه‌وه، تا به‌هۆيه‌وه‌ دياربێ ئايا كێ له‌ ناوچه‌ی ئينتيخابيدا مافی هه‌‌ڵبژاردنی ئه‌ندامانی كۆنگره‌ی هه‌يه و كێ له‌ دواتر مافی خۆپاڵێوينی بۆ ئه‌ندامێتی سه‌ركردايه‌تی هه‌يه. خۆ ڕۆڵی پێشڕه‌وێتی ڕێكخراوێكی جه‌ماوه‌ری وه‌ك يه‌كێتی پێويستی به‌ كاری فول تايم و بێ وچانی كه‌سانی به‌ توانا هه‌يه‌. بۆيه‌ پێويسته‌ له‌ ده‌ستووردا گۆڕانكاری وا بكرێت كه‌وا خه‌ڵكی سه‌رقاڵ، يان پير و په‌ك كه‌وته، يان كه‌مته‌ركيز و كه‌مته‌رخه‌م وه‌يان خاوه‌ن دژه‌به‌رژه‌وه‌ندی له‌ لوتكه‌ی ده‌سه‌لات و ئاستی مه‌كته‌بی سياسيدا پۆستی سه‌ره‌كی داگير نه‌كه‌ن.

بۆ خاتری نوێ كردنه‌وه‌ی حيزب، پێويسته‌ ميكانيزم و په‌يڕه‌وپڕۆگرامه‌كه‌ی‌ به‌ جۆرێكی ديناميكی وا دابڕێژرێت كه‌ ڕێكخراوه‌كه‌ ببێته‌ كارگه‌يه‌ك بۆ به‌رهه‌مهێنانی سه‌ركرده‌ی لاو و خوێن گه‌رم و به‌توانا. پێويسته‌ كۆڕسی ڕاهێنانی به‌رده‌وام له‌ ئاستی نێوده‌وڵه‌تیدا بۆ ئه‌و كادرانه‌ (له‌ پياو و ژنان) ڕێك بخه‌ن و له‌ هه‌موو كۆنگره‌يه‌كيشدا ڕێگه‌ی هاتنه‌ پێشيان بۆ خۆش بكه‌ن. پێويسته‌ كۆميته‌ی سه‌ركردايه‌تی هه‌رده‌م له‌ نوێ بوونه‌وه‌دا بێ و به‌لانی كه‌مه‌وه‌ چاره‌گێك وه‌يان سێيه‌كی ئه‌ندامانی لاوی (ژن و پياوی) خوارووی چل ساڵيه‌وه‌ بێ. پێويسته‌ ئه‌وانه‌ی خۆيان بۆ سه‌ركردايه‌تی ده‌پاڵێون ته‌مه‌نيان له‌ ٦٢ ساڵ تێ ‌نه‌په‌ڕيبێ، چونكه‌ له‌ كۆتايی‌ مه‌ودای پۆست هه‌ڵگرتنيان (بۆ نموونه‌ ۳ تا ٤ ساڵ) ته‌مه‌نيان له‌ هی خانه‌نيشينی تێ ده‌په‌ڕێ. هاوكات، پێويسته‌ ئه‌وانه‌ی‌ كه‌ خانه‌‌نشين ده‌كرێن بكرێنه‌ ئه‌ندامی مه‌جليسێكی تازه‌ئيجاد، وه‌ك ده‌سته‌ی (پياوماقوڵان، براگه‌وران، ڕاوێژكاران) بۆ ئه‌وه‌ی‌‌ كاری حيزبی شياويان پێ بسپێردرێت و سوود له‌ ئه‌زموونيان وه‌ربگيرێت.
دووه‌م: گرفتی دابه‌ش كردنی ده‌سه‌ڵات
له‌ هه‌موو حيزبه‌ كوردستانيه‌كاندا، هه‌موو ده‌سه‌ڵاتێكی‌ ته‌شريعی و ته‌نفيزی له‌ پۆستی سه‌رۆكی حيزبدا كۆبۆته‌وه‌، ئه‌وه‌ش نه‌ك ته‌نيا ڕێخۆشكه‌ر بووه‌ بۆ دامه‌زرانی سيسته‌می "موڕشيدی ئه‌علا" و "سه‌ركرده‌ی ئه‌زه‌ليی و بێ هاوتا" له‌ناو حيزبدا، به‌ڵكو بۆ داهێنانی حوكمی تاكڕه‌وی بێ مونازيعيش له‌ ناو ئيداره‌ی حوكمڕانيدا. به‌ هه‌مان شێوه‌ ڕێخۆشكه‌ر بووه‌ بۆ په‌روه‌رده‌كردنی خورده‌ تاكڕه‌و و پێكه‌وه‌ به‌ستنه‌وه‌ی ده‌سه‌لاتداره‌كان و به‌رده‌وامكردنی گه‌نده‌ڵيی و حوكمی مه‌ركه‌زی.

پێويسته‌ له‌ ده‌ستووری يه‌كێتیدا چاوێكی دووربينانه‌ و جيددی به‌ پۆستی سكرتێری گشتیدا بخشێندرێته‌وه‌. به‌ مانا حه‌رفيه‌كه‌ی، پۆستی سكرتێری گشتی وه‌ك كارگێڕی حيزب وايه‌ و ته‌نيا بۆ ئيداره‌ی كاری ڕۆژانه‌ و ڕێوڕه‌سم و ڕۆتينی ناو حيزب ته‌رخان كراوه‌. سكرتێری گشتی ناكاته‌ سه‌رۆكی حيزب و ده‌سه‌ڵاته‌كانی زۆر دياری كراون. به‌ڵام له‌ ناو يه‌كێتی دا، سكرتێری گشتی مانای موڕشيد و تاكه‌ بڕيارده‌ر و ئه‌مين سه‌ندوق‌ و چه‌قی هه‌موو ده‌سه‌ڵاته‌كانه‌.‌ بۆيه‌ش مه‌سئوليه‌تی هه‌موو قه‌يران و گرفتێكی ڕێكخراوه‌كه‌ له‌ ئه‌ستۆی سكرتێره‌ و خۆيشی به‌شێكی دانه‌بڕاوه‌ له‌ گرفت و له‌ چاره‌كان. واته‌ هه‌تا ئه‌ويان به‌و ده‌سه‌ڵاتانه‌وه‌ له‌ سه‌ر لوتكه‌ی هه‌ڕ‌‌ه‌می يه‌كێتی دا مابێ، ئه‌وا ژيانه‌وه‌ی ڕێكخراوه‌كه‌ و مسۆگه‌ر كردنی ميسداقيه‌تێكی نێوده‌وڵه‌تی بۆ كۆنگره‌ی داهاتوو و وه‌ده‌ست هێنانی شه‌رعيه‌تی ده‌ستووری بۆ سه‌ركرده‌كانی دواڕۆژ له‌ ئه‌ستۆی ئه‌ودا ده‌بێ.

پێويسته‌ هه‌ر له‌ ئێستاوه‌ بير له‌ قۆناخی دوای سكرتێری گشتی ئێستای يه‌كێتی بكرێته‌وه‌ و مه‌سه‌له‌ی پێشڕه‌وێتی يه‌كێتی له‌ كۆنگره‌ی داهاتوودا يه‌ك لايی بكرێته‌وه‌. پێويسته‌ ڕۆڵی سكرتێری گشتی له‌ بنه‌ڕه‌ته‌وه‌ بگۆڕدرێ وه‌يان هه‌ر بسڕێته‌وه‌ (له‌غو بكرێته‌وه)‌ هه‌تاوه‌كو كه‌ڵتووری "چه‌قی ده‌سه‌ڵاتی بێ هاوتا" له‌ بنه‌ڕه‌ته‌وه‌ له‌ يه‌كێتيدا نه‌مێنێ. له‌جياتيان، ده‌سه‌لاتی سه‌رۆك به‌سه‌ر چه‌ند پۆستێكی سيادی تر دابه‌ش بكرێ. هه‌ندێك له‌ ده‌سه‌ڵاته‌ پێويسته‌كان له‌ ده‌ستی سه‌رۆك دا بێ و باقيه‌كه‌ی به‌ سه‌رجێگری سه‌رۆك و سه‌رۆكی ئيداره‌ و كارگێڕ و سه‌رۆكی كوتله‌ی په‌رله‌مان و خه‌زنه‌دار و هی تر دابه‌ش بكرێ. وه‌ ميكانيزمێكی نوێی شه‌فاف و عاديلانه‌ بۆ هه‌ڵبژاردنی ئه‌و پۆسته‌ سياديانه‌ دياری بكرێت، به‌ جۆرێك كه‌ كێشه‌ی هه‌ڵبژاردنی سه‌ركرده‌كان و كێشه‌ هه‌ستياره‌كانی تری وه‌ك هی بنه‌ماڵه‌چيه‌تی و خزمايه‌تی و بۆماوه‌يیه‌تی له‌ بنه‌ڕه‌ته‌و چاره‌سه‌ر بكرێت. خۆ ده‌بێ مه‌ودای خزمه‌ت كردن له‌ پۆستی سه‌رۆكايه‌تی حيزب دياری بكرێ و له‌ دوو ده‌وره‌ی ئينتيخابی (هه‌شت ساڵ) تێپه‌ڕ نه‌بێ، وه‌ له‌ دوای ئه‌و ماوه‌يه به‌ هيچ پاساوێك سه‌رۆكه‌كه‌ مافی خۆ هه‌ڵبژاردنه‌وه‌ی پێ نه‌درێ.

سێيه‌م: گرفتی ميسداقيه‌ت و شه‌رعيه‌ت
هه‌ڵبه‌ت، سه‌رچاوه‌ی ميسداقيه‌ت و شه‌‌رعيه‌ت بۆ سه‌ركردايه‌تی هه‌موو رێكخراوێك له‌ كۆنگره‌كه‌يدا هه‌ڵده‌قوڵێ، و له‌ شه‌فافيه‌ت و ئازادی ده‌بڕين و ده‌نگدان و لێپرسينه‌وه‌ په‌يدا ده‌بێت. به‌ڵام له‌ كه‌ڵتووری سياسی كورديدا، كۆنگره‌ شانۆيه‌كه‌ بۆ چه‌پڵه‌ لێدان ۆ هه‌ڵگوتن به‌ شان و باڵی سه‌رۆكی بێ هاوتا و بۆ ئه‌نجامدانی پلان و نه‌خشه‌ پێشوه‌خته‌كه‌ی. كۆنگره‌ له‌ كات و سات و هه‌لومه‌رجێكی گونجاو بۆ سه‌رۆك ئه‌نجام ده‌درێ، ياريكه‌ره‌ ئه‌نجامده‌ره‌كانيش له‌ لايه‌ن خودی سه‌رۆكه‌‌وه‌ ده‌ستنيشان ده‌كرێن، و سه‌ركرده‌ به‌ناو هه‌ڵبژێردراوه‌كانيش هه‌ر ئه‌وانه‌ن كه‌ خودی سه‌رۆك‌ ڕه‌زامه‌ندی له‌سه‌ر ده‌رچوونيان ده‌رده‌بڕێ. بۆيه‌، هيچ كام له‌ ڕێوڕه‌سم و ئه‌نجامه‌كانی كۆنگره‌ و ده‌سته‌ی سه‌ركرده‌ هه‌ڵبژارداوه‌كان ميسداقيه‌ت و شه‌رعيه‌تی ناوه‌كی و ده‌ره‌كی له‌گه‌ڵ خۆياندا هه‌ڵناگرن. جا جێگه‌ی سه‌رسوڕمان نيه‌ كه‌وا كۆنگره‌‌كانی حيزبه‌ كورديه‌كان و ڕۆژهه‌ڵاتيه‌كان ناوه‌رۆك و قودسيه‌ت و هه‌يبه‌تی ڕێكخراوه‌يیان پێ نه‌ماوه‌.
دوابه‌دوای هه‌ڵبژاردنه‌كانی ئه‌و دواييه‌ی يه‌كێتی، ئه‌ندامانی ڕێكخراوه‌كه‌ چاوه‌ڕێی به‌ستنی كۆنگره‌ بوون به‌و ئومێده‌ی كه‌وا چاره‌نوسی ڕێكخراوه‌كه‌ی تێدا حه‌سم بكه‌ن. به‌ڵام له‌ جياتی كۆنگره، پلينيۆم به‌سترا. ئه‌وه‌يشيان هه‌ر له‌ ده‌ستپێكه‌وه بووه‌ فه‌وزا و به‌ بێ ئه‌نجام‌ فه‌شه‌لی هێنا. له‌ كورتی، به‌بێ هه‌ڵبژاردنی سه‌ركردايه‌تی و ده‌ستكاری په‌يڕه‌و و پڕۆگرامی ناوه‌خۆ و تاوتوێ كردنی ئازادانه‌ی هيچ جۆره‌ بابه‌تێكی گرنگ، بڕێندرايه‌وه‌. دياره‌ كه‌ كه‌مپه‌ينه‌ بێداده‌كه‌ی هه‌ڵبژاردنی مه‌ڵبه‌نده‌كان و فه‌شه‌لی پلينيۆم‌ برينی يه‌كێتی قوڵتر كرد و درێژه‌ی به‌ قه‌يرانه‌كانی دا و ئه‌ندامانی ڕێكخراوه‌كه‌شی بێ ئومێد كرد. ئێستا ئه‌ندامان و جه‌ماوه‌ری يه‌كێتی چاوه‌ڕێی ئه‌وه‌ن كه‌ له‌‌ كۆنگره‌ی داهاتوودا موعجيزه‌ بخوڵقێنن و چاره‌رنوسی ڕێكخراوه‌كه‌ وه‌رچه‌رخێنن. به‌لای زۆريانه‌وه‌ كۆنگره‌ی داهاتوو دوا فرسه‌ته‌ و خاڵێكی جياكه‌ره‌وه‌يه‌ له‌ نێوان ئه‌گه‌ری فه‌وتان و چانسی ژيانه‌وه‌ی يه‌كێتی.

كۆنگره‌‌

له‌ سیودوو ساڵه‌ی ته‌مه‌نيدا، يه‌كێتی ته‌نيا دوو كۆنگره‌ی به‌ستووه، و دووه‌مه‌كه‌يان كه‌ له‌ بارودۆخێكی ئاساييدا گيراوه و وه‌‌ك هه‌موو كۆبوونه‌وه‌ گشتيه‌كانی پێشتری به‌ شانۆگه‌ری ئه‌نجام دراوه‌. سه‌ركرده‌كان‌ بۆ سه‌رخستنی ئه‌جيندا پێشوه‌خته‌كانيان و پاراستنی به‌رژه‌وه‌ندیه‌ تايبه‌ته‌كانيان و هه‌ڵبژاردنه‌وه‌ی ئالقه‌ موته‌كه‌تيله‌كانيان به‌كاريان هێناوه‌. ده‌ستوور و په‌يڕه‌و و پڕۆگرامی ڕێكخراوه‌كه‌، كه‌ هه‌ر به‌ قه‌له‌می خودی سه‌ركرده‌كان نووسراون، به‌ ده‌گمه‌ن له‌ كۆنگره‌دا په‌يڕه‌وی كراون، به‌‌وه‌ش كه‌شی ئه‌ناركی زاڵ كراوه‌. ئه‌و پێشێل كردنه‌ به‌ ڕێكه‌وت و له‌ ئه‌نجامی نه‌زانين و سه‌هوكردن نه‌بووه‌‌‌، به‌ڵكو به‌ مه‌به‌ستی پياده‌ كردنی ويسته‌كانی خودی سكرتێری گشتی و سه‌كرده‌ بڕيارده‌ره‌كان بووه‌‌. بۆيه‌، هيچ كۆنگره‌ و پلينيۆم و كۆبوونه‌وه‌یه‌كی گشتی يه‌كێتی (وه‌ك هی حيزبه‌كانی تر) ميسداقيه‌ت و شه‌رعيه‌تی سياسی و قانونی نه‌بووه‌ و له‌ مانا ديموكراسیه‌ ئازاده‌كه‌ی به‌تاڵ كراوه‌ته‌وه‌. به‌ هه‌مان پێوانه‌ش، متمانه‌ی ئه‌ندام و دۆست و جه‌ماوه‌ر و ميلله‌ت و بيگانه‌كانی له‌ده‌ست داوه‌. ئه‌گه‌ر يه‌كێتی بيه‌وێ له‌ ڕۆخی فه‌وتان دووركه‌وێته‌وه‌ و ڕێگه‌ی ژيانه‌وه‌ بگرێته‌ به‌ر، پێويسته‌ له‌ كۆنگره‌دا يه‌كه‌م هه‌نگاوی ميسداقيه‌ت و شه‌رعيه‌ت بهاوێ. دياره‌ كادرانی يه‌كێتی خه‌ريكن خۆيان بۆ كۆنگره‌ ئاماده‌ د‌ه‌كه‌ن. به‌ڵام له‌ ڕاستيدا ئاماده‌كاريه‌كان بێ ته‌نسيق و به‌رنامه‌ن، چونكه‌‌ له‌ سكرتێری گشتی به‌ولاوه‌، كه‌سی تر زانياری سه‌باره‌ت به‌ كات و سات و شوێن و هه‌لومه‌رجی كۆنگره‌‌وه‌ نيه. بڕياری كۆنگره‌ به‌ ويستی ئه‌وه،‌ و سه‌ركرده و كادرانيش به‌ مه‌جبووری چاويان بڕيوه‌ته‌ ئيشاره‌ته‌ غاميزه‌كانی سكرتێر به‌بێ ئه‌وه‌ی سه‌ريان لێ ده‌ربچێ.

ده‌رسی مێژوو

پێويسته‌ سه‌ركرده‌كانی يه‌كێتی ده‌رسی مێژوو له‌ ئه‌زموونی كۆبوونه‌وه‌كانی پێشتر‌ هه‌ڵێنجن. پێويسته‌ له‌‌ هه‌ڵه‌ و ڕه‌فتاره‌ شێواوه‌كانی پێشوويان عيبڕه‌ت وه‌ربگرن و هه‌وڵده‌ن متمانه‌ی ئه‌ندام و جه‌ماوه‌ره‌كه‌يان بكڕنه‌وه‌، و بڕوانامه‌ی نێوده‌وڵه‌تی بۆ سه‌ركرده‌ هه‌ڵبژاردراوه‌كان په‌يدا بكه‌ن.

١- كۆنگره‌ی بێ موفاجه‌ئه

پێويسته‌ له‌مه‌ودوا هه‌موو كۆنگره‌يه‌كی يه‌كێتی له‌ كات و ساتی دياریكراويدا (ساڵانه‌ وه‌يان هه‌ردووساڵه‌ی جارێك) ببه‌سترێ به‌ بێ ئه‌وه‌ی به‌ هيچ جۆره‌ پاساوێك دوابخرێ. بۆ كۆنگره‌ی داهاتوو، پێويسته‌ ئه‌جيندا و پڕۆگرامی ته‌واوی كۆبوونه‌وه‌كان و ڕێنمايی په‌يڕه‌وی كردنيان پێشوه‌خت بڵاو بكرێته‌وه‌ و ده‌قاوده‌قيش ئيلتيزامیان پێوه‌ بكرێ. له‌ كۆنگره‌كانی پێشوودا، ئه‌جيندا و پڕۆگرامه‌كان له‌ لايه‌ن سكرتێری گشتی و ئه‌ندامانی مه‌كته‌بی سياسيه‌وه‌ بڕياریان له‌سه‌ر ده‌درا، و به‌ گوێره‌ی ويست و ئيڕاده‌ و به‌رژه‌وه‌ندیه‌ تايبه‌ته‌كانی سكرتێريش گۆڕانكاری له‌ناكاویان به‌سه‌ردا ده‌هێنرا. ئه‌وانه‌ ده‌بنه‌ مايه‌ی ناڕه‌حه‌تی و بێ دڵنيايی، هه‌تا ئه‌گه‌ر له‌ خزمه‌تی به‌رژه‌وه‌ندی گشتیشدا بكرێن.

٢- هه‌ڵبژاردنی ئه‌ندامانی كۆنگره‌
ئه‌ندامانی كۆنگره‌ كه‌ له‌ لايه‌ن كۆميته‌كانه‌وه‌ هه‌ڵد‌‌ه‌بژێردرێن، په‌يامی ئه‌ندام و كۆميته‌ی ناوچه‌ ئينتيخابيه‌كه‌یان سه‌باره‌ت به‌ كێشه‌ چاره‌نوس سازه‌كان به‌ره‌‌و كۆنگره هه‌ڵده‌گرن‌. بۆ هيچ سه‌ركرده‌يه‌ك نيه‌ ده‌ست له‌ پڕۆسه‌ی ده‌ستنيشيان كردنی ئه‌و نوێنه‌رانه‌ بدات وه‌يان ڕێگه‌ی به‌شدارێتی كۆنگره‌يان لێ بگرێ. خۆ به‌ گوێره‌ی ده‌ستوور، له‌ كۆنگره‌دا سه‌ركرده‌كان (به‌ سكرتێری گشتيه‌وه‌) ئيستيقاله‌ له‌ پۆسته‌كانيان ده‌‌ده‌ن و حاڵيان ده‌بێته‌ حاڵی هه‌ر ئه‌ندامێكی تری كۆنگره‌. له‌ ساڵی (٢٠٠٠)دا، به‌ پاساوی جياجيا چه‌ندين ئه‌ندامانی هه‌ڵبژێردراو له‌ كۆنگره‌ دوورخرانه‌وه‌ و چه‌ندين ئه‌ندامانی هه‌ڵنه‌بژێردراو له‌سه‌ر كۆنگره‌ فه‌رز كران. ئه‌و ڕه‌فتاره‌ ناقانونی و ناشه‌رعيانه‌‌ نابێ دووباره‌ ببنه‌وه‌.

۳- سه‌رپه‌رشتیكه‌رانی كۆنگره‌له‌ كۆنگره‌كانی پێشتردا، سه‌ركرده‌كان سه‌په‌رشتی ته‌واوی پڕۆسه‌ی كۆنگره‌كانيان ده‌كرد و جاری وا هه‌بوو به‌ فه‌رمانی سكرتێر ڕێگه‌يان له‌ ديالۆگ و لێپرسينه‌وه‌ و ده‌نگدان و تاوتوێ كردنی بابه‌تی چاره‌نوس ساز ده‌گرت. به‌ گوێره‌ی ده‌ستوور، له‌ ڕۆژی يه‌كه‌می كۆنگره‌دا، پێويسته‌ سه‌ركرده‌كانی پێشوو و ده‌ست له‌ ئه‌رك و مه‌سئوليه‌ته‌كانيان هه‌ڵبگرن. ده‌بێ ده‌سته‌يه‌كی تازه‌ و تايبه‌ت بۆ سه‌رپه‌رشتی كردنی كۆنگره‌ له‌ ڕێگه‌ی ده‌نگدانی ئازاده‌وه‌ له‌ لايه‌ن ئه‌ندامانه‌وه‌ هه‌ڵبژێردرێن. بۆ پاراستنی بێ لايه‌نێتيان، سه‌رپه‌رشتيكه‌ره‌كان مافی خۆ پاڵێورانيان بۆ پۆستی سه‌ركردايه‌تی نابێ. هاوكات هيچ سه‌كرده‌يه‌ك به‌ سكرتێری گشتیه‌وه‌ مافی ده‌ستنيشان كردن و دابه‌زاندنی سه‌رپه‌رشتيكه‌رانی نابێ.

٤- خوتبه‌كانی ناو كۆنگره‌پێويسته‌ په‌يام و خوتبه‌ی سه‌ركرده‌كان و نوێنه‌رانی ناوچه‌ ئينتيخابيه‌كان و توێژه‌ره‌وه‌كانی ڕێكخراوه‌كه‌ بنوسرێنه‌وه‌ و پێشتر له‌ سه‌ر خه‌ڵك دابه‌ش بكرێن، و له‌ ناو كۆنگره‌دا كاتێكی زۆريان پێ به ‌فيڕۆ نه‌درێت. هاوكات، هه‌موو ئه‌ندامێك مافی ئه‌وه‌ی ده‌بێت كه‌ خوتبه‌ی خۆی به‌ هه‌مان شێوه‌ی سه‌ركرده‌كان به‌ نووسين بڵاو بكاته‌وه‌. پێويسته‌ لێژنه سه‌رپه‌رشتیكه‌ره‌ هه‌ڵبژێردراوه‌كه‌ به كاری‌ ڕێك خستنی خوێندنه‌وه‌ی خوتبه‌ هه‌ڵبژارده‌كان هه‌ڵبستێ. پێوانه‌ی هه‌ڵبژاردنی خوتبه‌كانيش له‌سه‌ر بنه‌مای گرنگی و پێويستی و ته‌واوكه‌ريه‌تی په‌يامه‌كان بێ. نابێ ماوه‌ی هيچ خوتبه‌يه‌ك له‌وی تر درێژتر بێ و پێويسته‌ ته‌ركيزی هه‌مووشيان له‌سه‌ر ناوه‌رۆكی په‌يامه‌كانيان بێ، به‌بێ دوپات كردنه‌وه‌. هيچ سه‌ركرده‌يه‌ك مافی ڕێگرتنی له‌ خوتبه‌‌‌ی ئه‌ندامان نابێ و هه‌موو ئه‌ندامێكيش مافی داواكردنی خوتبه‌ی هه‌يه‌ به‌ گوێره‌ی پێوانه‌ی دياريكراو و شه‌فاف.‌ ‌

٥- ده‌نگدان نه‌ك چه‌پڵه‌ڕێزانميكانيزمی ده‌نگدان و عه‌داله‌تی هه‌ڵبژاردنه‌كان هه‌ستيارترين و گرنگترين پڕۆسه‌ن بۆ وه‌ده‌ست هێنانی ميسداقيه‌ت و شه‌رعيه‌ت. ده‌بێ ده‌نگدان به‌ نهێنی ئازاد بێ و سندوقی ده‌نگه‌كان له‌به‌ر چاوی لێژنه‌ی سه‌رپه‌رشتيكه‌ر و نوێنه‌ری ئه‌ندامه‌ پاڵێوراوه‌كان لانه‌چێ. ‌له‌ كۆنگره‌ی ڕابوردوودا، سكرتێری گشتی و جێگره‌‌كانی و ئه‌ندامه‌ زه‌قه‌كانی مه‌كته‌بی سياسی به‌ بێ ده‌نگدانی شه‌رعی و به‌ چه‌پڵه‌ڕێزانێكی ناديموكراسيانه‌ بۆ پۆسته‌كانيان ته‌زكيه‌ كران. كه‌س شكی له‌ توانا و شه‌عبيه‌تی زۆربه‌ی ئه‌و سه‌ركرده‌ بڕيارده‌رانه‌ نه‌بوو، بۆيه‌ش ئه‌و جۆره‌ ته‌زكيه‌ كردنه‌ له‌ بنه‌ڕه‌تدا پێويست نه‌بوو. كه‌چی ئه‌و ڕووداوه‌ له‌بير نه‌كراوه‌ و هێشتا ناڕه‌زايی كاديرانی يه‌كێتی له‌و جۆره‌ هه‌ڵبژاردنه‌ی سه‌ركرده‌كان‌ دانه‌مركاوه‌ته‌وه‌. خۆ ئه‌وانه‌ی كه‌ به‌ ده‌نگدانيش هه‌‌ڵبژێردران ميسداقيه‌ت و شه‌رعيه‌تيان لێ كێشرايه‌وه‌ چونكه‌ سكرتێری گشتی سندوقی ده‌نگه‌كانی له‌به‌ر چاوی خه‌ڵك لابرد و برديه‌ ماڵه‌وه‌. ‌

٦- ميديای ئازادميديای ئازاد بريتيه‌ له‌ بينايی و گوێی ميلله‌ت‌. بێ گومان، له‌ سه‌رده‌می ديموكراسيه‌ت و شارستانيه‌تدا، كۆنگره‌ی حيزبی جه‌ماوه‌ری پانوبه‌رين و ده‌سه‌لاتدار كاريگه‌ری له‌سه‌ر ژيانی ته‌واوی خه‌ڵكی هه‌رێم هه‌يه‌، بۆيه‌ش خه‌ڵكی كوردستان به‌ ئيهتيمامه‌وه‌ به‌ دوای پڕۆسه‌ی كۆنگره‌ ده‌كه‌ون و حه‌ز به‌ ئاگادار بوونی پڕۆژه‌كان و گۆڕانكاريه‌كان و به‌ڵێنه‌كان و تاوتوێ كردنی مانيفه‌ستۆ و بڕياره‌ چاره‌نووس سازه‌كانی كۆنگره‌ ده‌كه‌ن. پێويسته‌ ميديای ئازاد و بێ لايه‌ن به‌رده‌وام چاودێر بێ و ڕێپۆڕتاژ له‌ ناوه‌وه‌ی كۆنگره‌وه‌ له‌سه‌ر هه‌موو لايه‌نێكی پڕۆسه‌كه‌ پێشكه‌ش به‌ دونيای ده‌ره‌كی بكات. شايانی باسه‌ كه‌وا ميديا و ڕۆژنامه‌ زمانحاڵه‌كانی حيزب ئيمڕۆ نه‌ك ته‌نيا وه‌ك ئه‌وانه‌ی ڕژێمی ڕابوردوو بوونه‌ته‌ زوڕنای پێشڕه‌وی ميهره‌بان، به‌ڵكو هه‌ريه‌كه‌ له‌ ئه‌ندامانی مه‌كته‌بی سياسی يه‌كێتی بوونه‌ته‌ خاوه‌نی مينبه‌ری تايبه‌ت به‌خۆیان. دياره‌ كه‌ ميكانيزمی پاره‌ په‌يدا كردن بۆ ته‌مويلی مينبه‌ره‌كان هه‌مه‌جۆرن، هه‌يانه‌ له‌ سه‌ر حيسابی بودجه‌ی حيزب و حكومه‌تن و هه‌ندێكيشيان له‌ سه‌رچاوه‌ی ده‌ره‌كیه‌وه‌ په‌يدا ده‌كرێن و بێ گومان ده‌بنه‌ هۆی په‌يدا بوونی دژه‌به‌رژه‌وه‌ندی. پێويسته‌ ئه‌و ئۆڕگان و مينبه‌رانه‌ له‌ ژێر ده‌ستی سه‌ركرده‌كان بێنه‌ ده‌ره‌وه‌ و چيتر پاره‌ی حيزب و حكومه‌تيان لێ خه‌سار نه‌كرێ.

٧- چاودێری بێ لايه‌نكه‌شی كۆنگره‌ به‌ ململانێی بيروبۆچوون و فه‌لسه‌فه‌ و موناوه‌ره‌ی سياسیه‌كان مه‌شحون ده‌بێت. به‌شداری كردنی پسپۆڕ و چاودێرانی بێ لايه‌نی كوردی و غه‌يره‌ كوردی باشترين شايه‌تحاڵن بۆ پاراستنی ناوبانگ و مۆر كردنی شه‌هاده‌ی ميسداقيه‌تی كۆنگره‌ و شه‌رعيه‌تی هه‌ڵبژاردنی سه‌ركرده‌كان. بڕوانامه‌ی ئه‌وان‌ سه‌ركرده‌ هه‌ڵبژاردراوه‌كان له‌ گله‌يی و تاوانبار كردنی دواڕۆژ ده‌پارێزێت. دياره‌ كه‌ يه‌كێتی حه‌ز ده‌كات خۆی به‌ پارتێكی سۆشيال ديموكرات له‌ قه‌‌له‌م بدات، به‌ڵام له‌ ڕاستيدا يه‌كێتی نه‌ سۆشياله‌ و نه‌ ديموكراته‌ و هێشتا ئه‌و جۆره‌ پايه‌ی ميسداقيه‌ت و ديموكراسيه‌ته‌ی داگير نه‌كردوه‌ هه‌تاوه‌كو به‌ ئه‌ندامێكی سۆشيالديموكراتی نێو ده‌وڵه‌تی پايه‌دار له‌ قه‌له‌م بدرێ. بۆيه‌ وه‌ك ده‌سپێكێك، پێويسته‌ يه‌كێتی به‌ ده‌يان چاودێری بيانی له‌ كۆمه‌ڵگای سۆشيالديموكراتی نێوده‌وڵه‌تی بانگ بكاته‌ كۆنگره‌ و شه‌هاده‌تی شايه‌دی بێ لايه‌ن مسۆگه‌ر بكات.

٨- ڕۆڵی سكرتێری گشتیسكرتێری گشتی به‌ سروشت و به‌ پۆست و به‌ مێژوو، قورسايی و هه‌يبه‌ت و شه‌خسيه‌تێكی زاڵی هه‌يه‌. به‌و حوكمانه و به‌ حوكمی ئه‌زموون و هونه‌ری موڕاوه‌غه‌ی، كاريگه‌ری له‌سه‌ر لاسه‌نگ بوونی پارسه‌نگی كۆبوونه‌وه‌كان ده‌بێت. هه‌ڵبه‌ت سكرتێر له‌ كۆنگره‌دا ده‌بێته‌وه‌ ئه‌ندامێكی ئاسايی، وه‌ وه‌ك هه‌ر ئه‌ندامێكی تريش مافی به‌شداربوونی له‌ كۆبوونه‌وه‌كانی كۆنگره‌دا هه‌يه. به‌‌ڵام بۆ خاتری مسۆگه‌ر كردنی ئازادی ده‌ربڕين و متمانه‌ی ئه‌ندامان و سه‌رخستنی كۆبوونه‌وه‌كان، پێويسته‌ له‌ كۆنگره‌ی داهاتوودا سكرتێر به‌ گوێره‌ی توانا له‌ لێدوان و گفتوگۆكاندا نيمچه‌ دووره‌په‌رێز بێ وه‌يان ڕۆڵی براگه‌وره‌يه‌كی پارسه‌نگپارێز ببينێ نه‌وه‌ك لايه‌نگيرێكی ئه‌جێنداشێوێن.

۹- ليسته‌بازی و سزای گه‌نده‌ڵيیده‌مێكه‌ يه‌كێتی له‌ ده‌رد و په‌تای ته‌كه‌تولبازیدا ده‌ناڵێنێ. له‌و دواييه‌دا ململانێی ته‌كه‌توله‌كان گه‌يشته‌ ڕاده‌يه‌ك كه‌ بۆنی براكوژی لێ ده‌هات و ئاينده‌ی ڕێكخراوه‌كه‌ی خسته‌‌ مه‌ترسيه‌وه. له‌وه‌ ده‌چێ كه‌ پارسه‌نگی هێزه‌ موته‌كه‌تيله‌كان ئێستا گۆڕابن، به‌ڵام مانای ئه‌وه‌ نيه‌ كه‌ نه‌ماون و له‌وانه‌يه‌ به‌ پێوانه‌ و ليسته‌ی تازه‌وه‌ سه‌رهه‌ڵده‌نه‌وه‌‌. دياره‌ كه‌ له‌ هه‌موو ديارده‌يه‌ك تێكده‌رتر و ئابڕوبه‌رتر و مه‌زنترين وه‌سيله‌ی له‌ده‌ست دانی ميسداقيه‌ت و شه‌رعيه‌تی هه‌ڵبژاردنه‌كان بريتيه‌ له‌ ديارده‌ی ده‌نگ كڕين و فرۆشتن‌. له‌ كه‌ڵتوری يه‌كێتیدا شه‌ڕه‌ به‌رتيل و پێشبڕكێی ده‌نگ كڕين ده‌گاته‌ ڕاده‌ی بازرگانی. هه‌رله‌ پاره‌ی كاش و نه‌وت و به‌نزين و كارتی ته‌له‌فۆنه‌وه‌ بگره‌ تا ده‌گاته‌ به‌شينه‌وه‌ی زه‌وی و چه‌ك (ده‌مانچه‌) و واسته‌ی ته‌عين كردن و سوێندی ته‌ڵاق و ده‌يان شێوه‌ی تر. خۆ له‌ هه‌‌ڵبژاردنه‌كانی ڕابوردوودا سه‌ركرده‌كانی يه‌كێتی پاره‌ی خۆيان و بودجه‌ی به‌رده‌ستيان بۆ ده‌نگ كڕين به‌كار هێناوه. بۆيه‌ش ئه‌ندامان ترسيان له‌وه‌ نيشتوه‌ كه‌ ئه‌و نه‌ريته‌ له‌ كۆنگره‌ی ئه‌وجاره‌شيان به‌رده‌وام ده‌بێ. له‌ كۆنگره‌ی داهاتوودا، نه‌ك ته‌نيا پێويسته‌ هه‌موو شێوه‌يه‌ك له‌ شێوه‌كانی به‌رتيل و ده‌نگ كڕين قه‌ده‌غه‌ بكرێ، به‌ڵكو ده‌بێ به‌رتيلده‌ر و به‌رتيلوه‌رگر سزای قانونی و حيزبی بدرێن. ده‌بێ ڕێگه‌ به‌ هيچ مه‌سئولێكيش نه‌درێت كه‌ پاره‌ی ڕێكخراوه‌كه‌ يان هی حكومه‌ت بخاته‌ به‌رده‌ستی خه‌ڵكانێك كه‌ له‌ پڕۆسه‌ی سه‌رپه‌رشتيكردن و ئيداره‌ی كۆنگره‌ و هه‌ڵبژاردنه‌كاندا به‌شدار ده‌بن. پێويسته‌ حيسابی وورد بۆ هه‌موو داهات و خه‌رجیه‌كانی حيزب بكرێ و به‌ شه‌فافيانه‌ بخرێنه‌ به‌رده‌م كۆنگره‌ بۆ لێكۆڵينه‌وه‌ و لێپێچينه‌وه‌ له‌ لايه‌ن ئه‌ندامانی كۆنگره‌ و چاودێرانی (ڕه‌قابه‌ی) دارايی و بگره‌ ميديای ئازاديشه‌وه‌.

دواپه‌يام

يه‌كێتی پێويستی به‌ شۆرشێكی ته‌نزيمی و كه‌لتووری هه‌يه‌ كه‌ له‌ به‌ردی بناغه‌وه‌ هه‌يكه‌لی رێكخراوه‌كه‌ دابرێژێته‌وه‌. به‌لام ئه‌و شۆرشه‌ ده‌بێ له‌ ئاينده‌يه‌كی زوودا به‌رپا بكرێ، به‌رله‌وه‌ی كار له‌ كار بترازێ. خۆ ئه‌گه‌ر دوابخرێ ئه‌وا له‌ نقومبووندا به‌رده‌وام ده‌بێ. كۆنگره‌ی داهاتووی يه‌كێتی دوا تاقی كردنه‌وه‌ و دوا فرسه‌ته‌ بۆ په‌يدا كردنه‌وه‌ی ميسداقيه‌ت و شه‌رعيه‌ت بۆ ڕێكخراوه‌كه‌ و سه‌ركرده‌ هه‌ڵبژاردراوه‌كانی. به‌بێ ئه‌و ميسداقيه‌ت و شه‌رعيه‌ته‌، مه‌حاڵه‌ يه‌كێتی ببێته‌وه‌ ڕێكخراوێكی تۆكمه‌ و ڕێز لێ گيراو و ئه‌زه‌لی. مه‌سئوليه‌تی و‌ه‌ده‌ست هێنانی ئه‌و ميسداقيه‌ت و شه‌رعيه‌ته‌ش له‌ ئه‌ستۆی سكرتێری گشتی دايه‌ به‌ پله‌ی يه‌كه‌م و له‌ هی مه‌كته‌بی سياسی دايه‌ به‌ پله‌ی دووه‌م. سه‌ركه‌وتنی پڕۆسه‌ی به‌ديموكراسی كردنی يه‌كێتی نه‌ك ته‌نيا ده‌بێته‌ مايه‌ی ژيانه‌وه‌ی يه‌كێتی، به‌ڵكو يه‌كێتی ده‌كاته‌ پێشڕه‌وی به‌ديموكراسی كردنی موئه‌سسه‌سه‌كانی هه‌رێم و به‌ ديموكراسی كردنی حيزبه‌كانی تری گۆڕه‌پان، وه‌ دامه‌زارانی سيسته‌می ديموكراتی ده‌ستووری له‌ كوردستان، و پاراستنی ده‌ستكه‌وته‌ دێڕينه‌كانی بزوتنه‌وه‌ی كورد.

Thursday 1 May 2008

ڕيفۆرمی يه‌كێتی و ديموكراسيه‌تی هه‌رێم- به‌شی يه‌كه‌م

ڕيفۆرمی يه‌كێتی و ديموكراسيه‌تی هه‌رێم
به‌شی يه‌كه‌م: مه‌ترسی لاسه‌نگ بوونی پارسه‌نگی تاكڕه‌وه‌كان
پڕۆفيسۆر دلاوه‌ر عه‌بدولعه‌زيز عه‌لائه‌ددين
هاوڵاتی: ۳٠/٤/٢٠٠٨
له‌ دروست بوونيه‌وه‌ هه‌تا هه‌ره‌سی ١۹٧٥، پارتی ديموكراتی كوردستان به‌بێ هاوشان گۆڕه‌پانی بزوتنه‌وه‌ی ڕزگاريخوازی كوردی باشووری داگير كردبوو. بۆشاييه‌ سياسيه‌كه‌ی دوای هه‌ره‌س فرسه‌تێك بوو بۆ په‌يدابوونی كه‌ڵتووری فره‌ حيزبی، و بووه‌ هۆی سه‌رهه‌ڵدانی يه‌كێتی نيشتيمانی كوردستان و چه‌ند ڕێكخراوێكی تر. به‌ كۆتايی هاتنی حه‌فتاكان و له‌ ئه‌نجامی ململانێ هه‌مه‌لايه‌نه‌كان، يه‌كێتی له‌ نيوه‌ پتری هه‌رێمدا بۆشايی بزوتنه‌وه‌كه‌ی پڕ كرده‌وه‌ و بنكه‌‌یه‌كی جه‌ماوه‌ريی پانوبه‌رينی بۆ خۆی چه‌سپاند. هاوكات نه‌وه‌ی دووه‌می پارتی هاته‌وه‌ گۆڕه‌پان و نيوه‌كه‌ی تری بۆشاييه‌ سياسيه‌كه‌ی پڕ كرده‌وه‌. له‌و كاته‌وه‌، پارتی و يه‌كێتی وه‌ك دوو هێزی هاوشان و ململانێكه‌ر درێژه‌يان به‌ خه‌باتی ‌ پێشمه‌رگايه‌تی ناو شاخ و شه‌ڕی دوژمن و كه‌ڵتوری شه‌ڕی ناوه‌كی براكوژی دا. ناوچه‌ ئازاد كراوه‌كانی هه‌رێميشيان له‌ نێو خۆياندا سنووردار كرد. هيچ كاميان ئه‌وی تری به‌ شه‌ريك و خاوه‌نی شه‌رعی بزوتنه‌وه‌كه‌ دانه‌ده‌نا و ئه‌وه‌ی بۆشيان كرا بۆ له‌ناو بردنی يه‌كتر، كرديان. په‌نايان برده‌ به‌ر هه‌موو جۆره‌ وه‌سيله‌تێكی سياسی و عه‌سكه‌ری، شه‌رعی و ناشه‌رعی، مرۆڤانه‌ و نامرۆڤانه‌. ئيتر له‌جياتی كه‌ڵتووری فره‌حيزبی، كه‌لتووری دوو گه‌وره‌حيزبيی تاكڕه‌و هاته‌ كايه‌وه‌. له‌ دوای ڕاپه‌ڕينيش شار و شارۆچكه‌‌كانی هه‌رێم (هه‌ولێری لێ بترازێ) وورده‌ وورده‌ بوونه‌ ناوچه‌ی نفوزی ئه‌و دوو حيزبه و به‌ گوێره‌ی ژماره‌ی پێشمه‌رگه‌ و زاڵی ته‌نزيماتیان به‌سه‌رياندا دابه‌ش كران‌.

تاكه‌ فرسه‌تی فره‌حيزبيی
له‌ كۆتايی ١۹۹١ دا پارتی و يه‌كێتی به‌يه‌كه‌وه‌ چه‌نگيان له‌ ده‌فه‌ی حوكمڕانی گير بوو، به‌ڵام له‌وه‌ نه‌ده‌چوو كه‌ بيانه‌وێ ئيداره‌ و خاكی هه‌رێم له‌ت بكه‌ن. بۆيه‌ش كه‌مپه‌ينی هه‌ڵبژاردنه‌كانی يه‌كه‌م په‌رله‌مانی هه‌رێم (له‌ ١۹۹٢) هه‌لێكی زيڕينی بۆ سيسته‌می فره‌حيزبی هێنايه‌ پێشه‌وه. كه‌شێكی سياسی له‌بار بۆ ئازادی حيزبايه‌تی په‌يدا بوو كه‌ قابيلی پێشكه‌وتن و گه‌شه‌ كردن بوو. ديار بوو كه‌ بيركردنه‌وه‌ی خه‌ڵك و سه‌ركرده‌كانيش له‌ ڕوانگه‌ی سيسته‌می ديموكراسی ده‌ستووری و فره‌حيزبیه‌وه‌ هه‌ڵده‌قوڵا. ته‌نانه‌ت پارتی و يه‌كێتی به‌ر له‌ هه‌ڵبژاردنه‌كان وايان ڕاگه‌ياند كه‌وا ئاماده‌ن ئه‌نجامی ده‌نگدانه‌كه‌ قه‌بول بكه‌ن و ئه‌و لايه‌نه‌ی كه‌ ده‌يدۆڕێنێ ڕێگه‌ به‌وی تر بدات حكومه‌ت دابمه‌زرێنێ و خۆيشی وه‌ك ئۆپۆزيسيۆن به‌شداری له‌ عه‌مه‌ليه‌تی سياسیدا بكات. هاوكات، حيزبه‌كانی تريش چانسی پێسكه‌وتن و په‌يدا كردنی جه‌ماوه‌ر و ڕاكێشانی ده‌نگده‌رانيان له ‌به‌رده‌مدا بوو.
به‌داخه‌وه‌، ئه‌نجامی هه‌‌ڵبژاردنه‌كه‌ ڕێگه‌ی دامه‌زرانی كه‌ڵتووری فره‌ حيزبی نه‌دا. به‌ پێچه‌وانه‌وه‌، درێژه‌ی به‌ جووته‌ تاكڕه‌ويی دا، چونكه‌ پارتی و يه‌كێتی ده‌نگيان له‌يه‌ك نزيك بوو و كه‌سيان بايی دروست كردنی حكومه‌ت زۆرينه‌ی ئاشكرای وه‌ده‌ست نه‌هێنا. دياره‌ كه‌ حيزبه‌كانی تريش بايی ئه‌وه‌نده‌يان ده‌نگ نه‌هێنا كه‌ بتوانن به‌ قوڕساييه‌وه‌ و له‌ ڕێگه‌ی هاوپه‌يمانێتيدا پارسه‌نگی هێزه‌كان بگۆڕن. ئه‌و ئه‌نجامه‌ بووه‌ پێشينه‌ی كه‌ڵتووری حكومه‌تی ئيئتيلافی (فيفتی فيفتی). خۆ له‌به‌ر ئه‌وه‌ی چه‌قی ده‌سه‌ڵاتی پارتی و يه‌كێتی نه‌هاتنه‌ ناو حكومه‌ته‌وه‌، كابينه‌ی يه‌كه‌م و دووه‌م به‌ ئيفليجی مانه‌وه‌. شاراوه‌ نيه‌ كه‌وا ڕه‌فتار و هه‌ڵوێستی سه‌ركرده‌كان له‌ ئاستی مه‌سئوليه‌ته‌ مێژووييه‌كه‌دا نه‌بوو، و بۆيه‌ش كه‌شی سياسی هه‌رێم تا ده‌هات گرژتر ده‌بوو، و كۆتاييه‌كه‌ی به‌ شه‌ڕی براكوژی و كوژانه‌وه‌ی ئومێدی پێشكه‌وتن وگه‌شه‌پێدانی سيسته‌می فره‌حيزبیه‌وه‌ هات. له‌ ئه‌نجامدا، له‌ ١۹۹٦ ئيداره‌ی هه‌رێم بووه‌ دووله‌ت و هه‌ريه‌كه‌ له‌ پارتی و يه‌كێتی ڕژێمی (حيزبی قائيد)ی به‌ شێوازی كۆنه‌په‌رست و ڕۆژهه‌ڵاتيانه‌ له‌ به‌شه‌كه‌ی خۆی دامه‌زراند. ئه‌و ڕژێمانه له‌ ناوه‌رۆكدا هه‌تا ئيمڕۆش (له‌ دوای يه‌ك گرتنه‌وه‌ لۆتكه‌ييه‌كه‌ی دوو ئيداره‌كه) هه‌ر به‌رده‌وامن‌. ئێستاش تۆڕی حيزب و حكومه‌ت له‌ هه‌ردوولادا تێكهه‌ڵكێشراون، و ده‌زگا موخابه‌راتی و پۆليسی و عه‌سكه‌ريه‌كان به‌ شێوه‌ی مۆنۆپۆڵی له‌ ده‌ستیان ماون. به‌شداری كردنی حيزبه‌ بچوكه‌كانيش له‌ گشت كابينه‌كانی ئيداره‌ يه‌ك گرتوو و يه‌ك نه‌گرتووه‌كاندا له‌ مه‌سه‌له‌يه‌كی سيمبۆڵی تێنه‌په‌ڕیوه‌.
پێكه‌وه‌ژيانی دوو تاكڕه‌و
دياره‌ كه‌ له‌ ١۹۹٨ به‌ولاوه‌، پارتی و يه‌كێتی ته‌سليمی ئه‌و ڕاستيه‌ بوون كه‌وا‌ هيچ كاميان ئه‌وی تری پێ له‌ناو نابرێ و بۆيان باشتره‌ كه‌ حاڵه‌تی پێكه‌وه‌ ژيان و پێكه‌وه‌ حوكمڕانيی قه‌بوول بكه‌ن. به‌رژه‌وه‌ندیه‌ عيراقيه‌كانی دوای ڕوخانی ڕژێمی سه‌دداميش هانده‌ری مه‌زن بوون بۆ يه‌ك گرتنه‌وه‌ی لوتكه‌يی دوو ئيداره‌كه‌. به‌ڵام له‌گه‌ڵ ئه‌و تێكه‌ڵبوونه‌دا، هه‌ردوو حيزب‌ به‌رده‌وام چاوی زه‌قی چاودێريكردنيان بڕيوه‌ته‌ يه‌كتر و هه‌موو هه‌ل و ده‌ستكه‌وتێكی سياسی و عه‌سكه‌ری و ئابووری و كۆمه‌ڵايه‌تی له‌ نێو خۆياندا به‌ش ده‌كه‌ن. له‌وه‌ش‌ ناچێ كه‌ نيازی به‌شداری پێ كردنی حيزبێكی تر له‌ ده‌سه‌لات و داڕێژتتی ده‌ستوورێكی ديموكراسی سه‌رده‌ميانه‌‌يان هه‌بێ. ئيتر، ئه‌گه‌ر سيسته‌م به‌ شێوه‌ی حوكمڕانی ئێستا به‌رده‌وام بێ، ئه‌وا ڕێگه‌ی په‌يدابوونی سيسته‌می پێشبڕكێی دووحيزبی وه‌يان فره‌حيزبی نادرێ. وه‌ جياوازی و به‌رامبه‌ركێ و ململانێی سياسیه‌كه‌ی پارتی و يه‌كێتی بايی ئه‌وه‌نده‌ كپ ده‌كرێ كه‌ پێكه‌وه‌ ژيانيان له‌ مالجوداييه‌كه‌يان پێ باشتر بێ. بۆيه‌ش چاوه‌ڕێ ناكرێ كه‌وا هيچ كام له‌و دوو حيزبه‌ ببنه‌ پێشڕه‌وی داهێنانی شۆڕشی وڵاتسازی و دامه‌زرانی سيسته‌می ديموكراسی.
ململانێ و ڕێكه‌وتن
ململانێی سياسی نێوان پارتی و يه‌كێتی له‌ ئاستی نێوده‌وڵه‌تيدا زيانبه‌خش بووه، به‌ڵام دوور له‌ براكوژی، پێشبڕكێكه‌يان له‌ ئاستی ناوه‌كی هه‌رێمدا سوودی بۆ دۆزی كورد هه‌بووه‌، و تا ڕاده‌يه‌ك بووه‌ته‌ مايه‌ی داهێنانی كه‌ڵتووری ئازادی ده‌ربڕين و ديالۆگی فه‌لسه‌فی و مشتومڕی سياسی. به‌ پێچه‌وانه‌شه‌وه‌، ڕێكه‌وتنی ئه‌و دوو گه‌وره‌ حيزبه‌ له‌ شانۆی نێوده‌وڵه‌تيدا سوودبه‌خش بووه و ده‌ستكه‌وتی ستراتيژی چاره‌نوس سازی بۆ كورد مسۆگه‌ر كردوه، به‌ڵام بۆ حوكمڕانی ناو هه‌رێم زه‌ره‌ری له‌ سوودی زياتر بووه‌. ئه‌و دووانه‌ به‌يه‌كه‌وه‌ ڕێگه‌يان‌ له‌ پڕۆسه‌ی ڕيفۆرمی سياسی و چاكسازی ئيداری و چاودێریكردنی ده‌سه‌لات و پاراستنی مافی مرۆڤ و ئازادی ڕۆژنامه‌وانی ‌گرتووه‌. جێگه‌ی سه‌رسوڕمان نيه‌ كه‌ حوكمڕانيه‌تی پێكڕايان گه‌نده‌ڵيی زياد كردوه‌ و حكومه‌تی كه‌مبه‌رهه‌م كردوه‌ و بزوتنه‌وه‌ی كوردی لاواز كردوه‌.
دابه‌زينی پارتی و يه‌كێتی به‌ ليستی هاوبه‌ش له‌هه‌ڵبژاردنه‌ سه‌رتاسه‌ريه‌كه‌ی عيراقی‌ ٢٠٠٥ و داپلۆسينی ده‌نگی ئۆپۆزيسيۆن و ته‌زويری ئاشكرا، ڕێگه‌ی هيچ جۆره‌ ئيختيارێكی بۆ خه‌ڵك نه‌هێشت. بۆيه‌ش پارتی و يه‌كێتی پێويستیان به‌ خه‌بات كردن و خۆ ماندوو كردن و كارچاكی و ڕازی كردنی ده‌نگده‌ران نه‌بوو‌. به‌ هه‌مان شێوه‌، ئه‌ندام په‌رله‌مانه‌ "ته‌عين كراوه‌كان" پێويستيان به‌ كه‌مپه‌ينی ڕازی كردنی خه‌ڵكی مه‌ڵبه‌نده‌ ئينتيخابيه‌كان نه‌بوو چونكه‌ ناويان له‌ ليسته‌ی حيزبدا ڕيز كرابوو، ته‌نيا پێويستيان به‌ وه‌لائی كوێرانه‌ بۆ سه‌رۆكی حيزبه‌كانيان هه‌بوو. ئه‌وه‌ وای كرد‌ كه‌ هه‌ريه‌كه‌ له‌ ئه‌ندام و سه‌ركرده‌كانی پارتی و يه‌كێتی له‌ حوكمی خۆیان دڵنيا بن و له‌ خه‌ڵك بێ منه‌ت بن و به‌ ويست و هه‌وه‌سی خۆیان ده‌نگی ئۆپۆزيسيۆن ببڕن. له‌وه‌ ده‌چێ كه‌وا پارتی و يه‌كێتی له‌سه‌ر دووباره‌ كردنه‌وه‌ی ئه‌و گه‌مه‌ ديموكراسيه‌ شێواوه‌ له‌ هه‌ڵبژاردنی ٢٠٠۹دا ڕێك كه‌وتبن و له‌ دوای ئه‌ويشدا شێوازی ئێستای حوكمڕانی ئيئتيلافيان به‌رده‌وام بكه‌ن.
دياره‌ كه‌ بارودۆخی ناهه‌مواری كوردستان ڕێگه‌ی بۆ شێوازی حوكمڕانی فيفتی فيفتی و درێژه‌پێدانی ئه‌و حكومڕانيه‌ خۆش كردوه‌، به‌ڵام ئه‌و جۆره‌ حوكمڕانيه‌ ناسروشتيه‌ له‌ بارودۆخی ئاسايی و هه‌مواردا ئيفليجكه‌ره‌ و به‌رژه‌وه‌ندی وڵات و ميلله‌تی پێ ناپارێزرێ. بۆيه‌، هه‌رده‌م له‌ به‌رژه‌وه‌ندی به‌رزی كورد دايه‌ كه‌ ستراتيژيه‌تی ده‌ره‌كی پارتی و يه‌كێتی يه‌ك گرتوو بێ، به‌ڵام پێشبڕكێی سياسی ناو هه‌رێميان به‌رده‌وام بێ.
پێشبڕكێی تاكڕه‌وه‌ هاوسه‌نگه‌كان
ئه‌وانه‌ی سه‌ره‌وه‌ ئه‌وه‌ ناگه‌يه‌نن كه‌وا هاوكێشه‌ی پارتی و يه‌كێتی له‌ هاوسه‌نگيه‌كی موسته‌قير دايه‌ و مه‌ودای ململانێ و پێشبڕكێی نێوانيان ته‌سك بۆته‌وه‌، وه‌يان ڕێكه‌وتنی نێوانيان هه‌تاسه‌ريه‌ و له‌گه‌ڵ گۆڕانی بارودۆخدا هاوكێشه‌كه‌يان‌ لاسه‌نگ نابێ. به‌ پێچه‌وانه‌وه‌، پێشبڕكێی پارتی و يه‌كێتی تا ڕاده‌ی هه‌ڵچوون به‌رده‌وامه‌. وه‌ك دوو شه‌ريكی ناحه‌ز، ‌يان دوو برای دوژمن، هه‌رده‌م چاودێری يه‌كترين و چاوه‌ڕێی قۆستنه‌وه‌ی فرسه‌تن‌ بۆ ئه‌وه‌ی يه‌كتر لاواز بكه‌ن و به‌ڕ له‌ ژێر پێی يه‌كتری ده‌ربێنن. به‌رده‌وام بوونی ئه‌و جۆره‌ پێشبڕكێ و ململانی سياسيه‌‌ هاوسه‌نگه‌ له‌ قازانجی دۆزی كورد و خه‌ڵكی هه‌رێم دايه‌. واته‌ ئه‌گه‌رچی پارتی و يه‌كێتی هه‌ردووكيان تا ئێستا ڕێگرن له‌ پڕۆسه‌ی ديموكراسيه‌ت، به‌ڵام مانه‌وه‌یان به‌ هاوتوانایی هه‌تا په‌يدا بوونی ده‌ستوورێكی ديموكراسی پێويسته‌. چونكه‌ ئه‌گه‌ر هه‌ريه‌ك له‌و دوو حيزبه‌ له‌ناكاو بفه‌وتێ و له‌ گۆڕه‌پان نه‌مێنێ ڕه‌نگه‌‌ ئه‌وه‌ی تريان هه‌وڵ بدات به‌ تاكڕه‌وانه‌ بۆشاييه‌كه‌ پڕ بكاته‌وه و ڕێگه‌ له‌ سه‌رهه‌ڵدانی به‌ديلی تر بگرێ. پاراستنی پارسه‌نگی هاوتوانايی يه‌كێتی و پارتی، وه‌ ئه‌نجامدانی شۆڕشی ڕيفۆرمی سياسی و ئيداری له‌ هه‌ردوو حيزبدا له‌ به‌رژه‌وه‌ندی به‌رزی ئێستا و ئاينده‌ی حيزبه‌كان و سه‌ر‌كرده‌كان و خه‌ڵك و خاكی كوردستاندايه‌.
لاسه‌نگ بوونی پارسه‌نگ
پرسياری گرنگ لێره‌دا ئه‌وه‌يه‌ ئايا قه‌يرانی ناوه‌كی كامه‌يان گه‌يشتۆته‌ ئه‌و ڕاده‌يه‌ی كه‌ گومان له‌ ئاينده‌ی بكرێ، و مه‌ترسی گۆڕه‌پان چۆل كردنی به‌وزوانه‌ی لێ بكرێ و به‌ هۆيه‌وه‌ پارسه‌نگی هێزه‌كان لاسه‌نگ ببێ؟ پارتی و يه‌كێتی هه‌ردووكيان له‌ قه‌يرانی سياسیدان و له‌ گه‌رده‌لوولی گه‌نده‌ڵيی ئاڵاون و متمانه‌ی خه‌ڵكيان له‌ده‌ست داوه‌. به‌ڵام له‌ ڕووی ڕێكخراوه‌يی و بارودۆخی ناوه‌كيدا، يه‌كێتی نيشتيمانی كوردستان‌ موڕه‌شه‌حی يه‌كه‌مه‌ بۆ هه‌ڵوه‌شانه‌وه‌. به‌ هه‌موو پێناسه‌ و لێك دانه‌وه‌يه‌ك، پارسه‌نگی نێوان ئه‌و دوو حيزبه‌ ده‌مێكه‌ به‌ ديوی قوڕسی پارتيه‌وه‌ لاسه‌نگ بووه‌. گرفته‌كانی يه‌كێتی وه‌ك تۆپه‌ به‌فريان لێ هاتووه‌ و له‌گه‌ڵ گلۆربوونه‌وه‌ و به‌سه‌ر چوونی كاتدا، هه‌روا مه‌زنتر ده‌بێ. هاوكات، له‌وه‌ ناچێ كه‌وا چ جۆره‌ ستراتيژيه‌تێك وه‌يان به‌رنامه‌يه‌كی مه‌دروس بۆ چاره‌سه‌ری ئه‌و گرفته‌ چاره‌نوسيانه‌ له لايه‌ن سه‌ركرده‌كانه‌وه‌ له‌‌ ئامێز گيرابێ. به‌بێ هيممه‌تێك و هه‌ڵمه‌تێكی سه‌رتاسه‌ريی و گۆڕانكاری بنه‌ڕه‌تی له‌ پێكهاته‌كه‌‌ی يه‌كێتيدا، مه‌حاڵه‌ ئه‌و ڕێكخراوه‌ هه‌ڵسێته‌وه‌ سه‌رپێ و بێته‌وه‌ مه‌يدانی ململانێی سياسی بۆ به‌رده‌وامێتی ده‌سه‌لات و هاوسه‌نگێتی پارتی. ته‌نيا هۆكاری گه‌شبينی له‌وه‌دايه‌ كه‌وا به‌ كه‌ڵتوور و به‌ پێكهاته‌، يه‌كێتی توانای هه‌ڵسانه‌وه‌ و ژيانه‌وه‌ی له‌ ڕابوردوودا هه‌بووه‌ و ئێستاش له‌وه‌ ده‌چێ بڕێكی تێدا مابێ‌. دياره‌ كه‌ خاڵی هانده‌ريش ئه‌وه‌يه‌ كه‌وا حاڵی خراپی ڕێكخراوه‌كه‌ گه‌يشتۆته‌ ئه‌و ڕاده‌يه‌ی كه‌وا هيچ چاره‌يه‌كی تری له‌به‌رده‌م نه‌ماوه‌‌‌ له‌ غه‌يری تاودانی ئه‌سپی ڕيفۆرم به‌ ئاراسته‌ی مه‌يدان.
پێشڕه‌وی ديموكراسيه‌ت
بێ گومان ململانێی ديموكراسيانه‌ به‌ ئاسانی له‌ نێوان دوو حيزبی تاكڕه‌ودا له‌ دايك نابێ. هيچ نه‌بێ يه‌كێك له‌و دوو حيزبانه‌ ده‌بێ له‌ ناخدا ده‌ستووری ديموكراسی مۆدێرن له‌ ئامێز بگرێ، و به‌ هۆيه‌وه‌ جله‌وی پێشكه‌وتنی كۆمه‌ڵ و پێشڕه‌وێتی گۆڕانكاری سياسی له‌ گۆڕ‌‌پانه‌كه‌دا وه‌ده‌ست بێنێ. ئايا له‌ پارتی و يه‌كێتی كامه‌يان بايی ئه‌وه‌نده‌ توانای نوێسازی تێدايه‌ كه‌ بتوانێ خۆی بۆ پێشبڕكێيه‌كی ديموكراسی درێژخايه‌ن ئاماده‌ بكات و پێشڕه‌ويی له‌ داهێنانی پڕۆسه‌ی ڕيفۆرمی هه‌رێم بكات؟
يه‌كێتی له‌ دروست بوونی دا، به‌ڵێنی ئيختياری به‌ديل و دامه‌زراندنی موئه‌سسه‌سه‌ی ديموكراسی به‌ديلی به‌ خه‌ڵكی كوردستان دا، و توێژێكی پان و به‌رينی ڕۆشنبيرانی له‌ ده‌وره‌ی ئازادی ده‌ربڕين و به‌ڵێنی ديموكراسيه‌ت كۆ كرده‌وه‌‌. كه‌چی له‌ دوای زياتر له‌ سی (۳٠) ساڵ له‌ خه‌باتی شاخ و شاردا، و له ‌دوای گه‌يشتن به‌ چايه‌ری ده‌سه‌ڵات، ڕێكخراوه‌كه‌ زۆربه‌ی ناوه‌رۆكه‌ فه‌لسه‌فيه‌ به‌ناو ديموكراسيه‌كه‌ی له‌ده‌ست داوه. ئيمڕۆ نه‌ك ته‌نيا له‌ پێكهاته‌ و ڕه‌فتار و به‌رنامه‌ و ستراتيژيه‌تدا جياوازيه‌كی ئه‌وتۆی له‌گه‌ل پارتی نه‌ماوه، و به‌ڵكو له‌ زۆربه‌ی حاڵه‌تدا بۆته‌ پاشڕه‌ویشی. ئيمڕۆ پارتی پێشڕه‌وێتی سياسی و حوكمڕانی هه‌رێم ده‌كات و موباده‌ره‌ی له‌ سه‌ر‌كرده‌كانی يه‌كێتی ‌سه‌ندۆته‌وه‌. ئه‌و حاله‌ته‌ وای كردوه‌ كه‌ يه‌كێتی له‌ ئالقه‌يه‌كی حه‌له‌زۆنی سه‌ربه‌ره‌وخواردا بخولێته‌وه‌‌، و له‌گه‌ڵ تێپه‌ڕبوونی كاتدا توانای پێشڕه‌ویی كه‌متر ببێ.
شاراوه‌ نيه‌ كه‌وا مه‌جالی گۆڕانكاری ديموكراسی له‌ ناو يه‌كێتيدا زۆر زياتره‌ وه‌ك له‌ پارتی. ئه‌گه‌رچی به‌ به‌راورد، حاڵی يه‌كێتی له‌ هی پارتی شڕتره‌، به‌ڵام پارتيش له‌ قه‌يرانی سياسی مه‌زن دايه‌ به‌بێ ئه‌وه‌ی پێوه‌ی ديار بێ. ئه‌و كاته‌ی كه‌ يه‌كێتی ناوماڵی ته‌رتيب ده‌كات و توانای ململانێ په‌يدا ده‌كاته‌وه‌، ئه‌وجا پارتی پێويستی به‌ خۆ كۆكردنه‌وه‌ و ڕاكردن به‌ شوێنی يه‌كێتيدا ده‌بێ. به‌ڵگه‌نه‌ويسته‌ كه‌ ئه‌نجامدانی چاكسازی له‌ ناو يه‌كێتیدا ڕه‌نگدانه‌وه‌ی ڕاسته‌وخۆی له‌ سياسه‌تی ناوه‌كی و ده‌ره‌كی پارتيه‌وه‌ ده‌بێ، بۆيه‌ يه‌كێتی ده‌توانێ پێشڕه‌وی گۆڕانكاری له‌ ڕيزه‌كانی خۆی و پارتيشدا بكات. كادر و مه‌سئوله‌ گه‌وره‌كانی پارتی، ئه‌وانه‌ی له‌ ده‌ره‌وه‌ی چه‌قی ده‌سه‌ڵاتن، به‌ ئاشكرا دان به‌وه‌ داده‌نێن كه‌وا چاويان بڕيوه‌ته‌ پڕۆسه‌ی چاكسازی ناو يه‌كێتی، تا به‌ هۆيه‌وه‌ ته‌نكه‌ جموجۆڵێكی چاكسازی له‌ ناو پارتیشدا په‌يدا ببێ.
ڕيفۆرم له‌ ئه‌ستۆی كێيه‌؟
به‌ گوێره‌ی گۆته‌كانيان، سه‌ركرده‌كانی پارتی و يه‌كێتی خه‌مخۆری وڵاتن و هاوخه‌باتی ميلله‌تن. وای ده‌رده‌خه‌ن كه‌وا ئاگاداری ده‌ردی خه‌ڵكن و ده‌يانه‌وێ ميلله‌ت و وڵات له‌ په‌تای گه‌نده‌ڵيی بپارێزن و سيسته‌می ديموكراتی ده‌ستووری دابمه‌زرێنن. به‌ڵام به‌ خوێندنه‌وه‌ی خه‌ڵك و چاودێران، ڕه‌فتار و هه‌ڵوێسته‌كانی سه‌ركرده‌كان به‌ پێچه‌وانه‌ی ئه‌و گۆتانه‌يه‌، به‌ڵكو له‌وه‌ ده‌چێ كه‌ له‌ ميلله‌تيان بێ منه‌ت بن و ئه‌وه‌ی له‌ به‌رژه‌وه‌ندی خۆياندا بێ بيكه‌ن به‌بێ ئه‌وه‌ی گوێ بده‌نه‌‌ ڕه‌خنه‌ و‌ ده‌رد و موعاناتی خه‌ڵك و له‌ده‌ستدانی دۆست و ناوزڕانی حكومه‌تی هه‌رێم له‌ جيهاندا. ئه‌گه‌ر ئه‌و خوێندنه‌وه‌يه‌ ڕاست بێ ئه‌وا ڕه‌فتاری ئه‌و سه‌ركردانه‌ی كورد‌ ڕه‌نگدانه‌وه‌ی عه‌قليه‌تی ئه‌و مه‌دره‌سه‌ حوكمڕانیه‌ ڕۆژهه‌ڵاتيانه‌يه كه‌ تێيدا په‌روه‌رده‌ بوونه‌. هه‌ڵبه‌ته، مه‌سئوليه‌تی ڕاست كردنه‌وه‌ی هه‌ڵه‌كان و چاك كردنی بارودۆخ و پته‌وكردنی په‌يوه‌ندی نێوان ميلله‌ت و ده‌سه‌ڵات له‌ ئه‌ستۆی سه‌ركرده‌كانی پارتی و يه‌كێتيه‌ به‌ گشتی، و له‌ ئه‌ستۆی دوو سه‌رۆكه ده‌سه‌ڵاتداره‌‌كه‌ی لوتكه‌ی ئه‌و دوو حيزبه‌يه‌ به‌ تايبه‌تيی. شايانی جه‌ختكردنه‌ كه‌وا ڕه‌فتار و هه‌ڵوێست و بڕياری ئه‌و دوو تاكه‌ سه‌رۆكه،‌ ڕێخۆشكه‌ره‌ بۆ (وه‌يان ئه‌گه‌ر بيانه‌وێ ڕێگره له‌)‌‌ كاروانی پێشكه‌وتن و داهێنانی كه‌ڵتوری شارستانی و دامه‌زرانی ده‌وڵه‌تی كوردی.
ڕيفۆرمی يه‌كێتی و ديموكراسيه‌تی هه‌رێم
له‌وه‌ته‌ی دروست بوونيه‌وه هه‌تا گه‌يشتنی به‌ ده‌فه‌ی حوكمڕانی‌، يه‌كێتی له‌ ده‌ريای خوێناوی سياسه‌تی عيراقیدا مه‌له‌وانی كردوه‌ و به‌ره‌نگاری شه‌پۆڵه‌ دژواره‌كان بۆته‌وه‌. سه‌ره‌ڕای ناته‌بايی باڵه‌ ململانێكه‌ره‌كانی، يه‌كێتی له‌ ڕووی هێرش و مه‌ترسی ده‌ره‌كيدا هه‌رده‌م به‌ يه‌ك گرتوويی هاتۆته‌ به‌رچاو و له‌ هيچ شه‌ڕێكی ده‌ره‌كيدا توشی هه‌ره‌سی سه‌رتاسه‌ريی نه‌بووه‌. پاراستنی پارسه‌نگی هێزه‌ ململانێكه‌ره‌كان و كه‌سايه‌تيه‌ ناته‌باكانی ناو يه‌كێتی كارێكی ئاسان نه‌بووه‌، و ئاستی كرژی و ناكۆكی باڵه‌‌ موته‌كه‌تيله‌كان ده‌م نا ده‌م گه‌يشتونه‌ته‌ ڕاده‌ی ته‌قينه‌وه، و بوونه‌ته‌ هۆی جيابوونه‌وه‌ی گروپی گچكه‌ و گه‌وره‌. به‌ڵام له‌ ڕۆژی دروست بوونيه‌وه هه‌تا ئيمڕۆ، خاڵی هاوبه‌شی لايه‌نه‌ ململانێكه‌ره‌كانی ناو يه‌كێتی بريتی بووه‌ له‌ خودی تاكه‌ كه‌سی سكرتێری گشتی. ئه‌و خاڵه‌ هاوبه‌شه‌، زامينكه‌ری مانه‌وه‌ی يه‌كێتی بووه‌. هه‌ر باڵ و گڕوپ و كه‌سێكی كه‌ هه‌وڵی داوه‌ به‌بێی سكرتێر له‌ ڕێكخراوه‌كه‌ بترازێ دۆڕاو بووه. به‌وانه‌ش ده‌سه‌ڵاتی سياسی و مه‌عنه‌وی سكرتێری گشتی هه‌تا ڕاده‌ی بێ هاوتايی ڕووی هه‌ر له‌ به‌هێزبووندا بووه‌. ته‌نانه‌ت، ئێستا به‌لای زۆر خه‌ڵكه‌وه‌ يه‌كێتی و سكرتێره‌ گشتیه‌كه‌ی بوونه‌ته‌ دوو زاراوه‌ بۆ هه‌مان واتا. ‌
خاڵی هاوبه‌ش و جياكه‌ره‌وه‌
دياره‌ كه‌ له‌ سه‌رده‌می حوكمڕانيدا، به‌رژه‌وه‌ندی نفوز و دارايی و ته‌كه‌تولی ناوچه‌گه‌رێتی جێگه‌ی ململانێی فه‌لسه‌فی و ڕێكخراوه‌يی له‌ ناو يه‌كێتيدا گرتۆته‌وه‌. له‌ سه‌ره‌تای نه‌وه‌ده‌كان دا به‌رژه‌وه‌نديه‌ داراييه‌كانی يه‌كێتی و حكومه‌تی هه‌رێم كه‌م بوون، پارتی و يه‌كێتی به‌رده‌وام خه‌ريكی چاودێری يه‌كتری بوون، بۆيه‌ش ڕاده‌ی گه‌نده‌ڵيی و ململانێی ناوه‌كی له‌ ڕێكخراوی يه‌كێتيدا به‌و‌ پله‌يه‌ی ئێستا وا‌ زه‌ق نه‌بوو. دواتريش براكوژی هاته‌ كايه‌وه‌ و باڵه‌كانی ناو يه‌كێتی به‌ يه‌كتر به‌سته‌وه‌. به‌ڵام له‌ كۆتايی نه‌وه‌ده‌كان به‌و لاوه‌، يه‌كێتی مۆنۆپۆلی ده‌سه‌لات و دارايی له‌ نيوه‌ی هه‌رێمی كوردستانی باشووردا مسۆگه‌ر كرد، و بووه‌ (حيزبی حاكمی بێ مونازيع) و سكرتێری گشتيش بووه‌ چه‌قی هه‌موو ده‌سه‌ڵاتێكی ته‌شريعی و ته‌نفيزی سياسی و قانونی و عه‌سكه‌ری و دارايی و زانياری و كۆمه‌ڵايه‌تی و هتد. ئيمڕۆ بۆ هه‌ر بڕيارێكی چاره‌نوس سازی سياسی و دارايی، سه‌رۆك پێويستی به‌ ڕاوێژكاری و ڕازی كردنی مه‌كته‌بی سياسی و كۆميته‌ی سه‌ركردايه‌تی نه‌ماوه‌. ئه‌و ده‌سه‌ڵاته‌يش‌ له‌ هه‌رێمێكی بچووك و به‌ داراييه‌كی چه‌ند مليۆنيه‌وه‌ له‌ناكاو له‌ دوای ڕوخانی ڕژێمی سه‌ددام گه‌يشته‌ ئاستێكی نێو ده‌وڵه‌تی، به‌ داراييه‌كی چه‌ند ملياريه‌وه‌. ئيمڕۆ په‌يوه‌ندی كادران به‌ سه‌ركرده‌كانه‌وه‌ بووه‌‌ته‌ هی مووچه‌خۆريی، په‌يوه‌ندی سه‌ركرده‌كان به‌ سكرتێری گشتیه‌وه‌ بووه‌ته‌ هی وه‌لائی تاكه‌ كه‌سيی. بازنه‌كانی ده‌وره‌ی سكرتێر بوونه‌ته‌‌ تاكه‌ پێناسه‌ بۆ ده‌سه‌ڵاتدارێتی و نفوزبڵاوی و توانای ده‌وڵه‌مه‌ند بوون. ئيتر سكرتێری‌ گشتی كه‌ هه‌رده‌م خاڵی هاوبه‌شی ڕيزه‌ ناته‌باكانی ناو يه‌كێتی بوو، بووه‌‌ته‌ خاڵی جياكه‌ره‌وه. بووه‌ته‌‌ جياكه‌ره‌وه‌ی خودی خۆی له‌ قاعيده‌ی ڕێكخراوه‌كه‌، و هی سه‌ركرده‌كان له‌ جه‌ماوه‌ر‌، و كاديره‌ مشه‌خۆره‌كان له‌ ميلله‌ت.

له‌و ساڵانه‌ی دواييدا بازنه‌ی سكرتێری گشتی به‌ ڕاده‌يه‌كی وا ته‌سك بووه‌‌‌وه كه‌ ئه‌ندام مه‌كته‌ب سياسی و سه‌ركرده‌ی باڵه‌ موته‌كه‌تيله‌‌كانی ناو يه‌كێتی خۆيان به‌ لاته‌ريك و بێگانه‌ ده‌زانی. ئه‌گه‌رچی ته‌نيا چه‌ند دانه‌يه‌كيان ئاماده‌يی ده‌ربڕينیان هه‌بوو، كه‌چی هيچ كام له‌ سه‌ركرده‌كان له‌ ڕه‌فتاری تاكڕه‌وانه‌ی سكرتێری گشتی ڕازی نه‌بوو. ئه‌و دياردانه‌‌ بوونه‌ هه‌وێنی ئه‌و هه‌وڵه‌ كوده‌تايه‌ی ساڵی ٢٠٠٥‌ كه‌ خه‌ريك بوو ببێته‌ مايه‌ی خوێن ڕێژيی و هه‌ڵته‌كانی بنه‌مای يه‌كێتی. له‌ جياتی ئه‌وه‌ی هه‌وڵی‌ كوده‌تايه‌كه‌ ببێته‌ هانده‌رێك بۆ به‌ ئاگا هێنانه‌وه‌ی سكرتێری گشتی و ئه‌نجامدانی ڕيفۆرم، كه‌چی كه‌ڵتووری ته‌كه‌تولچێتی زياتر چه‌قاند، و خه‌نده‌قی نێوان سكرتێر و هاوڕێ سه‌ركرده‌ دێڕينه‌كانی فراوانتر كرده‌وه‌. هاوكات بووه‌ هۆی له‌يه‌ك نزيك بوونه‌وه‌ی سكرتێری گشتی له‌ سه‌ركرده‌كانی پارتی له‌ سه‌ر حيسابی يه‌كێتی. وه‌ ڕۆڵی ئه‌ندامانی بنه‌ماڵه‌ی سكرتێريش له‌ جيهازه‌ زانياری و داپلۆسه‌ر و داراييه‌كانی ديوی يه‌كێتیدا زيادی كرد. ئه‌وانه‌ش‌ قه‌يرانی يه‌كێتيان به‌ره‌و قوڵتری برد و ئاينده‌ی ڕێكخراوه‌كه‌يان زياتر خسته‌ مه‌ترسيه‌وه‌.

شۆڕشی ته‌نزيم له‌ يه‌كێتيدا
ئيمڕۆ زۆران له‌ كادر و ئه‌ندامانی يه‌كێتی خۆيان و ڕێكخراوه‌كه‌يان به‌ بێ ڕێڕه‌و ده‌بينن و ئومێديان به‌ دواڕۆژ لاواز بووه‌. هه‌ندێك له‌ كادره‌ پێشكه‌وتووه‌كان گه‌يشتونه‌ته‌ ئه‌و قه‌ناعه‌ته‌ی كه‌وا ڕزگار كردنی يه‌كێتی پێويستی به‌ شۆرشێكی ته‌نزيمی وا هه‌يه‌ كه‌ هيچ كام له‌ سه‌ركرده‌كان ئاماده‌ی به‌رپاكردنی نين. به‌ لای ئه‌وانه‌وه‌ تازه‌ كاری يه‌كێتی گه‌يشتۆته‌ خاڵی ترازان و به‌ چاوه‌ڕێی وون بوونی خاڵه‌ هاوبه‌شه‌كه‌ و چه‌قی ده‌سه‌ڵاته‌كه‌يه‌تی و له‌ دوای ئه‌ويشدا فه‌وتانی مسۆگه‌ره‌. ئه‌و ئه‌نجامه‌ش، هه‌روه‌ك باس كرا، مه‌ترسيداره‌ بۆ پرۆسه‌ی ديموكراسيه‌ت له‌ كوردستان و له‌وانه‌يه‌ ببێته‌ مايه‌ی لاسه‌نگ بوونی پارسه‌نگی هێزه‌كانی هه‌رێم.
ئه‌و جۆره‌ لێكدانه‌وه‌يه‌ خه‌ياڵ نيه‌، به‌ڵكو له‌ واقيعی تاڵی ناو ڕێكخراوه‌كه‌وه‌ هه‌ڵقوڵاوه. وه‌ زيانبه‌خشيش نيه‌، به‌ڵكو هانده‌رێكی مه‌زنه‌ بۆ چاك كردنی بارودۆخ و خه‌بات كردن بۆ ژياندنه‌وه‌ و سه‌رله‌نوێ داڕێژتنه‌وه‌ی يه‌كێتی. ئيمڕۆ حاڵی ئه‌و ڕێكخراوه‌ وا شپڕزه‌يه‌ كه‌ هيچ چاره‌يه‌كی تری له‌به‌رده‌مدا نيه‌ له‌ غه‌يری هه‌ڵبژاردنی ڕێگای ژيانه‌وه‌. له‌ به‌شی دووه‌می ئه‌و وتاره‌دا (له‌ ژماره‌ی چوارشه‌ممه‌‌ی داهاتوودا) سه‌رچاوه‌ی گرفته‌ سه‌ره‌كيه‌كان و چاره‌سه‌ره‌ بنه‌ڕه‌تيه‌كان تاوتوێ ده‌كه‌ين و پێشنيازی ڕيفۆرمی ڕێكخراوه‌كه‌ ده‌خه‌ينه‌ به‌رده‌م سه‌ركرده‌ و ئه‌ندامانی يه‌كێتی به‌و ئومێده‌ی كه‌ كاری جيددی بۆ ژيانه‌وه‌ی حيزبه‌كه‌ و جۆشدانه‌وه‌ی كۆمه‌ڵگای كوردی هه‌رێم بكه‌ن. هه‌ڵبه‌ت (بوكێ له‌گه‌ڵ تۆمه‌ و خه‌سوو گوێت لێ بێت)، ئه‌وه‌ی بۆ يه‌كێتی ده‌گوترێ بۆ هه‌موو حيزبه‌كانی تری گۆڕه‌پانه‌كه‌ش ده‌گونجێ.

Sunday 2 March 2008

سياسه‌تی ئه‌مه‌ريكا: زوير كردنی كورد بۆ ڕازی كردنی تورك

پاراستنی به‌رژه‌وه‌نديه‌ ئه‌مه‌ريكيه‌كان له‌عيراقدا: زوير كردنی كورد بۆ ڕازی كردنی تورك
پڕۆفيسۆر دلاوه‌ر عه‌بدولعه‌زيز عه‌لائه‌ددين
هاوڵاتی: ٢/۳/٢٠٠٨
به‌زاندنی سنوور و تێكدانی ئاسايشی باكوره‌ ئارامه‌كه‌‌ی عيراق له‌ لايه‌ن توركياوه‌ بوه‌ته‌ نه‌ريت و عاده‌ت، و كاتی ئێستاشدا وا به‌رده‌وامه. هاوكات، ناوه‌ڕاست و خوارووی عيراق هێشتا بريتين له‌ گۆڕه‌پانی شه‌ڕی پڕ له‌ مه‌ترسی. ئه‌مه‌ريكا له‌ لايه‌كه‌وه‌ هه‌ر له‌ خه‌باتی قورست دايه‌ به‌و‌ ئومێده‌‌ی كه‌وا ته‌كان به‌ پڕۆسه‌ی ئارامكردنی عيراق بدات، له‌ لايه‌كی تريشه‌وه‌ خه‌ريكه‌ سۆز و لايه‌نگيری تاكه‌ هاوپه‌يمانه‌ كورده‌كانيش له‌ ده‌ست ده‌دات.
هه‌ندێك له‌ بيركه‌ره‌وه‌ ناوداره‌كانی ئه‌مه‌ريكی له‌ بڵاو كراوه‌كانياندا ده‌يانه‌وێ ئيداره‌ی ئه‌مه‌ريكی له‌ دژی خواستی خودموختاری كوردی هان بده‌ن. به‌ڵگه‌ و هۆی پڕاگماتيكی ده‌هێننه‌وه‌ بۆ ئه‌وه‌ی ئه‌مه‌ريكا‌ سياسه‌تێكی واقيعيانه‌ له‌ ئامێز بگرێ و پشتگيری له‌ هێرشه‌ سنوور به‌زێنه‌كانی توركی بۆ ناوه‌وه‌ی عيراق بكات، و به‌ هۆيه‌وه‌ مافی كوردی هه‌رده‌م مافخوراو پێشێل بكات. له‌ ژێر بيانگه‌ی "پاراستنی خاكی يه‌كگرتووی عيراقی و ڕازی كردنی دراوسێكان"، ئه‌و لۆبيكه‌رانه‌ داوا له‌ كورد ده‌كه‌ن كه‌ چيتر نه‌وت له‌ به‌رده‌م ماڵی خۆی هه‌ڵنه‌هێنجێ، و ده‌ست له‌ مافه‌ مێژووييه‌كه‌ی‌ كه‌ركوكی پڕ له‌ نه‌وتی هه‌ڵگرێ، و له‌مه‌ودوا زياترعيراقيانه‌ ڕه‌فتار بكات. ئه‌و داوايه‌ ناواقيعيانه‌ له‌ خزمه‌تی هيچ لايه‌نێكدا نين و به‌رهه‌ميان بۆ كه‌س نابێ. له‌ به‌رژه‌وه‌ندی ئه‌مه‌ريكادايه‌ كه‌ ئه‌وانه‌ی خواره‌وه‌ ڕه‌چاو بكات.
يه‌كه‌م: به‌ پێكهاته‌ و سروشت، عيراق ده‌وڵه‌تێكی سه‌قه‌ته‌ و هه‌ر به‌ سه‌قه‌تيش ده‌مێنێته‌وه‌. سه‌ره‌ڕای هه‌وڵ و ته‌قه‌ڵڵا جيدديه‌كانی ئه‌مه‌ريكا و وڵاتانی تر، خه‌نده‌قه‌ دابه‌شكه‌ره‌كانی تايه‌فه‌گه‌ريی له‌ جه‌رگه‌ی حكومه‌ت و موئه‌سسه‌سه‌كانیدا قوڵچه‌قيون. حكومه‌ته‌ گه‌نده‌ڵه‌كه‌ی به‌غدا هێشتا بۆی نه‌لواوه‌ ته‌ركيز بكاته‌ سه‌ر ئه‌وله‌ويه‌ته‌ ئاسايشيه‌كانی وڵاته‌كه، چی جای ئه‌وه‌ی حكومه‌تێكی كاڕا هه‌ڵسوڕێنێ وه‌يان ڕۆڵی هاوپه‌يمانێكی ئه‌مه‌ريكی ببينێ. ئه‌گه‌ر عيراق دابه‌ش نه‌كرێته‌ چه‌ند كيانێكی فيدڕالی سياسی و ئابووری نيمچه‌ سه‌ربه‌خۆ، هيچ ڕێگاچاره‌يه‌كی تر نابێته‌ هۆی ئه‌وه‌ی ئه‌و وڵاته‌ ده‌ستكرده‌دا ئارامی تێدا سه‌قامگير بێ وسه‌رفراز بێ و به‌ ئاشتيانه‌ له‌گه‌ڵ خودی خۆی و دراوسێكانی بگوزه‌رێ. ‌
دووه‌م: زه‌وت كردنی مافی چاره‌ی خۆ نوسينی كورد له‌ لايه‌ن عه‌ره‌ب و تورك و ئێرانيه‌كانه‌وه‌ تاكه‌ فاكته‌ری نائارامی بووه‌ له‌ ڕۆژهه‌ڵاتی ناوه‌ڕاست. ئه‌مه‌ريكاش چه‌ندين جار خيانه‌تی له‌گه‌ڵ كورد كردوه‌ و كوردی زوير كردوه‌، به‌ڵام ئێستا به‌ هۆی لابردنی سه‌ددام له‌ حوكمی عيراق، وا دۆستايه‌تی و نيازچاكی كوردی بۆ خۆی مسۆگه‌ر كردوه‌. ده‌ستكه‌وته‌ به‌رچاوه‌كانی ئه‌و چه‌ند ساڵه‌ی دوايی كوردان، سه‌ره‌ڕای سياسه‌تی ئه‌مه‌ريكی به‌‌ده‌ست هێنراون نه‌وه‌ك به‌ هۆی ئه‌مه‌ريكاوه. به‌بێی هاوكاری بێ سنووری كوردان، ئه‌مه‌ريكا عيراقی ده‌دۆڕانده‌ ئێران و تێرۆريستان. له‌وه‌يش گرنگتر، له‌ ئاينده‌دا به‌ بێی كوردان، ئه‌مه‌ريكا ناتوانێ له‌ شه‌ڕ بيباته‌وه‌ و عيراق سه‌قامگير بكات و له‌شكره‌كه‌ی بباته‌وه‌ ماڵه‌وه‌. بيركه‌ره‌وه‌ و سياسه‌ت دروستكه‌ره‌كانی ئه‌مه‌ريكی وا خه‌ريكه،‌ به‌ هۆی زياد بوونی هاوكاری عه‌ره‌بی سوننه و باشتر بوونی ئاسايش له‌ عيراقدا، له‌ خۆيان بايی ده‌بن و متمانه‌يان به‌ خۆيان زۆرتر ده‌بێ. به‌ڵام له‌ ڕاستيدا هێشتا ئه‌و ده‌ستكه‌وتانه‌ی به‌و دوايیه‌ وه‌ده‌ست هێنراون جێگير نه‌بوونه‌، و دياريش نيه‌ كه‌ ئايا له‌ دوای كشانه‌وه‌ی له‌شكری ئه‌مه‌ريكی و بڕينی يارمه‌تی پاره‌ و به‌رتيل، ئه‌و ده‌ستكه‌وتانه‌‌ به‌رده‌وام ده‌بن.
تا ئێستا به‌رژه‌وه‌ندی ئه‌مه‌ريكا له‌ پاراستنی يه‌ك گرتوويی و به‌هێز كردنی حكومه‌تی مه‌ركه‌زی عيراق دا بووه‌. به‌ڵام له‌ مه‌ودای درێژ خايه‌ندا به‌رژه‌وه‌ندی ئه‌مه‌ريكی و به‌رژه‌وه‌ندی بازاڕی جيهانی له‌ سه‌قامگير بوونی ئارامي‌ ناو ئه‌و وڵاته‌ نه‌وتيه دايه‌‌. دياره‌ كه‌ چيتر ئه‌و سه‌قامگيريه‌ش له‌ ڕێگه‌ی ديكتاتۆريه‌ته سه‌ددام ئاسايیه‌كان‌ مسۆگه‌ر ناكرێ. بۆيه‌ش، ته‌نيا ڕێگه‌یه‌ك كه‌ له‌ به‌رده‌م ئه‌مه‌ريكادايه‌ ئه‌وه‌يه‌ كه‌وا ديموكراسيه‌ت باشتر به‌سه‌ر عيراقدا بسه‌پێنێ. ‌ پێكه‌وه‌ لكاندنی زۆره‌ملێيانه‌ی ئه‌و خه‌ڵكه‌ ناته‌بايانه‌، نابێته‌ هۆی په‌يدا بوونی خۆشه‌ويستی و خۆشگوزه‌رانی له‌ وڵاته‌كه‌دا، مه‌گه‌ر ئه‌مه‌ريكا بتوانێ هه‌ر يه‌ك له‌و پێكهاته‌ نه‌ته‌وه‌ييانه‌‌ دڵنيا بكاته‌وه‌. به‌ بێی ده‌ستكه‌وتنی ته‌واوی مافه‌ مرۆڤيه‌كان، به‌ مافی چاره‌ی خۆ نووسينه‌وه‌، كورده‌كان نابنه‌ عيراقيی جگه‌رسۆز، و به‌ زاڵ بوونی ده‌سه‌ڵاتی به‌غداش ڕازی نابن.
سێيه‌م: سه‌ره‌ڕای ده‌يان ساڵی پشتگيری ئه‌مه‌ريكی، حكومه‌تی هيچ كام له‌ دراوسێ عه‌ره‌ب و توركه‌كانی عيراق به‌ڵگه‌ی سوپاس و مه‌منونيه‌تيان نيشانی ئه‌و زلهێزه‌ نه‌داوه‌، و هيچ كامێكيشيان له‌ كاتی لێقه‌وماندا بۆ ئه‌مه‌ريكيه‌كان جێگه‌ی متمانه‌ و پشتگرتن نه‌بوونه‌. به‌ پێچه‌وانه‌وه‌، هه‌سته‌ دژ به‌ ئه‌مه‌ريكاييه‌كان له‌ نێو ئه‌و ميلله‌تانی ئه‌و وڵاتانه‌دا هه‌روا به‌ خێرايیه‌وه ڕوويان له‌ زياد بووندايه‌، و له‌وه‌ ده‌چێ له‌ لايه‌ن حكومه‌ته‌ به‌ناو "هاوپه‌يمانه‌كان"ی ئه‌مه‌ريكاوه‌ش هان درابن. پێنج ساڵ له‌ دوای گۆڕانی ڕژێمی عيراق، ده‌سه‌ڵاتداره‌كانی توركيا، كه‌ هێشتا بنده‌سته‌ی ئه‌رته‌شن، كارێكی وايان نه‌كرد كه‌وا ده‌ستی يارمه‌تی بۆ ئه‌مه‌ريكا درێژ بكه‌ن و تۆڵه‌‌ی ڕابوردوويان بۆ بكه‌نه‌وه‌، كه‌چی توانيويانه‌ سازشی مه‌زن به‌‌و زلهێزه‌ بكه‌ن و ده‌ستكه‌وتی مه‌زنيش وه‌ده‌ست بهێنن. ئێستا وا پشتگيری ئيداره‌ی ئه‌مه‌ريكيشيان بۆ سنوور به‌زاندنی عيراق و ڕاونانی پارتی كرێكارانی كوردستان (په‌كه‌كه‌) ده‌ستكه‌وتووه‌. په‌كه‌كه‌، كه‌ ڕێكخراوێكه‌ داوای مافی مرۆڤی كورد ده‌كات، وا له‌ لايه‌ن ئه‌مه‌ريكيه‌كانه‌وه‌ بۆ خاتری ڕازی كردنی توركيا خراوه‌ته‌ ليسته‌ی تێرۆريستانه‌وه‌.
بێ ئاراميی ناوه‌كيی توركيا وای له‌ سه‌ركرده‌كانيان كردوه‌ كه‌وا پشوويان كورت بێ، ته‌ركيزيان كه‌م بێ و چيتريش جێگه‌ی متمانه‌ نه‌بن. ده‌زگای ده‌وڵه‌تی توركی به‌ ده‌ستوه‌شاندن كورد داده‌پڵۆسێ و، به‌ گوێره‌ی دان پێدانانی توركان، ئه‌و ده‌زگايه‌ تاوانی دژی مرۆڤايه‌تی ئه‌نجام داوه‌. له‌گه‌ڵ ئه‌وه‌يشدا، لۆبيكه‌ره‌ پڕۆتوركه‌كانی ناو ئه‌مه‌ريكا هانی كوردانی عيراق ده‌ده‌ن كه‌وا ده‌ست له‌ناو ده‌ستی ئه‌رته‌شی توركی بنێن و هاوكاريان له‌ لێدانی په‌كه‌كه‌ بكه‌ن. ئه‌گه‌رچی له‌وانه‌يه‌ په‌كه‌كه‌ توندڕه‌و و سه‌رلێشێواو بێ، به‌لام هه‌موو كوردێك (به‌وانه‌ی عيراقه‌وه‌) ڕێكخراوی په‌كه‌كه‌ به‌ تاقه‌ نوێنه‌ری بزوتنه‌وه‌ی ڕزگاريخوازی كوردی باكوری ناو توركيا ده‌زانن. كورده‌كان له‌ ئه‌مه‌ريكا بێ ئومێد و بێ تاقه‌ت بوونه له‌ به‌ر پشتگيری كردنی توركيا بۆ لێدانی په‌كه‌كه‌،‌. بۆيه‌ش، باشترين ئامۆژگاری بۆ ئه‌مه‌ريكا ئه‌وه‌يه‌ كه‌وا سه‌ر له‌ نوێ چاو به‌ شه‌ڕی توركيا و په‌كه‌كه‌ دا بخشێنێته‌وه‌. پێويسته‌ ئه‌مه‌ريكا يارمه‌تی توركيا بدات كه‌وا ئاشتی و ئاسايش به‌ به‌شدارێتی هه‌موو لايه‌نێكی په‌يوه‌نديدار له‌ وڵاته‌‌‌كه‌دا سه‌قامگير بكات. هێرشه‌كانی سه‌ر په‌كه‌كه‌ نه‌ك ته‌نيا مه‌وقيعی په‌كه‌كه‌یان به‌هێز كردوه‌، به‌ڵكو خه‌ريكه‌ كوردی عيراق و توركيا له‌ ئه‌مه‌ريكا زوير بكه‌ن. پرسياری گرنگ لێره‌دا ئه‌وه‌يه‌، ئايا ئه‌مه‌ريكا بۆی ده‌كرێ كه‌وا پشتگيری كوردی عيراق له‌و ڕۆژگاره‌ هه‌ستياره‌دا بۆ خاتری ڕازی كردنی توركيا له‌ ده‌ست خۆی بدات؟
چواره‌م: ئيداره‌ی ئه‌مه‌ريكی يارمه‌تی سه‌ركرده‌كانی كوردی عيراقی داوه‌ و تا ئێستاش توانيويه‌تی به‌ لای خۆيه‌وه‌ ڕايان بكێشێ و لايه‌نگيريه‌تيان بۆ خۆی مسۆگه‌ر بكات. به‌ڵام حيزبه‌ ده‌سه‌ڵاتداره‌كان و حكومه‌ته‌‌كه‌ی هه‌رێم له‌ به‌ر گه‌نده‌ڵيی به‌ زه‌حمه‌ت توانيويانه‌ خه‌ڵكه‌ سه‌ربه‌خۆيی خوازه‌كه‌يان كۆنتڕۆڵ بكه‌ن. به‌ هه‌مان شێواز‌ی ڕه‌خنه‌ جيهانيه‌ شه‌رمه‌زاركه‌ره‌‌كان، خه‌ڵكی كوردستان وا به‌ كراوه‌يی و به‌ ئاشكه‌را ڕه‌خنه‌ له‌ ده‌سه‌ڵاتداره بێ توانا و ناديموكراتيه‌‌كانيان ده‌گرن و ڕقی خۆيان له‌ به‌رامبه‌ر ڕه‌فتاری سه‌ركرده‌كانيان ده‌رده‌بڕن. په‌تای گه‌نده‌ڵيی و بێ سه‌روه‌ريی قانون و ده‌ستی قوڕسی ده‌زگا داپڵۆسێنه‌ره‌كانی ئه‌و دوو حيزبه‌ ده‌سه‌لاتداره‌ی كوردستانی عيراق (يه‌كێتی و پارتی)، خه‌نده‌قی نێوان خه‌ڵك و سياسه‌تمه‌دارانی هه‌رێمی فراوان كردوه‌. ئه‌و ڕاستيانه‌ له‌ لايه‌ن لۆبيكه‌ره‌ پڕۆتوركه‌كانه‌وه،‌ وه‌ك به‌هانه‌ و بۆ خاتری ته‌برير كردنی هێرشی توركی، به‌كار ده‌هێنرێن. به‌ڵام بارودۆخی سياسی كوردستان له‌ ته‌قينه‌وه‌ نزيك بۆته‌وه‌. به‌رده‌وامێتی ئيهانه‌ی توركی، له‌گه‌ڵ مه‌حروم كردنی كورد له‌ كه‌ركوك و نه‌وت و مافی چاره‌ی خۆ نووسين، ده‌بێته‌ هۆی ئه‌وه‌ی كه‌وا ڕووداوه‌كانی كوردستان وا بته‌قێته‌وه‌ كه‌وا له‌ كۆنتڕۆڵی هه‌موو لايه‌ك ده‌ربچێ.
ڕێگاچاره
خه‌ڵكی كوردستان پێويستيان به‌ ئه‌مه‌ريكايه‌، و چاويان لێيه‌ كه‌ وه‌ك هاوپه‌يمانێك له‌ هێرشی زاڵمانه‌ی ده‌ره‌كی و ناوه‌كی بيانپارێزێت. چاوه‌ڕێی ئه‌وه‌ن كه‌وا ئه‌مه‌ريكای زلهێز هيممه‌تو بكات:
١- يارمه‌تی حكومه‌تی هه‌ڵبژێردراوی توركی بدات بۆ ئه‌وه‌ی ئاشتی و ديموكراسيه‌تی ڕاسته‌قينه‌ له‌ توركيادا بچه‌قێنێ، و بكه‌وێته‌ ديالۆگ له‌گه‌ڵ په‌كه‌كه‌ (هه‌روه‌ك له‌ ئايه‌رله‌ندا كردیان).
٢- فشار بخاته‌ سه‌ر جه‌نه‌ڕاڵه‌ توركه‌كان بۆ ئه‌وه‌ی ملكه‌چی ديموكراسيه‌ت بن و چيتر قوڕاوی ناوچه‌ی ڕۆژهه‌ڵاتی ناوه‌ڕاست ئاڵۆزتر نه‌كه‌ن.
۳- فشار بخاته‌ سه‌ر سه‌ركرده‌ كورده‌كان بۆ ئه‌وه‌ی ڕيفۆرمی سياسی ئه‌نجام بده‌ن و عه‌داله‌تی كۆمه‌ڵايه‌تی بهێننه‌ كايه‌وه‌ و قانون وه‌ك سه‌روه‌ری وڵاته‌كه‌يان بچه‌سپێنن.
كوردی عيراق به‌ خوێنيان ده‌نگيان بۆ ده‌ستكه‌وتنی هاوپه‌يمانێتی ئه‌مه‌ريكی داوه‌، به‌ڵام له‌ جياتيان خه‌ون و هيواكانيان خه‌ريكه‌ به‌ ڕه‌فتاری ئه‌مه‌ريكی له‌ عيراق و به‌ پشتگيری كردنی ئيهانه‌كانی توركی، تێك بشكێ. ئه‌گه‌ر كورده‌كان يارمه‌تی نه‌درێن، وه‌يان به‌ هه‌ستياريه‌وه‌ مامه‌ڵه‌يان له‌گه‌ڵدا نه‌كرێ، ئه‌وا ڕه‌نگه‌ حاڵه‌تی خه‌يبه‌ت ئه‌مه‌ليان ببێته‌ حاڵه‌تی توڕه‌يی. له‌و كاته‌ی كه‌‌ ئاشتی و ئارامی و ئاسايشی عيراق له‌ بارێكی ناسك و هه‌ستياردايه‌، ئه‌مه‌ريكا هه‌ڵه‌يه‌كی مێژوويی ده‌كات ئه‌گه‌ر ته‌ركيز ته‌نيا بكاته‌ سه‌ر ده‌ستكه‌وتی كورتخايه‌ن، به‌ بێی ڕه‌چاو كردنی به‌رژه‌وه‌نديه‌ درێژخايه‌نه‌كان.ئه‌و وتاره‌ به‌ زمانی ئينگليزی له‌ كورديش ئه‌سپێكتس دا له‌ ٢٧/٢/٢٠٠٨دا بڵاو كراوه‌ته‌وه‌ و لێره‌دا بۆ خوێنه‌ری كورد وه‌رگيڕاوه‌.